Suma na ini a ten disi e hori densrefi na den leri fu Krestes?

NA ALA sei fu grontapu, sma e si Yesus Krestes leki wan fu den moro prenspari man di oiti libi. Furu sma e feni taki en na a moro prenspari man. Pikinmoro tu dusun yari langa, den leri fu en abi bun furu krakti tapu a libi fu sma, iya, tapu a libi fu „mofinasma di abi bunfasi nanga switifasi, èn tapu a libi fu kefalek gudusma di lobi fu du bun gi trawan”, na so na Ingrisi skrifiman Melvyn Bragg skrifi.

Fa sma e si a Kresten bribi?

Fa sma e si a Kresten bribi? Wan buku e taki dati a de „wán fu den moro prenspari sani di meki taki a libisma famiri go na fesi na ini a dini di den e dini Gado”. David Kelso fu Glasgow Kaledonia Universiteit na ini Skotland, ben tyari kon na krin fa en e si a Kresten bribi. A ben skrifi: „Na ini den tu dusun yari fu a historia fu a Kresten bribi, dan noiti ete na fesi sma meki so moi sani, so koni bow-wroko, noiti ete na fesi den kon sabi so furu sani, èn den go na fesi moro leki oiti bifo na ini a fasi fa den e meki poku èn na ini den sani di den e du gi a libimakandra.”

Ma furu tra sma abi wan tra denki fu a Kresten bribi. Den no abi wan problema nanga a Kresten bribi srefi, di soleki fa wan wortubuku e sori, wani taki: „Wan bribi di seti akruderi den leri fu Yesus Krestes, èn pe sma abi na overtoigi taki en ben de a manpikin fu Gado” (Collins Cobuild wortubuku). Na presi fu dati, den sma disi e tegu gi a fasi fa sma na ini den kerki organisâsi di e taki dati den abi a Kresten bribi, e tyari densrefi.

Fu eksempre, a Doisri filosofiaman Friedrich Nietzsche fu a di fu 19 yarihondro, ben agri nanga den sma dati, èn a taki dati a Kresten bribi na „a moro bigi fowtu di libisma meki oiti”. Soleki fa a skrifi, dan a Kresten bribi „na a moro bigi fluku, a moro bigi krukafasi di de,  . . . èn sma fu a Kresten bribi no abi trobi fu du iniwan sani fu doro a marki fu den, awansi den abi fu du ogri nanga trawan, awansi den abi fu bedrigi trawan, awansi den abi fu du sani na wan kibri fasi, noso na wan syen fasi.” A tru taki Nietzsche ben e denki tumusi takru fu a bribi disi, ma wan tu tra sma di ondrosuku sani nanga wan krin denki, ben kon si a bribi disi na wan srefi sortu fasi. Fu san ede? Fu di na ini den hondrohondro yari di pasa, den sma di e taki dati den na Kresten, no tyari densrefi soleki fa Yesus Krestes ben e tyari ensrefi. Na presi fu dati, a de fu si na ala sei taki den „e tyari densrefi na wan fasi di no fiti kwetikweti, den e du tumusi ogri-ati sani, èn den no abi lespeki gi Gado kwetikweti”.

Krestes e horibaka gi den wan di e taki dati den na Kresten?

Fu dati ede, yu abi leti fu aksi yusrefi: „Krestes e horibaka ete gi den wan di e taki dati den na Kresten?” Son sma o taki wantewante: „Iya, a e du dati trutru!” „A ben pramisi den bakaman fu en taki a o de nanga den ’te na a kaba fu a grontapu’, a no so?” (Mateyus 28:20) Iya, Yesus ben taki dati trutru. Ma den wortu disi ben wani taki dati a ben o de nanga ibriwan sma di e taki dati a de wan bakaman fu en, awansi fa a sma dati e tyari ensrefi?

Hori na prakseri taki sonwan fu den kerki fesiman na ini a ten fu Yesus ben feni taki Gado ben e horibaka gi den, awansi den no ben e du san Gado aksi fu den. Fu di Gado ben teki Israel fu tyari wan spesrutu frantwortu, meki son kerki fesiman ben e denki taki noiti Gado ben o gowe libi den, awansi san den ben du (Mika 3:11). Ma te fu kaba, den go tumusi fara, fu di den weigri fu hori densrefi na den wet nanga gronprakseri fu Gado. Leki bakapisi fu dati, Yesus Krestes taigi den krin: „Luku! Gado o gowe libi un oso gi unu” (Mateyus 23:38). Iya, Gado no ben feni a bribi dati bun moro srefisrefi. Dati meki a weigri fu teki na anbegi fu den sma dati, èn a meki a legre fu Rome pori a mamafoto, Yerusalem, nanga a tempel fu en na ini 70 G.T.

A sani disi kan pasa tu nanga a Kresten bribi? Meki wi go luku sortu markitiki Yesus wani sma fu doro efu den wani kisi wini fu a pramisi fu en di e taki dati a sa de nanga den bakaman fu en te „na a kaba fu a grontapu”.

[Prenki na tapu bladzijde 2, 3]

Den leri fu Yesus Krestes abi bun furu krakti tapu milyunmilyun sma na heri grontapu