Moro sma e yere a wortu fu Yehovah na ini „a Kondre fu na Aka”

„A KONDRE fu na Aka”. Na so den sma fu Albania e kari a kondre fu den na ini a tongo fu den. A kondre disi di de na a syoro fu na Adriatis Se, na wan fu den Balkan kondre èn a de leti na mindri Grikikondre nanga a kondre di ben nen Yugoslafia fosi. Aladi sma e taki someni difrenti sani di abi fu du nanga a presi pe den Albaniasma komopo, toku furu historia skrifiman e agri taki den Albaniasma èn a tongo fu den komopo fu den fositen Iliriasma. Soleki fa wan buku e taki, dan a kulturu fu den Iliriasma bigin te na ini 2000 b.G.T. (The Encyclopædia Britannica).

Na Albania yu kan si furu moi sani. Na a noordsei fu a kondre yu abi bergi di lai nanga furu ston èn na a zuidsei fu a kondre di de na a Adriatis Se, yu kan si langa syoro di abi weti santi. Ma a moro moi sani na den sma srefi. Den abi switifasi èn den lobi fu gi sma wan switikon. Den de fayafaya èn den e taki krin san den e firi noso e denki. Den na sma di e leri sani esi-esi èn te den e taki san den e denki, dan den e du disi fayafaya, aladi den e gebroiki den anu furu te den e taki.

Wan barinen zendeling e go drape

Wi kan de seiker taki wan spesrutu man di ben go drape hondrohondro yari pasa kaba, si taki den sma fu a kondre disi ben abi switifasi èn taki a kondre ben moi. Na wan ten fu 56 G.T., na apostel Paulus di ben go na furu kondre kaba, ben skrifi: „Mi waka lontu go te na Iliria fu preiki a bun nyunsu fu Krestes finifini” (Romesma 15:19). A mindrisei pisi nanga a noordsei pisi fu Albania na ini a ten disi, ben de a zuidsei pisi fu Iliria fu fositen. Paulus ben skrifi a brifi fu en di a ben de na Korente, Grikikondre, na a zuidsei fu Iliria. Di a taki dati a preiki a bun nyunsu finifini „te na Iliria”, dan disi e sori taki a go te na a pisi pe Grikikondre ben miti nanga Iliria, noso taki a go na ini Iliria srefi. Awansi fa a no fa, a preiki na ini a pisi di de a zuidsei fu Albania now. Sobun, wi kan taki dati Paulus na a fosi sma di du a Kownukondre preikiwroko na ini Albania.

Someni hondro yari ben e pasa. A wan kownukondre kon baka a trawan. A wan dorosei kondre kon baka a trawan fu teki a pikin kondre disi fu Europa abra, teleki Albania kisi en eigi tiri na ini 1912. Sowan tin yari baka dati, sma na Albania ben e preiki baka fu a Kownukondre fu Yehovah.

Wan span bigin na ini a ten disi

Na ini den yari baka 1920, wan tu Albaniasma di ben froisi go na Amerkankondre èn di ben moksi densrefi nanga den Internationaal Bijbel Ondrosukuman, soleki fa sma ben sabi Yehovah Kotoigi na a ten dati, drai go baka na Albania fu fruteri tra sma san den ben leri. Wan fu den sma disi ben de Nasho Idrizi. Wan tu sma ben arki. Na ini 1924, a bijkantoro na Rumeinia ben kisi a frantwortu fu teki fesi na ini a preikiwroko na Albania, so taki den ben man yepi den sma drape di ben wani sabi moro fu Bijbel.

Thanas Duli (Athan Doulis) ben de wan fu den sma na Albania di ben kon yere fu Yehovah na ini a ten dati. A fruteri: „Na ini 1925, dri gemeente seti na Albania, èn na difrenti presi fu a kondre yu ben abi Bijbel Ondrosukuman di no ben miti nanga tra brada nanga sisa fu di den ben libi na farawe presi, èn yu ben abi wan tu sma sosrefi di ben wani sabi moro fu Bijbel. Fu di den ben lobi makandra so te, meki sma ben kan si krin taki den ben de heri tra fasi leki . . . sma na den lontu!”a

Fu di a kondre no ben abi bun pasi, meki a no ben makriki srefisrefi fu go fu a wan presi na a trawan. Ma toku den fayafaya preikiman du a muilek sani disi. Fu eksempre, na ini 1928 Areti Pina teki dopu na a zuidsei syoro na ini Vlorë; na a ten dati a ben abi 18 yari. A kren den bergi di ben lai nanga furu ston èn di ben muilek fu kren, fu preiki a bun nyunsu nanga yepi fu Bijbel. Na ini den yari baka 1930, a ben de wan memre fu wan fayafaya gemeente na Vlorë.

Na ini 1930, a bijkantoro na Ateine, Grikikondre, ben kisi a frantwortu fu teki fesi na ini a preikiwroko na Albania. Wan kring-owruman fu Grikikondre go na Albania na ini 1932, fu gi den brada nanga sisa drape deki-ati èn fu tranga den. Furu fu den wan di ben e leri Bijbel waarheid na a ten dati, ben abi a howpu fu go na hemel. Na ala sei, sma ben abi furu lespeki gi den fu di den ben tyari densrefi na wan fasi di fiti èn den ben de opregti. A wroko fu den getrow brada disi ben abi bun bakapisi. Na ini den yari 1935 nanga 1936, den prati sowan 6500 Bijbel publikâsi na Albania.

Wan dei, na ini a foto Vlorë, Nasho Idrizi drai wan plaat di ben abi wan fu den lezing fu J. F. Rutherford na tapu. Sma tapu den wenkri fu den èn den kon arki di Brada Idrizi vertaal a lezing na ini Albaniatongo. Fu di den fositen Bijbel leriman disi ben de fayafaya, meki Gado ben blesi den. Na ini 1940, Albania ben abi 50 Kotoigi.

Den sma fu a kondre no e bribi na ini Gado

Na ini 1939, den Fascist-sma fu Italiakondre teki Albania abra. Yehovah Kotoigi no ben kisi primisi moro fu du a wroko fu den, èn lanti tapu a preikiwroko fu den. Syatu baka dati, Doisri legre broko kon na ini a kondre. Di a di fu tu Grontapufeti kon na wan kaba, dan Enver Hoxha, wan legre-edeman di ben abi furu krakti tapu sma, opo kon. Na ini 1946, a Komunist Partèi fu en wini den verkiezing, èn baka dati a tron minister-presidenti. Sma ben kari den yari di ben kon baka dati, wan ten pe sma ben kan kon fri, ma gi a pipel fu Yehovah a ben wani taki wan heri tra sani.

Safrisafri, lanti bigin sori taki den no ben frudrage kerki moro. Yehovah Kotoigi na Albania, di no ben wani drai baka gi a Kresten bribi fu den, ben weigri fu teki prati na feti èn fu bumui nanga politiek (Yesaya 2:2-4; Yohanes 15:17-19). Lanti ben seni furu Kotoigi go na strafu-oso, sondro nyanyan noso sondro den moro prenspari sani di den ben abi fanowdu fu tan na libi. Nofo tron, den Kresten sisa fu den di no ben de na strafu-oso, ben wasi den krosi fu den èn ben bori gi den.

Sma e frufolgu den, ma den no e frede

Na ini den yari baka 1940, Frosina Xheka, wan uma di ben de wan tini na a ten dati èn di ben e libi na ini wan dorpu krosibei fu Përmet, yere san den bigi brada fu en ben e leri fu wan Kotoigi di nen Nasho Dori èn di ben e meki susu.b Lanti ben e luku moro fini san den Kotoigi fu Yehovah ben e du. Aladi disi ben de so, toku a bribi fu Frosina ben e kon moro tranga, ma en papa nanga mama no ben lobi a sani disi srefisrefi. „Den ben e kibri mi susu èn den ben fon mi te mi ben musu go na den Kresten konmakandra. Den ben e pruberi fu seti sani gi mi, so taki mi ben kan trow nanga wan man di no ben de na bribi. Di mi no ben wani, den yagi mi komoto na ini na oso. A dei dati snew ben e fadon. Nasho Dori aksi Brada Gole Flloko fu a foto Gjirokastër fu yepi mi. Den seti sani so, taki mi ben kan libi nanga na osofamiri fu en. Den brada fu mi ben musu tan na strafu-oso tu yari langa, fu di den no ben wani abi noti fu du nanga politiek. Baka di den kon fri, mi froisi go na Vlorë fu go libi nanga den.

Skowtu ben e pruberi fu dwengi mi fu teki prati na politiek. Mi weigri fu du dati. Baka di den grabu mi, den tyari mi go na wan kamra, dan den kon tanapu lontu mi. Fu di den ben wani tapu skreki gi mi, meki wan fu den taigi mi: ’Yu sabi san wi kan du nanga yu?’ Mi piki en: ’Yu kan du soso san Yehovah e gi yu pasi fu du.’ Ne a bari: ’Yu musu fu law! Komopo dyaso!’”

Na ini ala den yari, den brada fu Albania ben sori na a srefi fasi disi taki den ben de loyaal. Na ini 1957, den doro wan heimarki fu 75 Kownukondre preikiman. Baka 1960, na edekantoro fu Yehovah Kotoigi aksi John Marks, wan brada fu Albania di ben froisi go na Amerkankondre, fu go na a foto Tiranë fu yepi den brada fu orga a Kresten wroko drape.c Ma syatu baka dati, den seni Luçi Xheka, Mihal Sveci, Leonidha Pope, nanga tra lepi brada go na strafuman-kampu pe sma ben e dwengi den fu wroko.

A gersi leki wan kaba e kon na den problema fu den

Bifo 1967, lanti no ben feni nowan kerki na Albania bun. Baka dati sma no ben kisi primisi moro fu go na kerki. Nowan enkri priester ben kisi primisi fu hori kerki, awansi a ben de wan Lomsu, wan Orthodox, noso wan Moslim. Lanti ben tapu den kerki nanga den tempel fu den Moslimsma, noso den ben meki den tron presi pe sma ben kan go du sport, pe sma kan go luku owruten sani, noso den ben meki den tron wowoyo. Nowan sma ben kisi primisi fu abi wan Bijbel. Nowan sma no ben kisi pasi fu sori taki a ben e bribi na ini Gado.

A ben muilek srefisrefi fu preiki èn fu hori konmakandra. Ibri Kotoigi ben du san a ben man fu dini Yehovah, aladi den no ben man miti nanga makandra. Fu a pisi ten fu 1960 teleki 1980, soso wan tu Kotoigi nomo ben de. Toku a bribi fu den ben tranga.

Na ini den yari syatu baka 1985, sani na Albania bigin kenki safrisafri na politiek sei. A no ben de makriki fu feni nyanyan nanga krosi. Sma no ben e firi koloku. Baka 1990 fosi, sani kon kenki trutru na Albania, soleki fa dati ben e pasa kaba na ini heri Owstu-Europa. Baka di wán grupu nomo tiri a kondre na wan ogri-ati fasi 45 yari langa, wan nyun tiri kon di ben gi sma pasi fu go na kerki baka.

A Tiri Skin fu Yehovah Kotoigi, aksi den bijkantoro fu Oostenrijk nanga Grikikondre fu meki kontakti nanga ala den Albania brada esi-esi. Griki brada di ben sabi Albaniatongo, ben go na Tiranë nanga Berat nanga wan tu nyun Bijbel publikâsi di no ben vertaal so langa ete. Den brada di fosi ben abi fu lowe go na ala sei, ben breiti srefisrefi taki fosi tron na ini ala den yari, den miti Kotoigi fu tra kondre.

Fayafaya pionier fu tra kondre e teki fesi na ini a wroko

Na a bigin fu a yari 1992, a Tiri Skin ben seti sani so, taki Michael nanga Linda DiGregorio, wan trowpaar di ben de zendeling ben kan go na Albania. Michael en famiri ben de fu Albania. Den ben meki kontakti nanga den owru brada nanga sisa di ben tan getrow, èn den yepi den fu de makandra baka leki memre fu wan famiri fu Kresten brada nanga sisa di de na heri grontapu. Wan grupu fu 16 spesrutu pionier, noso furuten evangelie preikiman fu Italiakondre di ben e wroko bun tranga, kon drape na ini november, makandra nanga fo pionier fu Grikikondre. Sani ben sreka fu yepi den leri a tongo fu a kondre.

A libi ben tranga gi den pionier disi di ben komopo fu tra kondre. Ibri tron baka stroom ben tapu. Na ini a kowru pisi ten fu a yari, ala sani ben kowru èn natinati. Sma ben musu tanapu na ini rèi furu yuru langa fu feni nyanyan nanga tra sani di den ben abi fanowdu fu tan na libi. Ma a moro bigi problema di ben miti den brada, ben de fu feni konmakandra presi di ben bigi nofo gi den ipi-ipi sma di ben wani sabi moro fu waarheid!

Den pionier di ben e feti fu taki Albaniatongo, ben kon si taki wan tongo na soso wan sani di den ben abi fanowdu fu doro wan marki. Wan Bijbel leriman di ben abi furu ondrofeni, taigi den: „Efu wi wani lafu nanga den brada fu wi noso efu wi wani brasa den, dan wi no abi fu sabi finifini fa den wortu fu wan tongo seti. A no te yu e taki a tongo bun, dan den Albaniasma o arki yu, ma den o arki yu te yu lobi den nanga yu heri ati. No broko yu ede, den o frustan yu.”

Baka di den pionier kisi a fosi les fu leri taki a tongo, den go wroko na den foto Berat, Durres, Gjirokastër, Shkodër, Tiranë, nanga Vlorë. Baka wan syatu pisi ten, gemeente bigin opo esi-esi na ini den foto disi. Areti Pina ben pasa 80 yari kaba èn a no ben abi wan bun gosontu, ma a ben de ete na Vlorë. Den seni tu spesrutu pionier go drape fu preiki nanga Areti. Sma ben e fruwondru taki trakondre sma ben e taki Albaniatongo. Den taki: „Efu wi wani leri wan sani, dan den zendeling fu tra kerki e meki wi leri Ingrisitongo noso Italiatongo. Un musu lobi wi trutru èn a musu fu de so taki unu abi wan prenspari sani fu taki, bika unu leri Albaniatongo trutru!” Na ini yanuari 1994, Areti kaba en diniwroko dya na grontapu, aladi a ben de wan fayafaya preikiman te na a lasti mun fu en libi. En nanga den pionier kisi furu blesi fu di den ben de nanga faya. Na ini 1995, wan gemeente seti baka na Vlorë. Now dri gemeente e preiki fayafaya na ini a foto disi di abi wan lanpe.

Na ini a heri kondre, sma ben e angri fu kon sabi moro fu Gado èn den ben de klariklari fu arki sani di abi fu du nanga Bijbel. Den ben wani leisi iniwan buku di ben abi fu du nanga Bijbel èn di den Kotoigi ben gi den. Furu yongusma bigin studeri Bijbel èn den ben go na fesi esi-esi.

A bribi fu moro leki 90 ’gemeente nanga grupu e tan kon tranga trutru, èn dei fu dei moro nanga moro sma e tron bribiman’ na ini a heri kondre (Tori fu den Apostel 16:5). Den 3513 Kotoigi na Albania abi furu wroko fu du ete. Na ini maart 2005, 10.144 sma go na a Memrefesa. Na ini a preikiwroko, den Kotoigi ben abi moi takimakandra nanga sma di abi switifasi, èn a bakapisi ben de taki den Kotoigi ben man hori moro leki 6000 bijbelstudie. A de krin taki dusundusun sma o kisi wini fu a Nyun-Grontapuvertaling di tyari kon na doro na ini Albaniatongo no so langa ete. Iya, moro sma e yere a wortu fu Yehovah na ini „a Kondre fu na Aka”, èn disi e meki Yehovah kisi prèise.

[Futuwortu]

[Faki na tapu bladzijde 20]

SMA FU DIFRENTI RAS NO E FETI MORO NANGA MAKANDRA NA INI KOSOVO!

Na ini den yari syatu baka 1995, nyunsu ben e taki fu Kosovo ibri yuru baka, fu di sma drape ben e meki trobi nanga makandra fu gron ede. Na a srefi pisi ten dati, den ben e feti nanga makandra fu di sma fu difrenti ras no ben e lobi makandra, èn a bakapisi ben de taki dorosei kondre ben abi fu kon na mindri.

Di sma ben e feti na ini den Balkan kondre, dan furu Kotoigi ben musu lowe go na tra kondre di de krosibei. Baka di a feti tapu, dan wan pikin grupu fu den drai go baka na Kosovo, fu di den ben de klariklari fu du a preikiwroko. Spesrutu pionier fu Albania nanga Italiakondre ben wani froisi go na Kosovo fu yepi den 2.350.000 sma di e libi drape. Fo gemeente nanga siksi grupu di e wroko fayafaya, ala nanga ala sowan 130 preikiman, e dini Yehovah na ini a kontren disi.

Na ini a lente fu 2003, den hori wan Spesrutu Dei Konmakandra na ini a foto Priština, èn 252 sma ben de drape. Na a konmakandra disi, yu ben abi sma fu Albania, Doisrikondre, nanga Italiakondre, èn yu ben abi Serfiasma nanga Zigeuner-sma sosrefi. Na a kaba fu a dopulezing, a takiman poti tu aksi, èn dri sma opo tanapu fu piki den aksi disi nanga: ’Iya’. Wan fu den ben de wan Albaniasma, wan ben de wan Zigeuner-sma, èn a trawan ben de wan Serfiasma.

Ala den arkiman naki anu, baka di den dri sma di ben o teki dopu, piki nanga wan tranga sten: „Va!”, „Da!” nanga „Po!”, san wani taki ’Iya’. Ne den brasa makandra. Den ben leri san na a lusu gi den bigi problema di a kondre fu den abi, fu di sma fu difrenti ras no lobi makandra.

[Karta na tapu bladzijde 17

(Efu yu wani si pe den sani disi skrifi, luku a tijdschrift)

Mindrikondre Se

ITALIAKONDRE

ALBANIA

GRIKIKONDRE

[Prenki na tapu bladzijde 18]

Yongu Kotoigi e pruberi fu abi a srefi faya di den owru Kotoigi abi

[Prenki na tapu bladzijde 18]

Sensi 1928, Areti Pina dini Gado na wan getrow fasi teleki a dede na ini 1994

[Prenki na tapu bladzijde 19]

A fosi grupu pionier di komopo fu tra kondre, e leri fu taki wan tra tongo

[Sma di abi a reti fu a prenki na tapu bladzijde 16]

Aka: © Brian K. Wheeler/VIREO