Fosi sma ben e yagi den, now sma kon lobi den

WAN TU yari pasa, Santiago nanga en wefi, Lourdes, froisi go na a moi foto Huillcapata, na ini Peru. Den ben du disi fu prati a Bijbel boskopu fu howpu nanga den sma drape. Ma no langa baka dati, wan Lomsu priester di ben komopo fu a foto Cuzco, kon drape, èn a kari den sma fu a foto kon na wán. A priester warskow den sma taki efu Yehovah Kotoigi ben e kon tan na den mindri, dan den ben o kisi takru siki di kan kiri sma, èn furu snew ben o fadon di ben o kiri den kaw fu den, èn di ben o pori ala den sani di den prani.

A „profeititori” disi ben abi krakti tapu furu fu den sma, èn moro leki wan afu yari langa, nowan sma na ini foto ben wani studeri Bijbel nanga Santiago nanga Lourdes. Wan heihei man fu a foto di nen Miguel, na ondro-komsarsi, lon baka Santiago nanga Lourdes na strati, èn a trowe ston na den tapu. Ma Santiago nanga Lourdes ala ten tan tyari densrefi soleki fa a fiti wan Kresten.

Bakaten sonwan fu den sma fu a foto teki wan bijbelstudie. Srefi Miguel kenki a fasi fa a ben e denki. Fu di a bigin studeri Bijbel nanga Santiago, meki a tapu fu dringi sopi pasa marki, èn a kon tron wan sma di lobi vrede. Te fu kaba a wefi fu Miguel, èn den tu umapikin fu den teki a waarheid fu Bijbel.

Tide na a dei, wan gemeente fu Yehovah Kotoigi de na ini a foto disi, èn a gemeente disi e gro moi. Miguel breiti taki furu fu den ston di a ben trowe na tapu Santiago nanga Lourdes no kisi den, èn a breiti taki a trowpaar disi gi wan moi eksempre leki sma di lobi vrede.

[Prenki na tapu bladzijde 32]

Fu di Santiago nanga Lourdes (na tapusei) ben sori fu de sma di lobi vrede, meki Miguel (na reti-anusei) kenki a fasi fa a ben e denki