Yehovah Kotoigi e feni yeye gudu na ini Ginea
FURU hondro yari langa, sma du ala san den man fu feni gudu, awansi den ben kan lasi den libi noso kisi mankeri. Deki-ati sma di ben doro na ini Ginea, na a Westsei fu Afrika, feni tu difrenti sortu gudu, namku trutru gudu nanga yeye gudu. Moro leki neigi milyun sma e libi na ini Ginea, èn a kondre disi lai nanga dyamanti, gowtu, isri, èn nanga bauxiet di bun nofo fu sma meki alumunium fu en.
Aladi den kerki fu Krestenhèit no de den moro prenspariwan na ini a kondre, toku anbegi na wan prenspari sani gi den sma drape, èn furu fu den abi warderi gi yeye gudu. San na den gudu disi? Dati na den getrow futuboi fu Yehovah, di Hagai 2:7 e kari „den warti sani fu ala den pipel”.
Yeye gudu
Sma di e suku gudu, musu meki tranga muiti fu diki dipi na ini a gron. Na so sma musu meki tranga muiti tu na ini a Kresten diniwroko fu feni yeye gudu. A Kownukondre preikiwroko na ini Ginea bigin na ini den yari baka 1950, na den farawe presi fu a kondre, èn na ini den yari baka 1960 a bigin na ini a mamafoto, Conakry. Now sowan 900 Yehovah Kotoigi de na ini 21 gemeente nanga grupu na ini a heri kondre.
Na ini 1987, wan tu zendeling doro na ini a kondre, èn den wroko makandra nanga a wan-enkri gemeente di ben de na ini Conakry. Now moro leki 20 zendeling de na ini a mamafoto, èn na den farawe presi fu a kondre. Den e wroko fayafaya fu gi den gemeente deki-ati, èn fu teki prati na a preikiwroko makandra nanga den brada nanga sisa fu a kondre.
Luc, di e libi na ini Conakry, kisi furu prisiri di a ben e studeri Bijbel nanga Albert, wan yongu datra. Fu di Albert ben wani feni a tru anbegi, meki a ben e go na difrenti kerki, èn a ben e du afkodrei. Wan bonuman ben gi en wan linga, èn a ben e weri a linga disi na en finga. A bonuman ben gi en a dyaranti taki a linga ben o meki sani waka bun gi en. Fu di Albert ben sari taki a no ben man feni a tru bribi, meki a trowe a linga gowe èn a begi: „Gado, efu yu de trutru, dan meki mi kon sabi yu so taki mi kan dini yu. Bika efu dati no pasa, dan mi o libi soleki fa misrefi wani.” Syatu baka dati, Albert ben de na en sisa oso, èn a yere fa wan Yehovah Kotoigi ben e studeri Bijbel nanga en sisa pikin. A no teki langa di den Kotoigi seti sani so taki Luc ben kan studeri Bijbel nanga en.
Ibri wiki Luc ben e prisiri fu waka moro leki 10 kilometer go-kon fu studeri nanga Albert. Aladi Luc no ben kisi furu skoroleri, toku Albert, di studeri na universiteit, ben fruwondru srefisrefi fu si a tranga bribi di Luc ben abi na ini Bijbel, èn fa a ben e fiti den sani disi na ini en libi. Albert ben prisiri srefisrefi fu kon sabi taki a no Gado e meki libisma pina, ma taki Yehovah abi na prakseri fu tyari wan kaba kon na ala den problema fu libisma, èn taki a o meki a grontapu disi tron wan paradijs (Psalm 37:9-11). A naki Albert ati di a kon frustan den tru tori fu Bijbel èn di a si a bun fasi fa den memre fu a gemeente e tyari densrefi.
Neleki fa wan koni wrokoman musu teki ten fu koti den grofu pisi puru fu wan dyamanti so taki a kan brenki, na so Albert ben musu puru furu grontapu denki na en ede, so taki a ben kan libi akruderi den regtfardiki markitiki fu Gado. A no go suku rai moro na den bonuman, a tapu fu dringi sopi pasa marki, èn a no dòbel moro. Ma a ben muilek srefisrefi gi Albert fu tapu nanga smoko. Te fu kaba, a begi Yehovah fayafaya fu yepi en, èn na a sani dati yepi en. Siksi mun baka dati, a trow akruderi lantiwet. A wefi fu en bigin studeri Bijbel. Now den ala tu na dopu futuboi fu Yehovah.
Martin na wan tra sma di de leki wan yeye dyamanti. Di a ben abi 15 yari, a bigin studeri Bijbel na ini Guéckédou. En papa nanga mama di de Lomsusma, gens en fu go na den konmakandra fu Yehovah Kotoigi. Den pori den Bijbel publikâsi fu Martin, den fon en, èn den yagi en komoto na ini na oso. Neleki fa koolstof e kon tron wan dyamanti te a kisi bun hebi druk, na so Martin kon kisi tranga lobi gi a waarheid fu Bijbel di a ben e kisi gens. Baka wan pisi ten, en papa nanga mama kenki a fasi fu den, èn Martin drai go baka na oso. San meki taki en papa nanga mama kenki? Den ben si taki Martin ben e tyari ensrefi heri tra fasi leki den tra brada nanga sisa fu en di ben e opo densrefi teige den papa nanga mama, èn den ben e du hurudu. Fu di en papa ben abi na overtoigi taki a nyun bribi fu Martin ben e tyari wini kon gi Martin, meki a gi pasi taki den memre fu a gemeente kon na en oso. Martin en mama taki den brada tangi furu leisi gi ala den sani di den du fu yepi a boi fu en. Martin teki dopu di a ben abi 18 yari, baka dati a go na a Dinariskoro, èn now a e dini leki spesrutu pionier.
Yeye gudu fu tra kondre
Aladi Ginea e seri furu fu den gudu fu en gi tra kondre, toku sonwan fu den yeye gudu fu a kondre disi komoto fu tra kondre. Furu sma fu tra Afrikan kondre kon libi na ini Ginea, èn furu tron den du disi fu di den wani abi wan moro bun libi. Tra sma baka kon libi na ini Ginea fu di den sma e feti furu yari kaba na ini a kondre pe den ben e libi.
Twarfu yari pasa, Ernestine gowe libi Kamerun fu kon libi na ini Ginea. Aladi a ben e studeri nanga Yehovah Kotoigi, èn a ben e go na den konmakandra furu yari langa, toku a no teki dopu. A krei di a si fa sma ben e teki dopu na a kring konmakandra fu Yehovah Kotoigi na ini 2003. Fu di a ben e sari, meki a begi Yehovah: „Mi abi 51 yari now, èn mi no du noti gi yu. Mi wani dini yu.” Baka dati, Ernestine du san ben de fanowdu fu man dini Yehovah, soleki fa a ben taki na ini a begi fu en. A taigi a man di ben e libi nanga en, taki efu a ben wani den fu tan makandra, dan den ben musu trow. A man ben feni dati bun, èn bakaten Ernestine krei fu prisiri di ensrefi dopu na ini november 2004.
Syatu baka 1990, dusundusun loweman fu Liberia nanga Sièra Leon, kon libi na ini Ginea, èn hondrohondro fu den loweman disi ben de futuboi fu Yehovah. Te den ben doro na ini den loweman kampu, dan wantewante den brada ben e seti sani fu hori konmakandra, fu go na ini a preikiwroko, èn fu bow wan Kownukondre zaal. Son sma e tron futuboi fu Yehovah na ini a loweman kampu. Isaac na wan fu den sma disi. Baka di a teki dopu, a kisi na okasi fu go wroko baka na wan bigi bedrijf na ini Liberia. A no go, ma na presi fu dati, a tan na ini a loweman kampu fu Lainé, èn a dini drape leki gewoon pionier. A e taki: „Now, mi no abi fu aksi wan basi primisi fu go na zaal noso na wan bigi konmakandra. Nowan sma e tapu mi fu dini Yehovah.” Sowan 30.000 loweman ben e libi na ini a loweman kampu disi di ben de farawe, èn na ini december 2003, den brada hori wan distrikt kongres gi den 150 Kotoigi di ben e libi drape. A ben moi fu si taki 591 sma ben kon na a kongres disi, èn sosrefi 9 dofusma ben man nyan bun fu a programa na ini Dofusma-tongo. Twarfu sma teki dopu. Den Kotoigi ben abi bigi warderi gi a muiti di den brada ben meki fu sreka wan yeye fesa-nyanyan gi den.
Den „warti sani” e tyari prenspari kenki kon
Te sma e suku gowtu noso dyamanti, dan noti no kan tapu den fu feni den sani disi. A e gi deki-ati fu si fa nyun sma e meki muiti fu pasa ala tesi, soso fu man dini Yehovah. Luku a tori fu Zainab.
Di Zainab ben abi 13 yari, dan sma dwengi en fu wroko leki srafu gi den. Den teki a meisje disi puru na ini wan tra kondre na a westsei fu Afrika, èn den tyari en go na Ginea. Di a ben abi 20 yari, dan a kon yere a boskopu fu Bijbel. A ben de fayafaya fu fiti den sani di a ben e leri.
A ben muilek gi Zainab fu go na den konmakandra fu anbegi Gado. Ma Zainab ben abi bigi warderi gi den konmakandra, èn a ben abi a fasti bosroiti fu no misi nowan fu den (Hebrewsma 10:24, 25). A ben gwenti fu kibri den buku fu en na dorosei fu na oso, so taki a ben o man teki den te a ben e go na den konmakandra. Difrenti leisi den sma di a ben e wroko gi den, fon en na wan ogri-ati fasi fu di a ben go na den konmakandra disi.
Bakaten, a situwâsi fu Zainab kon kenki, èn a no ben abi fu wroko moro leki srafu. Wantewante a bigin go na ala den konmakandra, èn dati yepi en trutru fu go na fesi na yeye fasi. A weigri fu teki wan wroko di e pai bun, fu di a no ben o man go na den konmakandra fu kisi leri fa fu tyari ensrefi leki wan Kresten. A bigin hori lezing na a Theokrasia Diniwroko-skoro, a tron wan Kownukondre preikiman di no dopu ete, èn bakaten a teki dopu na ini watra fu sori taki a gi en libi abra na Yehovah. Syatu baka dati, a go dini leki yepipionier. Siksi mun baka dati, a gi en nen fu dini leki wan gewoon pionier.
Baka di wan sma di ben wani sabi moro fu Bijbel, ben go wan tu leisi na den konmakandra, dan a taki: „Te mi de na den konmakandra disi, dan mi no e firi taki mi pôti.” Aladi furu sma e suku nomo fu feni den trutru gudu fu Ginea, toku den wan di lobi Yehovah e suku yeye gudu fayafaya. Iya, na ini a ten disi „den warti sani fu ala den pipel” e kon na ini a soifri anbegi fu Yehovah!
[Faki na tapu bladzijde 8]
GINEA - 2005
Heimarki fu Kotoigi: 883
Bijbelstudie: 1710
Sma di kon na a Memrefesa: 3255
[Karta na tapu bladzijde 8]
(Efu yu wani si pe den sani disi skrifi, luku a tijdschrift)
GINEA
Conakry
SIÈRA LEON
LIBERIA
[Prenki na tapu bladzijde 9]
Albert nanga Luc
[Prenki na tapu bladzijde 9]
Wan Kownukondre zaal na ini Conakry
[Prenki na tapu bladzijde 10]
Ernestine
[Prenki na tapu bladzijde 10]
Martin
[Prenki na tapu bladzijde 10]
Zainab
[Sma di abi a reti fu a karta na tapu bladzijde 8]
USAID