Pe wi komoto?
FU SAN EDE A DE PRENSPARI FU KON SABI A PIKI TAPU NA AKSI DISI? Furu sma e leri taki libisani na grontapu kon fu densrefi. Soleki fa na evolutie-leri e taki, dan wan sma no de di meki den libisani na grontapu, ma den kon de fu di difrenti sani pasa baka makandra. Te fu kaba, libisma komoto fu meti, èn na so wi kon de nanga ala den fasi fu wi, namku taki wi abi firi, wi abi koni, èn wi abi na angri fu feni wan marki na ini a libi.
Ma prakseri a sani disi: Efu wi komoto fu meti èn efu wi no abi wan Mekiman, dan fu taki en leti, libisma no abi wan papa nanga wan mama. Efu dati de so, dan libisma no ben o abi wan sma di koni moro den, èn pe den ben kan suku rai. We, dan nowan sma ben o man yepi wi lusu den problema fu wi. Wi ben o abi libisma koni wawan fu yepi wi lusu problema di abi fu du nanga sani soleki den rampu di e pasa, èn den politiek dyugudyugu di de. Boiti dati, na libisma koni wawan ben o man yepi wi nanga wi eigi problema.
Ma efu na libisma koni wawan de fu yepi yu, dan dati ben o meki yu abi wan trutru korostu firi? Efu dati no de so, dan prakseri wan tra sani now, namku taki wan sma de di koni moro wi. Boiti taki a moro moi fu sabi a sani disi, a de moro makriki fu frustan.
San Bijbel e taki?
Bijbel e leri taki na Gado meki libisma. Wi no komoto fu meti di no man denki, soleki fa na evolutie-leri e taki. Fu di dati ben o wani taki dati nowan sma ben o man yepi wi, èn a libi fu wi ben o de fu soso. Na presi fu dati, wi na pikin fu wan lobi-ati èn koni Papa. Poti prakseri na a fasi fa Bijbel e tyari disi kon na krin.
Genesis 1:27. „Gado meki libisma leki wan prenki fu ensrefi. Soleki fa Gado de, na so a meki libisma.”
Psalm 139:14. „Mi sa prèise yu fu di yu meki mi na wan tumusi wondru fasi di e gi mi frede. Den wroko fu yu na wondruwroko, dati mi sili sabi heri bun.”
Mateyus 19:4-6. „Unu no leisi taki a sma di meki den na a bigin, meki den leki man nanga uma? Unu no leisi tu taki a ben taki: ’Dati meki wan man sa gowe libi en papa nanga mama èn a sa tan nanga en wefi, èn a man nanga en wefi sa de wán skin’? Sobun, den no de tu skin moro, ma wán skin. Fu dati ede, nowan sma musu prati san Gado poti na ondro wán tyatyari.”
Tori fu den Apostel 17:24, 25. „A Gado di meki grontapu nanga ala sani na en tapu, na En na Masra fu hemel nanga grontapu, èn a no e tan na ini tempel di libisma meki; libisma no e sorgu en tu, neleki a ben sa abi wan sani fanowdu, bika na En e gi ala sma libi, a e meki den bro, èn a e gi den ala sani.”
Openbaring 4:11. „Na yu, Yehovah, iya, wi Gado, warti fu kisi glori, grani nanga makti, bika na yu meki ala sani; den ben kon de èn yu meki den, fu di yu ben wani.”
Den sani di Bijbel e taki e meki wi abi wan trutru korostu firi
Te wi sabi taki Gado „gi ibri famiri . . . na grontapu a nen fu den”, dan dati sa meki wi e kisi wan tra denki fu sma (Efeisesma 3:15). Te wi sabi a sani disi, dan a o abi krakti tu tapu a fasi fa wi e si wisrefi èn den problema fu wi. Luku wan tu fasi fa a sani disi sa abi krakti tapu a fasi fa wi e denki.
Te wi musu teki muilek bosroiti, dan wi no sa broko wi ede tumusi nanga den difrenti denki di sma abi fu a fasi fa wi musu lusu problema. Na presi fu dati wi sa poti ala wi frutrow tapu den rai fu Bijbel. Fu san ede? Fu di „na Gado srefi ben meki sma skrifi ala den sani di de na ini Gado Buku; den sani disi bun fu gi leri, fu frumane sma, fu poti sani kon reti, fu gi trangaleri na wan regtfardiki fasi, so taki a sma di de fu Gado kan kon bun dorodoro èn de srekasreka fu du ibri bun wroko”.—2 Timoteyus 3:16, 17.
A tru taki wi musu du tranga muiti èn wi musu basi den firi fu wi, te wi wani du san Bijbel e taki. Son leisi te wi wani du san den rai dati taki, dan a kan gersi leki wi musu handri na wan fasi di no e kruderi nanga wi denki (Genesis 8:21). Ma efu wi sabi taki wan lobi-ati Papa na hemel meki wi, dan a no de fu taki dati a fiti fu bribi taki A sabi san na a moro bun fasi fa wi musu tyari wisrefi (Yesaya 55:9). Fu dati ede a Wortu fu en e gi wi a dyaranti: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti” (Odo 3:5, 6). Te wi e du san a rai dati e taki, dan a sa yepi wi fu no broko wi ede moro te wi abi problema èn te wi musu teki bosroiti.
Wi kan kisi fu du nanga sma di no e handri bun nanga wi, fu di wi de fu wan tra ras, wi kweki na wan tra fasi, noso fu di wi no kisi a srefi skoroleri leki den. Te dati pasa, dan wi no o broko wi ede taki wi lagi moro den, noso taki wi no warti leki den. Na presi fu dati, wi o si wisrefi na wan yoisti fasi èn wi o lespeki wisrefi. Fu san ede? Fu di wi Papa, Yehovah Gado, „no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun”.—Tori fu den Apostel 10:34, 35.
Te wi e frustan a tori disi, dan a sa yepi wi tu fu no denki takru fu trawan. Wi sa kon frustan taki wi no abi nowan reide fu denki taki wi hei moro sma fu wan tra ras, fu di „fu wán sma nomo [Gado] meki ala tra sma fu libi na heri grontapu”.—Tori fu den Apostel 17:26.
Fu tru, te wi sabi taki wan Mekiman meki wi èn taki a e broko en ede nanga wi, dan dati sa meki taki wi o kon abi wan trutru korostu firi. Ma moro de fanowdu efu wi wani tan abi wan korostu firi.
[Prenspari pisi na tapu bladzijde 4]
Libisma komoto fu meti?
[Prenki na tapu bladzijde 5]
Wi kan abi wan trutru korostu firi te wi sabi taki a Mekiman fu wi e broko en ede nanga wi