Kon krosibei na Gado
Wan Mekiman di warti fu wi prèise en
YU AKSI yusrefi wan leisi: ’Fu san ede wi de na libi?’ Den sma di e bribi taki libi kon de fu ensrefi, noiti no sa feni a piki tapu na aksi disi. Dati no de so nanga den sma di e bribi den krin buweisi di e sori taki Yehovah Gado na a Sma pe a libi komoto (Psalm 36:9). Den sma dati sabi fu san ede Gado meki wi. Openbaring 4:11 e sori fu san ede Gado du dati. Meki wi go luku fa den wortu dati di na apostel Yohanes skrifi, e sori fu san ede wi de na libi.
Yohanes e taki dati wan grupu engel na hemel ben e prèise Gado na ini wan singi. Den ben singi: „Na yu, Yehovah, iya, wi Gado, warti fu kisi glori, grani nanga makti, bika na yu meki ala sani; den ben kon de èn yu meki den, fu di yu ben wani.” Yehovah wawan warti fu kisi a grani disi. Fu san ede? Fu di na en „meki ala sani”. We, dan san libisma nanga engel musu du?
Bijbel e taki dati Yehovah warti fu „kisi” glori, grani nanga makti. A no de fu taki dati en na a Sma di abi a moro bigi glori, grani, nanga makti na hemel èn na grontapu. Moro furu libisma no e bribi taki en na a Mekiman fu ala sani. Nanga yepi fu den sani di Gado meki, son sma man si krin san na „den eigifasi fu Gado di sma no man si nanga den ai” (Romesma 1:20). Fu di den abi bigi warderi, meki den e gi Yehovah glori nanga grani. Den e fruteri ala sma di wani arki, san na den buweisi di e sori taki Yehovah na a sma di meki ala sani na wan wondrufasi èn taki a warti fu wi sori en bigi lespeki.—Psalm 19:1, 2; 139:14.
Ma fa Yehovah e kisi makti fu den anbegiman fu en? A no de fu taki dati nowan libisani kan gi na Almakti Mekiman, makti (Yesaya 40:25, 26). Ma fu di wi meki leki wan prenki fu Gado, meki wi kan sori den fasi fu Gado tu, èn wan fu den na makti (Genesis 1:27). Efu wi e warderi trutru san wi Mekiman du gi wi, dan dati o meki taki wi gebroiki wi makti noso krakti fu gi Gado grani nanga glori. Na presi fu gebroiki wi krakti soso gi wi eigi bun, wi e frustan taki Yehovah Gado warti fu wi gebroiki ala wi krakti fu dini en.—Markus 12:30.
We, dan fu san ede wi de na libi? A lasti pisi fu Openbaring 4:11 e taki: „Den [sani di yu meki] ben kon de èn yu meki den, fu di yu ben wani.” Wi no meki wisrefi. Wi de na libi fu di na Gado wani dati. Fu dati ede, a libi no o wani taki noti te wi e suku wi eigi bun nomo. Te wi wani abi wan korostu firi, te wi abi prisiri, èn te wi wani de koloku, dan wi musu kon sabi san na Gado wani èn wi musu libi soleki fa a wani. Na a fasi dati wawan wi o sabi fu san ede wi de na libi.—Psalm 40:8.
[Prenki na tapu bladzijde 31]
NASA, ESA, and A. Nota (STScI)