Meki a denki di yu e denki dipi fu sani tron wan prisiri gi yu

SON sma feni taki a hebi srefisrefi fu denki dipi fu sani. A kan taki den e si disi leki wan muilek wroko, èn den feni taki a e aksi tumusi furu fu den. A kan tu taki den sma disi e firi syen taki den no e denki dipi fu sani, spesrutu te den e leisi o prenspari a de (Filipisma 4:8). Ma a musu de wan prisiri sani fu sidon prakseri dipi fu den tru tori di wi leri fu Yehovah, den moi fasi di a abi, den tumusi moi sani di a du, den markitiki fu en, èn den tumusi moi prakseri fu en. Fu san ede?

Yehovah Gado na a Moro Hei Tiriman fu hemel nanga grontapu, èn a e wroko tranga fu meki taki den moi prakseri fu en e kon tru (Yohanes 5:17). Aladi a e wroko tranga, toku a e broko en ede nanga den prakseri fu ibri anbegiman fu en. A psalm skrifiman ben sabi disi èn nanga yepi fu a yeye fu Gado a ben skrifi: „O Yehovah, yu ondrosuku mi finifini, èn yu sabi mi. Yusrefi kon sabi te mi e sidon èn te mi e opo. Yu si san mi e prakseri fu farawe kaba.”—Psalm 139:1, 2.

Na a fosi presi, wan sma kan si den wortu fu a psalm skrifiman leki wortu di e meki sma lasi-ati. A sma e taki kande: ’Aladi Gado de „farawe”, toku a e si ibri takru denki di e kon na mi ede’. A no de fu taki, dati na wan bun sani te wi sabi dati. Disi kan yepi wi fu feti teige takru denki, èn te wi abi den sortu denki disi, dan wi musu fruteri Gado fu dati, èn wi musu abi na overtoigi taki a sa gi wi pardon te wi e poti bribi na ini a frulusu-ofrandi fu Yesus (1 Yohanes 1:8, 9; 2:1, 2). Ma na a srefi ten, wi musu hori na prakseri taki Yehovah e ondrosuku den anbegiman fu en fu si den bun sani fu den. A e poti prakseri na wi te wi e denki fu en nanga tangi na ati.

Kande yu e aksi yusrefi: „A de so trutru taki Yehovah e poti prakseri na ala den bun denki di den milyunmilyun anbegiman fu en abi?” A e du dati trutru. Yesus ben sori krin taki Yehovah wani sabi fa sani e go nanga wi, fu di a ben taki dati Yehovah e luku den pikin fowru srefi, èn a taki: „Un warti moro leki furu pikin fowru” (Lukas 12:6, 7). Pikin fowru no man prakseri fu Yehovah. Sobun, efu a e luku den, dan o moro a sa luku wi, èn feni en wan prisiri te ibriwan fu wi e prakseri en! Iya, neleki David, wi kan begi nanga ala frutrow: „Meki den . . . dipi prakseri fu mi ati kon de wan prisiri na yu fesi, O Yehovah, mi Klepston èn mi Frulusuman.”—Psalm 19:14.

Na ini den wortu di a profeiti Maleaki skrifi nanga yepi fu a yeye fu Gado, wi e feni moro buweisi taki Yehovah e broko en ede trutru nanga den dipi prakseri fu den loyaal anbegiman fu en. A ben taki na fesi san ben o pasa na ini a ten fu wi: „Na a ten dati den sma di ben frede Yehovah ben taki nanga makandra, ibriwan fu den nanga en kompe, èn Yehovah tan poti prakseri na den èn a tan arki den. Èn den bigin skrifi wan buku na en fesi fu memre den wan di ben frede Yehovah èn fu memre den wan di ben e prakseri en nen” (Maleaki 3:16). Te wi tan hori na prakseri taki Yehovah e „tan poti prakseri” na wi te wi e denki fu en, dan a sa gi wi prisiri te wi e denki dipi fu en. Fu dati ede, meki wi agri nanga den wortu fu a psalm skrifiman di ben skrifi: „Fu tru, mi sa denki dipi fu ala yu wroko, mi sa prakseri furu fu den sani di yu e du.”—Psalm 77:12.