Yehovah Kotoigi e meki a bun nyunsu bekènti na ini a moi kondre Haiti

HAITI nanga a Dominikan Republiek de na tapu a waran èilanti Hispaniola, èn fu ala den Karibis èilanti na èilanti disi abi den moro hei bergi. Wan tu fu den bergi hei moro leki 2400 meter. Na ini den mun te a moro kowru, dan son leisi a watra na ini den watra-olo di de na den hei pisi fu a kondre, e bigin tron ijs.

Na a zuidsei fu Haiti furu bon e gro na tapu den bergi èn na tapu den lagipresi. Na tra presi fu Haiti, yu abi furu kalikali bergi, èn disi e kon fu di sma koti ala den bon drape. Te yu e go na a noordsei noso na a zuidsei, dan yu o si taki Haiti na wan moi kondre trutru. Te yu e waka na sonwan fu den smara pasi di e meki boktu na tapu den bergi, dan yu o si difrenti moi pisi fu a kondre èn fu a se. Na ala sei yu o si furu difrenti bromki di abi tumusi moi kloru.

Furu fu den 8,3 milyun sma na ini a moi kondre disi e libi na den boitipresi, èn den afo fu den sma disi komoto fu Afrika. Aladi furu fu den sma disi pôti, toku den abi switifasi. Sowan 60 yari kaba, Yehovah Kotoigi e prisiri fu fruteri den Haitisma a bun nyunsu fu Gado Kownukondre, èn den kisi wan switikon fu den sma dati.—Mateyus 24:14.

Den e preiki na den boitipresi

Na ondrofeni di wan zendeling ben abi di a go na wan fu den boitipresi fu a fosi leisi, e sori krin fa den Haitisma de. A sisa disi ben skrifi:

„Wan dei na ini maart 2003, wi go preiki na ini wan pikin foto Casale. Fu man doro drape wi ben musu rèi sowan afu yuru komoto fu a foto Cabaret pe a zendeling-oso fu wi de, èn di de 30 kilometer na noordsei fu a mamafoto Port-au-Prince. A lasti leisi di Kotoigi preiki na ini Casale, ben de na ini a yari 1999, èn fu dati ede wi ben de fayafaya fu go preiki drape. Wi komoto na Cabaret seibi yuru mamanten. Wi go nanga tu pikin bus, èn ala nanga ala wi ben de nanga 22 sma. Dati na pikinmoro a heri gemeente fu wi. Di wi ben e rèi na tapu den santi pasi di e kren go na tapu den bergi, dan ala sma ben e taki èn ben e lafu fu di wi ben e prisiri. Te fu kaba wi doro na wan lagipresi pe furu bigi bon de. Na dyaso a foto Casale de, èn wan liba e lon pasa na mindri a foto disi.

A foto disi pe dyugudyugu no e pasa, de sensi a pisi ten syatu baka a yari 1800. Na a ten dati, Pôlsu srudati ben kon na Haiti fu yepi sma di ben de srafu fosi, fu kisi srefidensi. Den srudati disi teki wefi di ben de Haitisma, èn den go libi na a lagipresi disi pe a gron fatu. Leki bakapisi fu dati, yu kan feni moi moksi sma drape. A moi fu si taki na a boitipresi disi yu abi weti sma, lekti kloru sma, sma di abi wan broin kloru, sma di abi grun ai, broin ai, èn sosrefi tra sortu sma.

A sma na a fosi doro pe wi naki, no ben wani arki. Di wi drai gowe, dan wan man waka kon miti wi na tapu a pasi. A ben wani sabi efu wi e bribi taki Yesus nanga Gado no de a srefi. Wi aksi en fu go teki en Bijbel, èn wi gebroiki a Bijbel fu overtoigi en taki Yesus na a Manpikin fu Gado èn taki Yehovah na „a wan-enkri tru Gado” (Yohanes 17:3). Furu sma kari wi fu kon sidon taki nanga den. Sonwan fu den ben aksi: ’O ten yu o kon baka fu studeri Bijbel nanga wi?’

Na brekten, wi feni wan moi presi na ondro a kowrupe fu den bon, èn wi seti sani fu nyan drape. Tu sisa ben bori wan bigi patu nanga fisi. A nyanyan ben switi srefisrefi! Wi sidon drape e nyan èn e taki tori, èn wi preiki tu gi den sma di ben e pasa. Baka dati, wi abra a liba fu go na a tra sei fu a foto. Wi ben prisiri fu taki nanga den sma disi di ben abi switifasi èn di ben gwenti sidon na ondro den bon krosibei fu a pikin oso fu den. Wi ben lobi fu yere fa den pikin ben e prei, fa den umasma ben e wasi krosi na liba, èn fa den bigisma ben e miri kofi!

Fosi yu denki a ben de fo yuru, èn a grupu fu wi di ben e prisiri, drai go baka na den pikin bus fu go baka na Cabaret. Mi nanga mi masra prisiri trutru a fosi leisi di wi go na Casale, pe sma e libi di abi switifasi.”

Sensi 1945, di den fosi zendeling doro na ini Haiti, a nomru fu Kownukondre preikiman kren doronomo, èn now yu abi sowan 14.000 preikiman di e hori moro leki 22.000 oso-bijbelstudie. A wroko di den preikiman du ben abi krakti tapu den 59.372 sma di ben kon na a Memrefesa na ini maart 2005, èn den tan preiki a bun nyunsu fu Gado Kownukondre na ala sei. Poti prakseri na den difrenti fasi fa a wroko fu Yehovah Kotoigi abi krakti tapu sma.

A bun nyunsu de fu si na ini moimoi sani

Furu Haitisma lobi sani di abi moi kloru. Yu kan si disi na den krosi di den e weri, na a oso fu den, na den difrenti bromki na ini den dyari, èn na den moimoi sani di den e meki. Den Haitisma gwenti fu meki skedrei di sma sabi leki L’Art Haitien. Den skedrei disi meki nanga difrenti moi kloru, èn na ala sei fu a foto Port-au-Prince yu kan si sma e seri furu fu den skedrei disi na strati. Sma fu difrenti kondre e kon bai den skedrei disi.

Den difrenti moi kloru no de fu si na tapu skedrei wawan. Na ini den strati fu Port-au-Prince yu abi furu bus noso truck di rèi taxi, èn difrenti moi prenki ferfi na tapu den sortu taxi disi di sma e kari camionette, noso tap-tap. Nofo tron den prenki disi abi fu du nanga Bijbel tori.

Te yu ben o waka na tapu strati, dan a kan pasa taki wantronso yu e si prenki di yu sabi, soleki wan prenki fu Adam nanga Eva na ini Eden. Iya, yu kan si den prenki disi na tapu a bakasei fensre fu wan camionette di rèi pasa. Nofo tron yu kan si a nen fu Yehovah na ini bijbeltekst noso tra sani di sma e skrifi na tapu den wagi disi, noso leki wan pisi fu a nen fu wenkri.

Den e preiki a bun nyunsu na skoro

Yongu Kotoigi na ini Haiti e kisi moi okasi fu yepi den tra pikin na skoro fu kon sabi moro fu Bijbel. Wan eksempre fu dati na den sani di wan yongu sisa fu 17 yari ben skrifi.

„Wan boi fu mi klas kon na mi wan dei, èn a aksi mi san na ’hurudu’. Fu di mi ben denki taki a ben e suku mi, meki mi no piki en. Ma di a aksi wan tra boi na ini a klas a srefi sani disi, dan a heri klas ben wani sabi moro fu a tori. Sobun mi leisi moro fu a tori, èn a wiki baka dati mi fruteri a klas san na hurudu, èn mi meki den kon sabi fu san ede Yehovah Kotoigi e meki muiti fu tyari densrefi na wan krin fasi, fu tan abi wan bun banti nanga Gado, èn fu de krin na skin fasi.

Den pikin fu a klas poti furu aksi èn den agri nanga den piki di mi gi den nanga yepi fu Bijbel. Srefi a driktoro fu a skoro, di ben e tweifri fosi fu kon na ini a tori, poti furu aksi èn a seti sani so taki mi ben kan taki fu a tori disi na ini tra klas. Mi sori den pikin a buku Wat jonge mensen vragen — Praktische antwoorden,a èn furu fu den ben wani a buku. A tra dei fu en, mi prati 45 buku gi den pikin na skoro. Fosi yu denki, wan lo fu den kaba leisi a buku, èn now wan tu fu den e studeri Bijbel nanga Kotoigi di e libi na ini a birti fu den. Wan fu den pikin fu a skoro di e libi na ini a birti fu mi, e kon na ala den konmakandra now.”

Den e gebroiki a Haiti Kriorotongo

A pipel fu Haiti nanga a kondre srefi e hari sma prakseri, èn na so a de tu nanga a Haiti Kriorotongo. A tongo disi abi Fransi wortu na ini, èn den e taki en soleki fa sma fu West Afrika e taki. A Haiti Kriorotongo na a mamatongo fu den Haitisma, iya, a tongo di den e frustan bun. Yehovah Kotoigi na ini Haiti e preiki moro furu na ini a tongo disi, èn den seti sani fu meki moro Bijbel publikâsi na ini a Haiti Kriorotongo.

Na ini 1987 a brochure Njan Boen Foe Tégo Foe A Libi Na Grontapoe! poti abra na ini a Haiti Kriorotongo, ne a buku Sabi di e tjari joe go na têgo libi, èn baka dati a brochure San Gado e aksi foe wi? Den publikâsi disi na wan bigi yepi gi nyun bijbelstudenti di wani kon sabi den moro prenspari sani fu Gado Wortu. Sensi 1 september 2002, A Waktitoren e kon na doro sosrefi na ini a Haiti Kriorotongo. Te now ete den Kotoigi e gebroiki publikâsi na ini Fransitongo, ma furu sma lobi fu leisi den publikâsi na ini den eigi tongo.

Den e preiki a bun nyunsu gi sma na strafu-oso

No so langa pasa, Yehovah Kotoigi bigin preiki a bun nyunsu gi mansma nanga umasma di de na strafu-oso. Den Kotoigi di e preiki drape, e prisiri fu tyari a boskopu disi di e trowstu sma, gi den wan di de na ini a tumusi sari situwâsi disi, fu di a boskopu sa trowstu den. Wan brada skrifi disi:

„A fosi leisi di wi go preiki na wan fu den strafu-oso, sma tyari den strafuman go na ini wan bigi kamra, so taki wi ben kan miti den. Wi aksi wisrefi fa den strafuman ben o feni disi. Di wi fruteri den taki wi ben kon fu yepi den frustan Bijbel moro bun, dan ala 50 strafuman ben breiti taki wi kon. Wi gi den a brochure Du Muiti fu Leisi èn fu Skrifi èn a brochure Njan Boen Foe Tégo Foe A Libi Na Grontapoe! na ini Haiti Kriorotongo, èn wi bigin studeri Bijbel nanga 26 fu den. Tin fu den strafuman di ben de drape no ben man leisi noso skrifi, ma den ben wani sabi moro di wi sori den fa den prenki na ini den brochure kan yepi den fu frustan den wortu di skrifi na ini.”

Di den Kotoigi drai go baka na a strafu-oso, dan wan man taki: „Mi leisi a brochure furu leisi kaba. Doronomo mi e denki fu den sani di skrifi na ini, èn mi trutru ben wani taki unu kon baka.” Wan man, di skowtu ben sroto fu di a ròs sma nanga gon, ben taki dati a wani kenki en libi, èn a aksi den Kotoigi efu wan sma kan go studeri Bijbel nanga a wefi fu en. Wan tra strafuman di abi tu pikin ben aksi tu taki sma go studeri nanga a wefi fu en, fu di a ben wani en fu kon si san na a difrenti na mindri a tru anbegi nanga falsi anbegi. Wan Protestant domri di ben de na strafu fu di a ben nyan bun furu moni fu den sma fu en kerki, ben taki dati a ben feni a tru bribi now, èn a taki dati te a komoto na strafu a o yepi den memre fu en kerki fu tron Yehovah Kotoigi.

Wan tra strafuman, di no ben abi wan San Gado e aksi-brochure na ini Haiti Kriorotongo, skrifi ala sani abra fu a brochure fu wan tra man di ben de na ini a srefi strafuman kamra leki en, èn a leri ala den sani dati na ede. Wan uma di ben de na strafu, bigin fruteri neigi tra uma di ben de na ini a srefi strafuman kamra leki en fu den sani di a ben e leri, èn a studeri srefi nanga den. Wan strafuman di ben kaba studeri a San Gado e aksi-brochure, èn di ben studeri moro fara na ini a Sabi-buku, bigin preiki gi tra strafuman. A no teki langa di a bigin studeri Bijbel nanga fo tra strafuman.

Merconyb ben e studeri Bijbel fosi, èn a abi famiriman di de Yehovah Kotoigi. A ben gi den tra strafuman deki-ati fu leisi den Bijbel publikâsi di a ben kisi fu den famiriman fu en. A e taki: „Te mi e gi den strafuman den publikâsi, dan den e kari mi Yehovah Kotoigi. Mi e taigi den taki mi a no wan Yehovah Kotoigi, bika mi sabi san a wani taki fu de wan Kotoigi. Now mi e si a bijbelstudie leki wan seryusu sani, fu di mi wani teki dopu. Efu mi ben teki na eksempre fu den brada fu mi di mi ben de moro yongu, dan mi no ben o de na strafu-oso now.”

Wan fu den strafuman di ben kisi publikâsi fu Mercony, ben taigi a Kotoigi di ben kon na en: „Bifo a munde di yu kon, dan mi ben brokosaka srefisrefi èn mi ben o kiri misrefi. Ma baka di mi leisi den tijdschrift, mi begi Gado fu gi mi pardon fu den ogri sani di mi du, èn mi aksi en tu fu seni wan sma kon na mi di kan yepi mi fu kon sabi san na a tru bribi. Mi ben breiti srefisrefi di yu kon a dei baka dati, èn yu aksi den strafuman efu den wani studeri Bijbel! Mi wani taki yu leri mi fa fu dini Yehovah.”

Ontwaakt! e meki furu sma kon sabi a bun nyunsu

Na Ontwaakt! fu 8 november 2000 ben taki fu a wroko di sma e du fu sorgu sikisma. Wan uma ben aksi 2000 fu a tijdschrift disi, èn a prati den gi sma di e du a wroko disi. Den sma disi ben de na wan spesrutu konmakandra di ben hori na ini Port-au-Prince. Na Ontwaakt! fu 8 yuli 2002, di ben abi artikel na ini di e taki fu skowtu èn fu a wroko di den e du, ben prati gi den skowtu na ini heri Port-au-Prince. Den skowtu ben lobi a tijdschrift trutru, èn te nanga now ete sonwan fu den e tapu den Kotoigi na strati fu aksi den moro fu a tijdschrift dati.

No so langa pasa, wan uma di e wroko gi na organisâsi fu gosontu afersi na heri grontapu (World Health Organization) ben e orga wan programa fu leri sma moro fu AIDS. Na uma disi kisi wan kari fu go na a bijkantoro fu Yehovah Kotoigi, èn drape den sori en san wan Ontwaakt! e taki fu AIDS. A ben feni en moi fu si taki den artikel ben e sori nanga yepi fu Bijbel san sma kan du fu no kisi AIDS, èn fa den kan yepi sma di abi AIDS. Na uma taki dati a tijdschrift Ontwaakt! na a moro bun tijdschrift di e leri sma moro fu a tori disi.

Iya, na difrenti fasi Yehovah Kotoigi e preiki a Kownukondre bun nyunsu na ini a moi kondre Haiti, èn na so den e du dati tu na 234 tra kondre na grontapu. Furu sma e arki a boskopu disi di e gi den howpu, èn a e yepi den fu no poti tumusi furu prakseri na den problema fu a libi, ma fu abi a howpu taki wan grontapu o kon pe ala sma di e anbegi a tru Gado, Yehovah, sa abi wan trutru bun libi sondro problema.—Openbaring 21:4.

[Futuwortu]

[Sma di abi a reti fu a prenki na tapu bladzijde 9]

Background: ©Adalberto Rios Szalay/photodisc/age fotostock