A bribi fu en e gi trawan deki-ati
DI Silvia gebore na ini december 1992, a ben gersi leki a ben de wan heri gosontu yongu meisje. Ma di Silvia ben abi tu yari, datra kon si taki a abi cystic fibrosis, wan siki di no abi dresi. Wan sma di abi a siki disi, no man bro bun srefisrefi èn a abi problema nanga en bere. Silvia musu dringi 36 perki ibri dei, a musu spoiti dresi na ini en noso, èn datra musu yepi en fu bro moro bun. Fu di en fokofoko no e wroko bun srefisrefi, meki a musu abi wan wrokosani na en di e yepi en fu bro moro bun, srefi te a e go na wan presi.
Teresa, en mama, e taki: „A e naki mi ati fu si fa Silvia e horidoro aladi a abi a siki disi. Fu di a abi sabi fu Bijbel, meki a abi wan tranga bribi. A bribi disi e yepi en fu no sari tumusi, èn a e yepi en fu libi nanga a siki disi. Ala ten a e hori na prakseri taki Yehovah pramisi wan nyun grontapu pe ala sikisma sa kon betre” (Openbaring 21:4). Son leisi te en famiri e firi brokosaka, dan den e kisi deki-ati te den e si fa Silvia e tan prisiri. A e taigi en papa, en mama, nanga en brada: „Te wi e libi na ini a nyun grontapu, dan wi sa frigiti ala a pina di e miti wi na ini a ten disi.”
Silvia gwenti fu fruteri sma a bun nyunsu fu Gado Wortu, èn den sma dati kan si na en fesi taki a de koloku èn taki a e prisiri. Silvia e go na wan Kresten gemeente na ini den Kanari-èilanti, èn den memre fu a gemeente dati lobi fu arki den piki di a e gi, èn den lobi fu si fa a e teki prati na den konmakandra. Baka ibri konmakandra, Silvia no e gowe wantewante, fu di a wani taki nanga den Kresten brada nanga sisa fu en. Fu di a lobi fu taki nanga trawan èn fu di a de nanga prisiri ala ten, meki ala sma na ini a gemeente kon lobi en.
En papa, Antonio e taki: „Silvia e leri wi wan tumusi prenspari sani. Awansi wi abi problema, toku a libi na wan presenti fu Gado, èn wi musu warderi dati.” Neleki Silvia, ala den futuboi fu Gado, yonguwan nanga owruwan, no man wakti teleki a ten doro te „nowan sma di e libi drape [na ini a nyun grontapu] sa taki: ’Mi siki.’”—Yesaya 33:24.
[Prenki na tapu bladzijde 31]
Silvia e leisi wan bijbeltekst aladi en mama e hori a wrokosani di e yepi Silvia fu bro moro bun