Yehovah no sa libi yu kwetikweti
DEN Kresten na ini Yudea ben kisi ogri-ati gens, èn den ben musu feti fu no kisi a srefi denki fu den sma di ben e prakseri fu kisi gudu nomo . Fu gi den Kresten deki-ati, Paulus ben skrifi san Yehovah ben taigi den Israelsma di den ben e go na ini a Pramisi Kondre. A ben skrifi: „Mi no sa libi yu kwetikweti èn noiti mi no sa gowe fu yu” (Hebrewsma 13:5; Deuteronomium 31:6). A no de fu taki dati a pramisi disi ben gi den fosi yarihondro Kresten na ini Yudea, deki-ati trutru.
A srefi pramisi disi musu gi wi krakti fu horidoro te wi abi broko-ede na ini a ’muilek ten disi di tranga fu pasa’ (2 Timoteyus 3:1). Efu wi e frutrow tapu Yehovah èn efu wi sori dati na ini den sani di wi e du, dan a sa horibaka gi wi awansi wi de na ini den moro muilek situwâsi. Fu si fa Yehovah kan handri akruderi a pramisi disi, meki wi go luku fu eksempre fa a de te wan sma lasi en wroko wantronso.
Te a situwâsi fu yu kenki wantronso
Na heri grontapu, moro nanga moro sma no abi wroko. Soleki fa wan tijdschrift na ini Polen e skrifi, dan a de di wroko no de, „na wan fu den moro muilek ekonomia problema na ini a libimakandra”. Srefi gudu kondre abi a problema disi. Fu eksempre, na ini a yari 2004, srefi den memre fu na organisâsi fu kondre di e wroko makandra na ekonomia sei fu meki a kondre fu den go na fesi, „ben abi moro leki 32 milyun sma di no abi wroko, èn dati ben de moro leki a ten di heri grontapu ben abi bigi ekonomia problema, baka a yari 1930”. Na ini Polen, a Centraal Bureau voor de Statistiek ben taki dati dri milyun sma no ben abi wroko na ini december 2003, èn dati „na 18 procent fu ala borgu di owru nofo fu du wan wroko”. Wan buku e taki dati 47,8 procent fu den Afrikan nengre na ini Zuid-Afrika, no ben abi wroko na ini a yari 2002!
Gi furu sma èn srefi gi futuboi fu Yehovah a de wan problema trutru te den no abi wroko noso te den lasi den wroko wantronso. „Sani di e pasa sondro fu sma fruwakti dati”, e miti ala sma (Preikiman 9:11). Kande wisrefi e taki san a psalm skrifiman David ben taki, namku: „Den banawtu fu mi kon moro furu” (Psalm 25:17). Yu ben o man horidoro te den sortu takru situwâsi disi e miti yu? Den situwâsi disi kan abi krakti na tapu den firi fu yu, a yeyefasi fu yu, èn sosrefi tapu a fasi fa a e go nanga yu na materia sei. Yu man seti yu libi baka, efu yu ben o lasi yu wroko?
Fa fu du te sani e moro wi
„A de wan moro hati sani gi mansma leki gi umasma, te den lasi den wroko”, fu di a de a gwenti taki sma e si mansma leki a sma di musu wroko moni fu sorgu na osofamiri, na so a datra Janusz Wietrzyński taki. A e taki dati wan man kan „bruya srefisrefi” efu a no abi wroko, a kan atibron noso a kan firi leki a no man du noti fu kenki a situwâsi fu en. Wan papa di lasi en wroko, kan lasi lespeki gi ensrefi èn a kan taki a e bigin „meki trobi nanga en osofamiri”.
Adam, wan Kresten papa di abi tu pikin, e taki fa a ben e firi di a lasi en wroko: „Mi ben e atibron esi-esi; ala sani ben e fruferi mi. Srefi te neti mi ben e dren fu wroko, èn fa mi ben musu sorgu gi mi pikin èn gi mi wefi di ben lasi en wroko wantronso tu.” Di Ryszard nanga Mariola, wan trowpaar di abi wan pikin, ben lasi a wroko fu den, dan den ben abi wan bigi paiman na bangi. A wefi e fruteri: „Doronomo mi ben e broko mi ede nanga sani, èn mi konsensi ben e fon mi doronomo taki wi no ben du wan bun sani di wi leni a moni dati. Mi ben e tan denki nomo taki na mi ben meki taki wi de na ini a situwâsi disi.” Te wi miti den sortu situwâsi disi, dan esi-esi wi kan atibron, wi kan broko wi ede nanga sani, noso wi kan firi bita-ati, èn a situwâsi disi kan bruya wi. Ma fa wi kan basi den takru firi disi dan?
Bijbel e gi wi bun rai di e yepi wi fu tan abi a frutrow taki sani sa waka bun. „No broko un ede nanga nowan sani,” na so na apostel Paulus ben frumane, „ma begi Gado ala san unu wani, èn du dati fayafaya sosrefi, èn taki en tangi tu; èn a vrede fu Gado di bigi moro leki san libisma man frustan, sa kibri un ati èn un frustan nanga yepi fu Krestes Yesus” (Filipisma 4:6, 7). Te wi e begi Yehovah, dan a sa gi wi „a vrede fu Gado”, èn a sa meki taki wi no e broko wi ede, fu di wi e bribi na ini en. Irena, a wefi fu Adam, e taki: „Na ini den begi fu wi, wi ben fruteri Yehovah fu a situwâsi fu wi, èn fa wi wani du moro muiti fu poti prakseri soso na sani di de fanowdu trutru. Mi masra, di moro furu ben de wan sma di ben e broko en ede tumusi esi nanga sani, ben bigin feni taki den problema ben o lusu.”
Efu yu lasi yu wroko wantronso, dan yu abi na okasi fu du san Yesus Krestes ben gi leki deki-ati na ini a Bergitaki: „No broko un ede moro nanga un libi, iya, nanga san unu o nyan noso san unu o dringi noso san unu o weri na un skin. . . . Fu dati ede, tan suku a kownukondre nanga En regtfardikifasi fosi, dan unu sa kisi ala den tra sani tu” (Mateyus 6:25, 33). A rai disi ben yepi Ryszard nanga Mariola fu feti nanga den firi fu den. „Ala ten mi masra ben e trowstu mi èn a ben e sori mi taki Yehovah no ben o gowe libi wi”, na so Mariola e taki. En masra e taki: „Fu di wi ben begi nanga makandra doronomo, meki wi kon moro krosibei na Gado èn na makandra, èn dati ben gi wi a trowstu di wi ben abi fanowdu.”
A santa yeye fu Gado sa yepi wi tu fu horidoro. A santa yeye kan yepi wi fu dwengi wisrefi, so taki wi kan tan basi den firi fu wi (Galasiasma 5:22, 23). Kande disi no makriki, ma toku wi kan du disi, fu di Yesus pramisi taki „a Tata di de na hemel sa gi santa yeye na den sma di e aksi en”.—Lukas 11:13; 1 Yohanes 5:14, 15.
No frigiti den sani di yu abi fanowdu na yeye fasi
Te wan sma lasi en wroko wantronso, dan dati kan bruya srefi wan Kresten di no e bruya esi, ma toku wi no musu frigiti den sani di wi abi fanowdu na yeye fasi. Teki na eksempre fu Moses, di a ben abi 40 yari. En heri libi kenki di a lasi a posisi di a ben abi na mindri den heihei-sma di ben e tiri Egepte, èn a ben musu du a wroko fu wan skapuman, wan wroko di den Egeptesma ben e wisiwasi (Genesis 46:34). Moses ben musu fiti ensrefi na a nyun situwâsi fu en. Na ini den 40 yari baka dati, a gi Yehovah na okasi fu kenki a fasi fa a e prakseri èn fu sreka en gi a nyun wroko di a ben o du bakaten (Exodus 2:11-22; Tori fu den Apostel 7:29, 30; Hebrewsma 11:24-26). Aladi Moses ben kisi problema, toku a ben hori yeye afersi na prakseri, èn a ben de klariklari fu teki a leri fu Yehovah. Meki a no de so noiti taki takru situwâsi e meki taki wi no poti prakseri moro na yeye afersi!
Aladi a kan hebi gi wi te wi lasi wi wroko wantronso, toku dati na wan bun ten fu tranga a banti di wi abi nanga Yehovah Gado èn nanga en pipel. Adam, fu suma wi ben taki kaba, ben denki so tu. A e taki: „Di mi nanga mi wefi lasi wi wroko, dan noiti wi ben prakseri srefi fu misi den Kresten konmakandra, noso fu no du so furu moro na ini a preikiwroko. A fasi disi fa wi ben e si sani, ben meki taki wi no ben e broko wi ede tumusi nanga a ten di e kon.” Na so Ryszard e si a tori tu: „Efu wi no ben go na den konmakandra èn efu wi no ben du a preikiwroko, dan wi no ben o man horidoro; den broko-ede ben o moro wi. A e gi wi deki-ati te wi e taki fu yeye afersi nanga tra sma, bika den sortu takimakandra dati e meki wi poti prakseri na den problema fu den èn no na wi eigi problema.”—Filipisma 2:4.
Iya, na presi fu broko yu ede taki yu no abi wroko, pruberi fu gebroiki a ten di yu abi fu du moro gi Gado, fu studeri moro, fu du moro sani makandra nanga a gemeente, noso fu du moro na ini a diniwroko. Na presi taki yu no abi noti fu du, yu sa abi „furu fu du na ini a wroko fu Masra”. Èn disi sa tyari prisiri gi yu èn gi tra opregti sma di e arki a Kownukondre boskopu di yu e preiki.—1 Korentesma 15:58.
Sorgu gi den sani di yu osofamiri abi fanowdu
Ma yeye nyanyan no e furu sma bere. Wi musu hori a gronprakseri disi na prakseri: „Fu tru, efu wan sma no e sorgu den sma fu en, spesrutu den sma fu en osofamiri, dan a drai en baka gi a bribi, èn a takru moro leki wan sma di no e bribi” (1 Timoteyus 5:8). „Aladi den brada nanga sisa na ini a gemeente sa wani yepi wi esi-esi nanga den sani di wi abi fanowdu na skin fasi”, Adam e taki, „toku wi leki Kresten abi a frantwortu fu suku wan wroko.” Wi kan frutrow taki Yehovah nanga en pipel sa horibaka gi wi, ma noiti wi musu frigiti taki wisrefi musu du wan sani fosi fu feni wan wroko.
San wi kan bigin du? „No sidon fow yu anu e wakti taki Gado o du wan wondru fu yepi yu”, na so Adam e piki. „Te yu e suku wroko, dan no draidrai fu taki dati yu na wan Kotoigi fu Yehovah. Nofo tron den wrokobasi e si dati leki wan prenspari sani.” Ryszard e gi a rai disi: „Aksi ala sma di yu sabi efu den sabi pe wan wroko de fu feni, tan aksi na a kantoro di e yepi sma fu feni wroko. Leisi den pisi na ini koranti pe sma e suku wrokoman, soleki: ’Wi e suku wan uma di wani sorgu wan sikisma’; noso, ’Wi e suku wan wrokoman gi wan syatu ten fu krin dyari.’ Tan suku! De klariklari fu du ala sortu wroko, srefi efu yu musu du wan wroko di lagi, noso efu yu no feni a wroko di yu ben wani du langa ten kaba.”
Iya, „Yehovah na [yu] yepiman”. A no sa „libi yu kwetikweti èn noiti [a] no sa gowe fu yu” (Hebrewsma 13:5, 6). Yu no abi fu broko yu ede tumusi. A psalm skrifiman David ben skrifi: „Lolo yu pasi go na tapu Yehovah, èn frutrow na en tapu, èn ensrefi sa handri” (Psalm 37:5). Fu ’lolo wi pasi na tapu Yehovah’, wani taki dati wi e frutrow na en tapu èn taki wi e du sani soleki fa en wani, srefi te a gersi leki a situwâsi no bun gi wi.
Adam nanga Irena ben man sorgu densrefi fu di den ben e krin fensre èn krin trapu, èn fu di den ben e bai sani nanga koni. Den ben e go doronomo tu na a kantoro di e yepi sma fu feni wroko. Irena e taki: „Ala ten yepi ben de te wi ben abi en fanowdu.” En masra e taki: „Ondrofeni sori taki a no ala ten a ben de so, taki den sani di wi ben aksi na ini begi, ben de akruderi a wani fu Gado. Disi leri wi taki wi musu frutrow na tapu a koni fu Gado, na presi fu du nomo san wi e denki. A moro bun fu wakti nanga pasensi, tapu a lusu di Gado sa tyari.”—Yakobus 1:4.
Ryszard nanga Mariola ben teki difrenti wroko di den no ben fruwakti, ma na a srefi ten den ben gi kotoigi na kontren pe moro preikiman ben de fanowdu. „Wi ben feni wroko leti na a ten di wi no ben abi noti fu nyan”, Ryszard e taki. „Wi no ben teki wroko di ben o tapu wi fu du wi theokrasia wroko, aladi den ben e pai bun. Wi ben feni en moro bun fu wakti tapu Yehovah.” Den e bribi taki na Yehovah ben seti sani so taki den ben man yuru wan kamra di ben bunkopu srefisrefi, èn te fu kaba Ryszard feni wan wroko.
A kan hati yu srefisrefi te yu lasi yu wroko, ma a ben o bun fu gebroiki na okasi dati fu overtoigi yusrefi taki noiti Yehovah sa gowe libi yu. Yehovah e sorgu yu (1 Petrus 5:6, 7). Nanga yepi fu a profeiti Yesaya, a pramisi: „No luku lontu nanga fruwondru, bika mi na yu Gado. Mi o tranga yu. Mi o yepi yu trutru” (Yesaya 41:10). Meki a no de so noiti, taki wan problema di yu no fruwakti, soleki te yu lasi yu wroko, meki yu bruya taki yu no sabi san fu du. Du ala sani di yu man, èn libi a tori gi Yehovah. Wakti Yehovah, „iya sondro fu taki wan sani” (Kragisingi 3:26). Yu sa kisi furu blesi.—Yeremia 17:7.
[Prenki na tapu bladzijde 9]
Gebroiki a ten fu yu fu du moro gi Gado
[Prenki na tapu bladzijde 10]
Leri fu gebroiki yu moni nanga koni, èn de klariklari fu du ala sortu wroko