Gi Jehovah grani, — Foe san-ede èn fa?
„Den wan di e gi mi grani, mi sa gi grani, èn den wan di e wisiwasi mi, sa de wan lagi sani.” — 1 SAMUWÈL 2:30.
1. Soema den e gi Nobelprijs leki paiman, èn fa foeroe sma e si den prijs disi?
IBRI jari fo seti foe Skandinavia e gi Nobelprijs na den wan di ben doe na moro bigi boen gi na libismafamiri na ini a jari di pasa.’ Den prijs e gi foe den boen sani di doe tapoe siksi difrenti kontren foe moeiti. Wan Nobelprijs foeroe sma e si leki na moro bigi grani di den kan gi wan libisma.
2. Soema den sma di e gi Nobelprijs e loekoe pasa, èn foe san-ede joisti En e froedini spesroetoe grani?
2 Aladi noti de fowtoe ini a tori foe gi grani na sma di e froedini en, tokoe nanga reti na aksi de taki efoe den wan di e gi den grani disi, oiti e prakseri foe gi na moro bigi Jepiman foe na libismafamiri grani? Na Jepiman dati na a sma di ben gi boen na a libismafamiri na foeroe fasi di no de foe teri foe sensi a momenti di a ben meki na fosi man nanga oeman sowan 6000 jari pasa. Taki so foeroe leisi sma e misi foe gi en grani e memre wi na den wortoe foe Elihu, na mati foe Job foe owroeten, di ben taki: „Tokoe nowan sma taki: ’Pe Gado de, na Bigi Mekiman foe mi, di e gi melodie na neti?’” (Job 35:10) Na bigi Jepiman foe wi e tan doe ’boen ete, foedi a e gi alen komoto foe hemel èn ten te bon e meki froktoe, foedi a e foeroe wi ati pasa marki nanga njanjan èn prisiri’ (Tori foe den Apostel 14:16, 17; Mateus 5:45). Jehovah na troetroe a Giman foe „ibri boen prisenti èn ibri volmaakti kado.” — Jakobus 1:17.
San a wani taki foe gi grani
3. San na den prenspari Hebrew nanga Griki wortoe di den e vertaal nanga „grani” èn san den wani taki?
3 Na prenspari Hebrew wortoe gi grani, ka·vohdhʹ, wani taki letterlijk „ebi.” Wan sma di e kisi grani den e si soboen leki wan sma di de ebi, di bigi srefisrefi, wan sma di prenspari. A wani taki foeroe, taki na Hebrew wortoe, ka·vohdhʹ, di nofotron vertaal toe na ini bijbel leki „glori”, èn di sori moro ete o bigi srefisrefi ofoe o prenspari den e si na sma di den e gi grani. Wan tra Hebrew wortoe, yeqarʹ, di den e vertaal nanga „grani” na ini a bijbel, ben gi baka toe leki „diri” èn „diri sani.” Na ini den Hebrew Boekoe na wortoe grani abi soboen foe doe nanga glori èn diri fasi. Na Griki wortoe di vertaal nanga „grani” na ini bijbel, na tiʹme, èn disi toe e tjari na prakseri abra foe warderi, waarde, diri fasi.
4, 5. (a) San a wani taki foe gi wan sma grani? (b) Sortoe situwâsi di den e froeteri foe en na ini Ester 6:1-9, e sori san de ini a tori foe gi trawan grani?
4 Soboen, wan sma e gi wan trawan grani foedi a e sori a sma dati dipi respeki èn warderi. Loekoe pikinso leki wan eksempel, na situwâsi foe na kotrow djoe Mordekai di den e taki foe en na ini bijbel. Na wan okasi Mordekai ben tjari wan komplòt teige na libi foe kownoe Ahasferos foe Persia foe owroeten kon a krin. Bakaten, di wan neti a kownoe no ben kan sribi, den ben tjari kon na a prakseri foe a kownoe san Mordekai ben doe. Foe dati-ede a ben aksi den foetoeboi foe en: „Sortoe grani èn glori den ben sori Mordekai foe disi?” Den ben piki: „Den no ben sori en noti.” Fa a de wan sjen sani! Mordekai ben kibri na libi foe a kownoe, èn tokoe a kownoe ben misi foe sori warderi. — Ester 6:1-3.
5 Foe dati-ede, na wan boen momenti, Ahasferos ben aksi en fosi minister, Haman, san ben de na moro boen fasi foe gi na sma ini soema na kownoe ben feni prisiri grani. Wantewante Haman ben prakseri na ini en ati: „Nanga soema moro na kownoe ben sa abi prisiri foe gi en grani leki mi?” Foe dati-ede Haman ben taki taki den ben sa moesoe weri „krosi foe wan kownoe” gi en èn rèi en „na tapoe wan asi di na kownoe e rèi troetroe.” A ben bosroiti: „Den moesoe meki a rèi na tapoe na asi na a publiki pren foe na foto èn den moesoe waka na en fesi èn bari taki: ’Na so den e doe nanga na man di, a kownoe srefi feni prisiri ini na grani foe en’” (Ester 6:4-9). Gi wan sma di ben kisi grani na so wan fasi, na heri pipel ben sa abi dipi warderi.
Foe san-ede Jehovah e froedini grani
6. (a) Soema a tapoe foe ala tra sma e froedini na grani foe wi? (b) Foe san-ede na wortoe „gran” na wan fasi di fiti foe taki foe Jehovah?
6 Na ini a heri historia den sori libisma grani, foeroetron sondro foe den froedini en (Tori foe den Apostel 12:21-23). Ma soema moro leki ala tra sma e froedini en foe kisi grani? We, Jehovah Gado, dati no de foe taki! A e froedini en foe kisi na grani foe wi bika a de sondro foe misi gran. Foeroetron na wortoe „gran” e gebroiki gi en. En na a Gran Sma, na Gran Mekiman, na Gran Kriaman, na Gran Kownoe, na Gran Leriman, na Gran Meester (Psalm 48:2; Preikiman 12:1; Jesaja 30:20; 42:5; 54:5; Hosea 12:14). En di de na Granwan, abi majesteiti fasi, de warti, de gendri, de hei, de toemoesi moi èn e dwengi respeki. Sma no kan teki Jehovah gersi nanga sani, a no abi en speri, en hei moro ala sani èn ala sma. En srefi e kotoigi foe na tori dati, te a e taki: „Nanga soema oenoe sa wani agersi mi ofoe meki mi de speri foe en ofoe meki mi de a srefi, sotaki wi ben sa gersi makandra?” — Jesaja 46:5.
7. Na ini no moro mendri leki omeni difrenti fasi sma kan taki taki Jehovah Gado de aparti, èn foe san-ede sma kan taki taki ini a tori foe tirimakti den no kan teki noti foe gersi en?
7 Jehovah Gado no abi en speri ini no moro mendri leki seibi difrenti fasi, di e gi aparti reide foe gi en grani. Na a fosi presi, Jehovah Gado e froedini na moro bigi grani foedi sani no de leki en ini tirimakti. Na Masra Jehovah na a Universeel Soeverein — en na a moro Heiwan. En na wi Kroetoeman, Giman foe wet èn Kownoe. Ala sma na ini hemel èn na grontapoe moesoe gi en frantiwortoe; ma a no moesoe gi nowan sma frantiwortoe. Heri boen den e taki foe en leki ’bigi, makti èn taki a e gi frede”. — Deuteronomium 10:17; Jesaja 33:22; Danièl 4:35.
8. Foe san-ede sma kan taki taki Jehovah no abi en speri (a) ini a tori foe en posisi? (b) ini a tori foe a têgo di a de foe têgo?
8 Na a di foe toe presi, dan Jehovah Gado e froedini na moro bigi grani bikasi ini a tori foe en posisi a de sondro speri. En na „a Heiwan èn Granwan,” na Moro Heiwan. A abi en kownoe-stoeroe fara moro hei na tapoe foe ala en grontapoe mekisani na wan fasi di wi no kan froestan! (Jesaja 40:15; 57:15; Psalm 83:18) Na a di foe dri presi, dan Jehovah Gado moesoe kisi grani na tapoe foe ala trawan foedi a no abi en speri na ini a tori foe na têgo di a de têgo. En wawan no ben abi wan bigin noiti, èn a de foe têgo te têgo. — Psalm 90:2; 1 Timoteus 1:17.
9. Na sortoe fasi sma no kan teki noti foe gersi nanga Jehovah (a) ini a tori foe en glori? (b) ini a tori foe den fondamenti eigifasi foe en?
9 Na a di foe fo presi, dan Jehovah Gado e froedini na moro bigi grani foe na toemoesi moi fasi ede foe na glori foe en srefi. En na „a Tata foe den hemel leti.” Na Sma di a de abi sowan brenki taki nowan sma kan si en èn dan tokoe tan na libi. En e dwengi respeki troetroe (Jakobus 1:17; Exodus 33:22; Psalm 24:10). Na a di foe feifi presi, dan wi moesoe gi Jehovah na moro bigi grani foe den wondroe eigifasi foe en. A de Almakti, sondro kaba ini makti; a sabi ala sani, sondro kaba ini koni; a de volmaakti dorodoro ini retidoe; èn a de ini skin lobi. — Job 37:23; Odo 3:19; Danièl 4:37; 1 Johanes 4:8.
10. Na sortoe fasi Jehovah no abi en speri (a) ini a tori foe wroko foe meki sani èn sani di a abi? (b) ini a tori foe en nen èn barinen?
10 Na a di foe siksi presi, dan Jehovah Gado e froedini na moro bigi grani leki a kan, foe den bigi wroko foe en foe meki sani ede. Leki na Mekiman foe ala sani na ini hemel èn na grontapoe en de na a srefi ten na Bigi Eiginari foe ala sani. Wi e leisi na ini Psalm 89:11: „Hemel na foe joe, so srefi grontapoe na foe joe toe.” Na a di foe seibi presi, dan Jehovah wi Gado e froedini foe sma gi en grani moro ala trawan foedi sani no de foe teki en gersi, a de sondro speri ini a tori foe en nen èn barinen. En wawan e tjari na nen Jehovah, di wani taki: „A e meki a doe kon”. — Loekoe Genesis 2:4, foetoewortoe (Bakratongo).
Fa foe gi Jehovah grani
11. (a) San na wantoe fasi fa wi kan gi Jehovah grani? (b) Fa wi kan sori taki wi e gi Jehovah grani troetroe foedi wi e froetrow na en tapoe?
11 Fa wi kan gi Jehovah grani te wi loekoe ala den eigifasi foe en? Soleki wi sa si, wi kan gi en grani foedi wi e sori en frede èn dipi lespeki, foedi wi e gi en jesi, foedi wi e erken en ini ala den pasi foe wi, foedi wi e gi presenti, foedi wi e waka na en baka, èn foedi wi e seni tranga begi go na en. Wi kan gi en grani toe foedi wi e poti bribi ini en, foedi wi e froetrow en awansi san e pasa. „Froetrow ini Jehovah nanga joe heri ati,” den e gi wi tranga. Soboen, wi e gi Jehovah Gado grani foedi wi e poti froetrow ini den wortoe foe en. A e taki foe eksempel: „No frede, bika mi de nanga joe. No loekoe lontoe [nanga frede], bika mi na joe Gado. Mi wani tranga joe. Mi wani jepi joe troetroe” (Odo 3:5; Jesaja 41:10). Efoe wi no e froetrow dorodoro na en tapoe, dan wi ben sa gi en sjen.
12. Sortoe ròl gi jesi èn frede e prei ini a gi foe grani na Jehovah?
12 Wan fasi fa wi e gi Jehovah grani, di abi krosibei foe doe nanga dati, na foedi wi e gi en jesi. Èn wan prenspari sani foe gi jesi na frede foe Gado, ija, frede foe no plisi Gado. Den Wortoe foe Jehovah gi Abraham bakadi Abraham ben gi jesi èn ben proeberi foe òfer en manpikin Isak, e sori san a frede nanga a gi jesi abi foe doe nanga makandra. „Now mi sabi taki joe e frede Gado,” Jehovah ben taki (Genesis 22:12). Te Paulus ben e taki foe san pikin moesoe gi den papa nanga mama, a ben e sori so srefi taki gi jesi èn grani e go anoe nanga anoe (Efeise sma 6:1-3). Soboen, foedi wi e gi jesi na den komando foe Gado, di no de wan hebi sani, wi e gi Jehovah grani. Degedege no de ini na tori: Foe trangajesi Jehovah ben sa de taki wi e gi en sjen. — 1 Johanes 5:3.
13. Te wi e gi Gado grani dan sortoe jeje fasi foe denki wi sa abi ini a tori foe den sani di wi e doe èn den plan foe wi?
13 Morofara, wi kan tjari grani gi Jehovah Gado foedi wi e teki na rai na ini Odo 3:6 na ati: „Poti prakseri na en na ini ala den pasi foe joe [ija, erken en], èn en srefi sa meki den foetoe pasi foe joe de leti.” Na disipel Jakobus e gi wi boen rai na ini a jeje disi. Na presi foe go doro foe froetrow tapoe wi srefi dei foe dei èn foe froetrow tapoe wi eigi koni, wi moesoe taki: „Efoe Jehovah wani, wi sa libi èn doe disi ofoe dati toe” (Jakobus 4:15). Jari pasa a ben de na gwenti foe den Internationaal Bijbelstudenti foe poti na ibri froeklari di abi foe doe nanga na tamara na afkorting D.V., dati na Deo Volente, san wani taki „efoe Gado wani.”
14. (a) Efoe wi wani gi Gado grani dan sortoe fasi e fiti wi ini a tori foe den moeiti foe wi? (b) Sortoe fasi den e sori ini a tori foe a tjari kon a doro foe den boekoe foe na Wachttorengenootschap?
14 Wi e gi Jehovah Gado grani toe foedi wi e sori wan sakafasi foe tjari wi srefi, foedi wi e gi Gado grani foe ibri boen bakapisi di wi e njanboen foe en. Nanga reti na apostel Paulus ben taki foe na diniwroko foe en: „Mi ben prani, Apolos ben nati, ma Gado ben tan meki sani gro; sotaki nowan sma de wan sani, no en di e prani, no en di e nati na gron, ma Gado di e meki a e gro” (1 Korente sma 3:6, 7). Ija foetroe, Paulus ben broko en ede foe tjari grani gi Gado èn no gi en srefi ofoe gi iniwan tra libisma. Foe dati-ede, ini a ten disi, den publikâsi foe na Waktitorengenootschap no e meki sma sabi den nen foe den skrifiman, èn den skrifiman e kibri den srefi foe meki sma sabi sortoe jepi den ben gi. Na so fasi, na prakseri e poti na tapoe den sani di skrifi na ini, di skrifi foe gi Jehovah grani, èn no na wan libisma.
15. Sortoe ondrofeni e sori taki son sma abi moeiti foe froestan a sakafasi foe Kotoigi foe Jehovah?
15 Na fasi foe wroko disi, foe poti prakseri tapoe Jehovah èn foe gi en grani na sowan fasi, e froewondroe son sma. Di den Kotoigi ben e seti wan geluidsistema gi na publiki taki na New York City, Central Park, wantoe jari pasa, den ben prèi wan foe den Kownoekondre Melodie tape foe test na sistema. Wan trowpatna di ben weri heri moi krosi ben aksi wan foe den Kotoigi sortoe pokoe dati ben de. Foedi a ben denki taki na trowpaar ben de Kotoigi, meki a ben piki den: „Dati na Kownoekondre Melodie no. 4” „Ija, ma soema ben meki na pokoe dati?”, den ben aksi. Na Kotoigi ben piki: „O, na nen foe a sma di meki en no de bekenti.” Na trowpaar ben piki: „Sma di e meki den sortoe foe pokoe dati no e doe dati sondro foe den meki den nen bekenti.” Na Kotoigi ben piki: „Ma Jehovah Kotoigi e doe dati.” Ija, den e doe disi sotaki ala grani e go na Jehovah Gado!
16. Tapoe sortoe difrenti fasi wi kan gebroiki wi sten foe sori Jehovah Gado grani?
16 Ete wan fasi foe gi Jehovah grani, na foedi wi e gebroiki wi mofoboeba foe gi kotoigi foe en. Efoe wi e broko wi ede troetroe foe gi grani na en, dan wi sa de nanga wi heri konsensi ini na prati foe na boen njoensoe foe na Kownoekondre. Wi kan doe disi foe di wi e go oso-foe-oso èn tapoe ala tra fasi di wi abi, èn wi no sa afrontoe den okasi foe preiki tra fasi leki fa wi gwenti (Johanes 4:6-26; Tori foe den Apostel 5:42; 20:20). Boiti foe dati, wi abi okasi foe gi wi Gado grani nanga den sten foe wi na a gemeente konmakandra foe wi, foedi wi e gi piki èn foedi wi e moksi wi srefi foe e singi den Kownoekondre singi foe wi nanga wi heri ati (Hebrew sma 2:12; 10:24, 25). Ini wi aladei takimakandra, wi kan gi Jehovah grani toe nanga wi mofoboeba. Nanga wan pikinso moeiti wi kan drai wan takimakandra poti go ini jeje pasi di e bow sma, èn disi sa abi leki bakapisi taki wi e gi Jehovah Gado grani. — Psalm 145:2.
17. (a) San wan joisti fasi foe tjari joe srefi abi foe doe nanga na grani di wi e gi Jehovah grani? (b) San na a takroe bakapisi di fowtoe fasi foe tjari joe srefi abi?
17 O toemoesi boen a de toe foe gi Jehovah Gado grani nanga wi mofoboeba, tokoe a de so srefi fanowdoe foe gi en grani nanga na fasi fa wi e tjari wi srefi. Jesus ben kroetoe den sma di, aladi den ben gi Gado grani nanga den mofoboeba, tokoe ben abi wan ati di ben de farawe foe en (Markus 7:6). Fowtoe fasi foe tjari joe srefi seiker sa tjari sjen gi Gado. Na ini Rome sma 2:23, 24, wi e leisi foe eksempel: „Joe, di e meki joe srefi bigi nanga na wet, joe e gi Gado sjen nanga na pasa di joe e pasa na wet? Bikasi foe oenoe ede ’den e kosi na nen foe Gado na mindri den nâsi.’” Na ini jari di pasa foeroe doesoendoesoen sma ben sluit uit foe den gemeente foe na pipel foe Jehovah. Soleki a sori, dan moro bigi nomroe foe sma ete di ben abi prati na ini fasi foe tjari den srefi di e gi sjen, no sluit uit foedi den ben sori wan troe fasi foe berow. Ala den sma disi ben gi Jehovah grani nanga den mofoboeba, ma den ben misi foe doe en nanga na fasi fa den ben tjari den srefi.
18. (a) Sortoe broko-ede bepaalde sma di e kisi bigi grani moesoe abi efoe den wani sori Jehovah Gado na grani di den moesoe gi en? (b) Fa na situwâsi di abi foe doe nanga son priester èn di ben de ini a ten foe Maleaki e sori na fanowdoe foe broko wi ede boen?
18 Den wan di de druk bezig ini difrenti kontren foe na foeroeten dienst — efi a de now na Betel, ini na dienst foe rèis, leki zendeling, ofoe leki pionier — abi wan bigi okasi taki den man foe jepi foe gi Jehovah grani. Den abi na plekti foe doe ala den moeiti ini awansi sortoe wroko di den e gi den foe doe, èn boiti dati foe de „kotrow ini pikinso sani èn ini foeroe sani’ (Lukas 16:10). Na ini son fasi na grani posisi foe den ben agersi, ma no ben prenki na fesi, nanga jepi foe a di foe den priester èn Lefiet na ini a owroe Israèl. Ma, foe na mi-no-ke fasi foe son priester ini den dei foe Maleaki, Jehovah ben taigi den: „Efoe mi na wan papa, dan pe na grani de di oenoe e sori mi? Èn mi na wan toemoesi boen meester, dan pe a frede de gi mi?” (Maleaki 1:6) Den priester dati ben wisiwasi a nen foe Gado foedi den ben pristeri, breni, lan èn siki meti leki srakti-ofrandi. Efoe den wan di e njanboen foe spesroetoe grani foe dienst ini na ten disi no e doe ala san den kan, dan a kan pasa taki den spesroetoe e froedini na piri-ai di Jehovah Gado ben gi den priester dati. Den ben sa misi foe gi Gado grani.
19. (a) Soleki ben skrifi na ini Odo 3:9, dan san a wan tra fasi foe gi Jehovah grani? (b) San na wan tra prenspari fasi foe gi Jehovah grani?
19 Ete wan tra fasi fa wi kan gi Jehovah Gado grani, na foe gi moni bijdrage gi na preikiwroko di e doe na a heri grontapoe, foe san a gi na komando foe a doe. „Gi Jehovah grani nanga den warti sani foe joe èn nanga den fosi froktoe foe ala den sani di joe kisi”, na a tranga fanowdoe rai di wi e kisi (Odo 3:9). Na grani foe gi den sortoe bijdrage disi na wan okasi foe gi Jehovah Gado grani èn di nowan sma moesoe loekoe pasa. Wi kan gi Jehovah Gado grani toe ini den begi foe wi, foedi wi e prèise èn e gi en tangi (1 Kronieken 29:10-13). Ija, foedi wi e kon na en nanga sakafasi èn nanga dipi respeki, dan a kon foe wi na Gado ini begi de kaba wan gi foe grani na en.
20. (a) Soema grontapoe sma e gi grani soleki fa a gwenti de èn fa? (b) Foedi wi e gi jesi na sortoe komando, meki wi kan gi Jehovah grani moro ete?
20 Na ini a ten disi foeroe sma, jongoewan spesroetoe, e gi grani na den sma di den e loekoe na den nanga froewondroe foedi den e waka doe leki den — foedi den e taki leki den èn foedi den e handri leki den. Foeroetron den sma di den e doe leki den, na sportsma di abi bigi nen ofoe stari na ini a grontapoe di e meki prisiri. Kontrari dati dan wi leki kresten moesoe gi Jehovah Gado grani foedi wi e meki moeiti foe waka na en baka. Na apostel Paulus ben gi wi tranga foe doe dati di a ben skrifi: „Tron sma di e waka na Gado baka, leki lobi pikin, èn tan waka ini lobi” (Efeise sma 5:1, 2). Ija, foedi wi e feti foe waka na Jehovah baka, wi e gi en grani.
21. (a) San sa sreka wi foe gi Jehovah glori èn grani? (b) San na den paiman di Jehovah e gi den sma di e gi en grani?
21 Foe troe, foeroe fasi de fa wi kan èn moesoe gi Gado bigi nen èn grani. Meki wi no frigiti noiti taki foedi wi e njan doronomo foe na Wortoe foe en èn e kon sabi en doronomo moro betre, meki wi sa man foe gi en grani moro betre. San o de den paiman foe dati? „Na sma di e gi mi grani,” Jehovah e taki, „mi sa gi grani” (1 Samuwèl 2:30). Te foe kaba Jehovah sa gi den anbegiman foe en grani foedi a e gi den têgo libi ini kolokoe, efi a de now na ini hemel leki kompe tiriman nanga en Manpikin, Jesus Krestes, ofoe na a Paradijs grontapoe.
Joe kan memre disi?
◻ Soema libisma ini algemeen e gi grani, èn na soema leki fa den gwenti, den e misi foe gi grani?
◻ San a wani taki foe gi wan sma grani, èn san na wantoe fasi fa a kan doe?
◻ San a wantoe fondamenti reide foe san-ede Jehovah Gado warti foe kisi grani?
◻ San a wantoe foe den fasi fa wi kan gi Jehovah grani?
◻ Tapoe sortoe fasi Jehovah e pai den sma di e gi en grani?