Sma e suku fu kon sabi fa den kan abi wan korostu firi
„Wi sabi kaba fa fu sorgu gi wisrefi èn gi wi osofamiri. Wi kan abi wan switi libi tu te wi abi kefalek sani di furu sma no man bai, soleki airco èn kefalek CD player fu arki poku . . . Ma toku wi e aksi wisrefi ’fu san ede’ wi de na libi. Fu san ede wi e strei fu go na fesi, aladi wi sabi taki dati na fu soso? Sortu bun dati e du gi wi?”—David G. Myers, wan professor di e ondrosuku fu san ede sma e tyari densrefi na wan spesrutu fasi. A e wroko na a Hope College, Holland, Michigan, na Amerkankondre.
FA YU ben o piki den aksi di a professor disi poti? Son sma e aksi densrefi kande efu a de prenspari fu suku piki tapu den aksi disi. Ma te yu no e poti prakseri na den aksi disi, dan yu no sa de koloku, fu di a o de neleki te yu abi wan pikin ston na ini yu susu èn yu no e puru en. A no de fu taki dati yu o man tan waka go doro, ma a no o switi gi yu fu waka.
Efu yu aksi yusrefi wan leisi efu a libi abi wan marki, dan yu a no a wan-enkri sma di aksi ensrefi a sani disi. Sma di e ondrosuku fa sani e waka na ini difrenti libimakandra, ben du wan bigi ondrosuku pe den ben luku san e meki taki sma e firi densrefi warti. Na ondrosuku disi sori taki na ini furu kondre moro nanga moro sma e prakseri „san na a marki fu a libi”.
Efu yu wani abi wan trutru korostu firi, dan yu musu feni a piki tapu dri prenspari aksi, namku:
Pe wi komoto?
San na a marki fu a libi?
San wi kan fruwakti na ini a ten di e kon?
Pe yu kan feni bun piki tapu den prenspari aksi disi? Fu man piki den aksi disi, den artikel di e kon no o taki fu sani di sma e denki, noso fu sani di sabiman e taki, ma den o taki fa Gado Wortu, Bijbel, e gi piki tapu den aksi disi. Grantangi opo yu Bijbel so taki yu kan si gi yusrefi san a e taki fu den tori disi.