Meki Wi Alamala Gi Yehovah Nanga En Manpikin Grani
A Fasi fa Ala Sma Di Kon na a Memrefesa Tapu 8 April Kan Kisi Wini Dorodoro
1 Suma na ini a ten disi e kisi spesrutu grani? Na den wan di du san grontapu e si leki wan kefalek sani. Ma na ini moro furu kefal, sma e frigiti den sani di du. Ma fa a de nanga sani di du di e yepi a heri libisma famiri trutru? Na a moro bigi wan fu den sani disi wi o poti ala wi prakseri te wi e hori na Avondmaal fu Masra sonde 8 april 2001 baka sondongo.
2 Suma warti fu kisi a moro bigi grani? Bijbel e piki: „Yu, Yehovah, . . . warti fu kisi a glori nanga a grani nanga a krakti, bika yu ben meki ala sani” (Openb. 4:11). Leki Mekiman, Yehovah na a Soeverein Tiriman fu na universum. A reti di a abi fu kisi grani no sa tapu noiti!—1 Tim. 1:17.
3 Yesus Krestes, Gado Manpikin, ben du warti sani di o tyari têgo blesi kon gi a libisma famiri. A ben waka soifri baka na eksempre fu en Tata (Yoh. 5:19). A tumusi bun fasi fa a ben gi yesi èn a getrow diniwroko fu en ben meki taki a „warti fu kisi a krakti nanga gudu nanga koni nanga tranga nanga grani nanga glori nanga blesi” (Openb. 5:12). En papa ben gi en grani fu di a ben poti en na tapu a kownusturu leki Kownu (Ps. 2:6-8). Wi fu wi sei o abi na okasi fu gi a Tata nanga a Manpikin grani te wi e hori na Avondmaal fu Masra tapu 8 april 2001.
4 Na wan sari sani taki te yu luku o furu sma de, dan, weiniki sma nomo na ini a historia ben gi Yehovah nanga en Manpikin a grani di fiti. Son leisi a ben de so taki, srefi na owruten pipel fu Gado, den Israèlsma, no ben du furu na ini a diniwroko fu Yehovah. Nanga dati den ben sori taki den no ben e lespeki En kwetikweti (Mal. 1:6). Fu kan abi wan yoisti lespeki, sma musu gi yesi na wan getrow fasi fu di den lobi èn e warderi ala san Yehovah nanga en Manpikin du gi wi. Fu gi Yehovah nanga Yesus a grani nanga lespeki disi, wani taki dati wi musu frede èn lespeki den, èn taki wi musu erken den na ini wi heri libi. A Kresten gemeente e meki muiti fu leri èn fu yepi trawan fu du a srefi sani.
5 Wan Spesrutu Okasi fu Gi Grani: A Memrefesa na a moro prenspari konmakandra di a pipel fu Yehovah e hori ibri yari. Ibriwan sma di abi a grani fu dini èn fu gi Yehovah grani musu de drape (Luk. 22:19). Wi e fruwakti taki boiti den 6 milyun Kotoigi di e preiki, dan den sma di wani sabi moro o meki taki a nomru fu sma di o kon na a Memrefesa o pasa 14 milyun. Dati o de wan moi okasi fu gi wi hemel Tata grani! Ala di den sma di e hori a fesa e poti prakseri na Yesus, dan a grani nanga a lespeki di den e sori gi san a du, e gi a Tata di seni en kon, glori.—Yoh. 5:23.
6 San wi kan du fu horibaka gi a spesrutu okasi disi? Wi kan yepi den nyunwan di wani sabi moro so taki den kan feni wini dorodoro. Gi den deki-ati fu kon, èn aksi den na wan switifasi fu yepi den doro drape. Fruklari fu san ede a lezing o hori. Meki den kon leri sabi tra sma. Den sani di den o si èn yere kan meki taki den o du muiti fu kon makandra nanga wi fu gi Yehovah grani.
7 No denki lekti fu a krakti di a programa kan abi tapu sma. Wan studenti fu na universiteit ben taki disi: „Mi ben go furutron na den Avondmaal ini mi kerki, ma disi na wan heri tra sani. Mi e si taki disi na soifri san Bijbel e taki, èn mi denki taki unu abi a waarheid.” A ben bigin kon na den konmakandra doronomo èn esi-esi a ben teki dopu.
8 Yepi Nyunwan fu Go na Fesi: Poti prakseri na den nyunwan di kon na a Memrefesa èn go luku den na oso so esi baka a konmakandra disi, so taki yu kan taki nanga den fu den moi tori di den ben leri èn ben si. Meki den kon sabi taki tra konmakandra de pe den kan kisi moro sabi fu Bijbel. Te yu e luku kapitel 17 fu a Sabi-buku, „Feni seikerfasi na mindri a pipel foe Gado” dan sori den, den furu sani san a kan kisi di a gemeente seti na yeye fasi. Sreka sani so taki den kan si a video di nen „Onze gehele gemeenschap van broeders”, fu den kan si a wánfasi, a prisiri, nanga a faya fu Yehovah pipel nanga den eigi ai!
9 A prenspari taki den wan di wani sabi moro e leri fa densrefi kan sori Yehovah grani nanga lespeki. Fruteri den taki efu den e begi nanga den heri ati dan dati e plisi Yehovah èn taki disi na wan fasi fu kisi yeye krakti baka (1 Yoh. 5:14). Gebroiki les 8 te go miti les 12 fu a San Gado e aksi-brochure, fu sori taki a fasi fa wan sma e tyari ensrefi kan gi Yehovah grani. Gi den nyunwan deki-ati fu denki fu na okasi di den abi fu gi Yehovah grani te den e du a preikiwroko, fu di yu e taki fu den sani di skrifi na ini a Jehovah’s Getuigen-brochure, bladzijde 30 nanga 31.
10 Te wi e warderi a srakti-ofrandi fu Yesus èn a grani di wi abi fu dini leki en disipel, dan dati e gi a Tata grani èn a e tyari blesi gi trawan. Yesus ben pramisi: „Efu wan sma e dini mi, dan a Tata sa gi en grani.”—Yoh. 12:26.