A kisi wan heri tra denki di sma kon luku en

„MI NO ben man wakti fu fruteri mi famiri fu den tu ’engel’ di Gado ben seni kon na mi.” Na so wan man ben skrifi di tu yongu uma ben kon luku en. Den tu yongu uma disi ben de Yehovah Kotoigi. Wan tu wiki na fesi, a man disi en wefi di ben abi 45 yari, dede. A man ben brokosaka srefisrefi. A ben kisi trowstu fu den bigi pikin fu en, ma den ben e libi farawe. Nowan mati èn nowan birtisma ben kon luku en.

„Mi nanga Gado no e taki”, na so a man ben taigi den yongu uma di ben kon luku en. Fu di den uma ben e hori den firi fu a man disi na prakseri, meki den libi wan traktaat gi en di e taki fu Bijbel, èn a traktaat disi nen Sortu Howpu De gi Lobiwan Di Dede? A man leisi a traktaat a mofoneti dati, èn a feni trowstu.

Wan syatu pisi ten baka dati, den tu Kotoigi kon luku en baka. Fu di a man ben sari so di den ben go na en a fosi leisi, meki den go luku fa a e go nanga en. A man ben skrifi bakaten: „Mi no ben man bribi taki tu sma di mi no ben sabi kwetikweti ben e broko den ede nanga mi, èn taki den ben wani sabi fa a e go nanga mi.” Den sani di den ben fruteri en fu Bijbel, ben gi en deki-ati. Den uma ben taigi en taki den ben o kon luku en baka. A man ben breiti srefisrefi, èn fu dati ede a skrifi wan brifi di a seni go na a Kownukondre zaal fu Yehovah Kotoigi drape. A brifi dati ben taki fu den sani di skrifi na a bigin fu na artikel disi.

Fosi a man froisi go na wan presi di de moro krosibei fu den pikin fu en, a go na wan konmakandra fu Yehovah Kotoigi, èn a nyan makandra nanga a famiri fu wán fu den yongu uma. A ben skrifi: „Mi e froisi fu a kontren disi, ma mi no sa frigiti den yongu uma dati, èn mi sa tan begi gi den èn gi a kerki fu unu. Iya, mi e begi now, èn yu no sa wani bribi taki mi e begi furu srefi. Mi kisi wan heri tra denki. Den yongu sma dati yepi mi trutru, èn ala ten mi sa de nanga tangi gi san den du gi mi.”