Lès 8

Osofamiri libi di e plisi Gado

San na a posisi foe a masra na ini na osofamiri? (1)

Fa wan masra moesoe handri nanga en wefi? (2)

Sortoe frantiwortoe wan papa abi? (3)

San na a ròl foe a wefi na ini na osofamiri? (4)

San Jehovah e aksi foe papa nanga mama èn foe pikin? (5)

Fa bijbel e si prati nanga brokotrow? (6, 7)

1. Bijbel e taki dati wan masra na a ede foe en osofamiri (1 Korentesma 11:3). Wan masra moesoe abi soso wán wefi. Den moesoe trow na a joisti fasi soleki fa lanti wet e taki. — 1 Timoteus 3:2; Titus 3:1.

2. Wan masra moesoe lobi en wefi neleki fa a lobi ensrefi. A moesoe handri nanga en na a fasi fa Jesus e handri nanga den bakaman foe en (Efeisesma 5:25, 28, 29). Noiti a moesoe naki en wefi noso meshandri en na iniwan fasi. Na presi foe dati a moesoe sori en grani nanga lespeki. — Kolosesma 3:19; 1 Petrus 3:7.

3. Wan papa moesoe wroko tranga foe sorgoe gi en osofamiri. A moesoe sorgoe gi njanjan, krosi nanga tanpe gi en wefi nanga pikin. Wan papa moesoe sorgoe toe gi den sani di en osofamiri abi fanowdoe na jejefasi (1 Timoteus 5:8). A e teki fesi foe jepi en osofamiri foe leri sabi Gado nanga En prakseri. — Deuteronomium 6:4-9; Efeisesma 6:4.

4. Wan wefi moesoe de wan boen jepiman gi en masra (Genesis 2:18). A moesoe jepi en masra foe leri èn kweki den pikin foe den (Odo 1:8). Jehovah e aksi foe wan wefi foe sorgoe gi en osofamiri na wan lobi fasi (Odo 31:10, 15, 26, 27; Titus 2:4, 5). A moesoe abi dipi lespeki gi en masra. — Efeisesma 5:22, 23, 33.

5. Gado e aksi foe pikin foe gi jesi na a papa nanga mama foe den (Efeisesma 6:1-3). A e froewakti foe papa nanga mama foe leri den pikin foe den èn foe piri-ai gi den. Papa nanga mama moesoe gebroiki ten foe de nanga den pikin foe den èn studeri bijbel nanga den, èn sorgoe gi den sani di den abi fanowdoe na jejefasi èn na a sei foe den firi foe den (Deuteronomium 11:18, 19; Odo 22:6, 15). Noiti papa nanga mama moesoe gi den pikin foe den tranga leri na wan grofoe noso ogri-ati fasi. — Kolosesma 3:21.

6. Te trowpatna abi problema foe feni en nanga makandra, dan den moesoe proeberi foe gebroiki bijbel rai. Bijbel e gi wi tranga foe sori lobi èn foe gi pardon (Kolosesma 3:12-14). A Wortoe foe Gado no e gi a deki-ati foe prati leki wan fasi foe loesoe pikinpikin problema. Ma wan wefi ben sa kan teki a bosroiti foe gowe libi en masra efoe (1) na wan tranga-ede fasi a e weigri foe sorgoe en osofamiri, (2) a de so kefalek ogri taki a gosontoe nanga a libi foe en de ini kefar, noso (3) a toemoesi bigi gens di a e gens e meki taki a no kan anbegi Jehovah. — 1 Korentesma 7:12, 13.

7. Trowpatna moesoe de getrow na makandra. Soetadoe na wan sondoe teige Gado èn teige a trowpatna foe wan sma (Hebrewsma 13:4). Soetadoe na a wan-enkri reide di wan kresten ben kan brokotrow nanga en patna èn de fri foe trow baka (Mateus 19:6-9; Romesma 7:2, 3). Jehovah no wani si na ai te sma e brokotrow sondro bijbel reide èn e trow nanga wan tra sma. — Maleaki 2:14-16.

[Prenki na tapoe bladzijde 16, 17]

Wan lobi-ati papa e sorgoe gi en osofamiri na skinfasi èn na jejefasi

[Prenki na tapoe bladzijde 17]

Gado e froewakti foe papa nanga mama foe leri den pikin foe den èn foe piri-ai gi den

Lès 9

Foetoeboi foe Gado moesoe de krin

Foe san ede wi moesoe de krin na ala fasi? (1)

San a wani taki foe de krin na jejefasi? (2) krin na a sei foe boen gwenti nanga wet? (3) krin na froestan sei? (4) krin na skin sei? (5)

Foe sortoe taki di no krin wi moesoe tan farawe? (6)

1. Jehovah Gado krin èn a santa. A e froewakti foe den anbegiman foe en foe tan krin — na jejefasi, na a sei foe boen gwenti nanga wet, na froestan sei, èn na skin sei (1 Petrus 1:16). A e aksi foeroe moeiti foe tan krin ini na ai foe Gado. Wi e libi na ini wan grontapoe di no krin. Wi abi wan feti toe nanga wi eigi firi foe doe san fowtoe. Ma wi no moesoe gi abra.

2. Krinfasi na jejefasi: Efoe wi wani dini Jehovah, dan wi no kan tan hori na no wan foe den leri noso gwenti foe falsi relisi. Wi moesoe komoto na ini falsi relisi èn no horibaka gi en na no wan fasi (2 Korentesma 6:14-18; Openbaring 18:4). Te wi kon leri a waarheid kaba di abi foe doe nanga Gado, dan wi moesoe loekoe boen foe sma, di e leri trawan sani di no troe, no kori wi. — 2 Johanes 10, 11.

3. Krinfasi na a sei foe boen gwenti nanga wet: Jehovah wani meki ala ten den anbegiman foe en e tjari densrefi leki troe kresten (1 Petrus 2:12). A e si ala sani san wi e doe, srefi den sani di wi e doe na wan kibri fasi (Hebrewsma 4:13). Wi moesoe tan farawe foe seks hoeroedoe nanga tra doe di no krin, foe a grontapoe disi. — 1 Korentesma 6:9-11.

4. Krinfasi na froestan sei: Efoe wi e foeroe a froestan foe wi nanga krin èn soifri prakseri, dan a fasi fa wi e tjari wisrefi sa krin toe (Filipisma 4:8). Ma efoe wi e tan poti wi prakseri na tapoe sani di no krin, dan a sa abi ogri doe leki bakapisi (Mateus 15:18-20). Wi moesoe tan farawe foe den fasi foe meki prisiri di ben kan doti a froestan foe wi. Wi kan foeroe a froestan foe wi nanga krin prakseri te wi e studeri a Wortoe foe Gado.

5. Krinfasi na skin sei: Foe di kresten e teki presi gi Gado, meki den moesoe hori den skin nanga krosi foe den krin. Wi moesoe wasi wi anoe baka te wi e go na toilet, èn wi moesoe wasi den bifo wi e go njan noso e hori njanjan sani. Efoe joe no abi wan boen toilet sistema noso koemakoisi, dan joe moesoe beri a koenkoen (Deuteronomium 23:12, 13). Foe tan krin na skin sei e jepi foe abi wan boen gosontoe. Wan oso foe wan kresten moesoe de netjes èn krin na inisei èn na dorosei. A moesoe de aparti leki wan boen eksempre gi den sma na ini a birti.

6. Taki di krin: Foetoeboi foe Gado moesoe taki waarheid ala ten. Leiman no sa go na ini a Kownoekondre foe Gado (Efeisesma 4:25; Openbaring 21:8). Kresten no e gebroiki grofoe taki. Den no e arki noso e froeteri doti spotoe noso fisti tori. Foe di a taki foe den krin, meki den de aparti leki sma di de tra fasi na wrokope noso na skoro èn na ini a birti pe den e tan. — Efeisesma 4:29, 31; 5:3.

[Prenki na tapoe bladzijde 18, 19]

Foetoeboi foe Gado moesoe de krin na ala fasi

Lès 10

Den doe di Gado no wani si na ai

Fa joe moesoe denki foe sani di Gado e taki dati den takroe? (1)

Sortoe fasi foe tjari wisrefi na seks sei, fowtoe? (2)

Fa wan kresten moesoe si lei? (3) dòbel? (3) foefoeroe? (3) ogri di e doe nanga tranga? (4) afkodrei? (5) droengoe? (6)

Fa wan sma kan tapoe nanga takroe doe? (7)

1. Foetoeboi foe Gado lobi san boen. Ma den moesoe leri toe foe no wani si san takroe na ai (Psalm 97:10). Dati wani taki foe tan farawe foe son doe di Gado no wani si na ai. San na wan toe foe den doe disi?

2. Hoeroedoe: Abi seks bifo wan sma trow, soetadoe, seks na mindri wan libisma nanga wan meti, seks nanga joe eigi famiri, nanga homo-sekslibi na alamala serjoesoe sondoe teige Gado (Lefitikus 18:6; Romesma 1:26, 27; 1 Korentesma 6:9, 10). Efoe wan paar no trow, ma den e libi makandra, dan den moesoe prati noso trow na lanti. — Hebrewsma 13:4.

3. Lei, Dòbel, Foefoeroe: Jehovah Gado no kan lei (Titus 1:2). Sma di wani feni a boen-ati foe en, moesoe tan farawe foe lei (Odo 6:16-19; Kolosesma 3:9, 10). Bigi-ai pori ibri sortoe foe dòbel. Dati meki kresten no e teki prati na no wan sortoe foe dòbel soleki lotrei, streilon foe asi, nanga bingo (Efeisesma 5:3-5). Èn kresten no e foefoeroe. Den no e bai foefoeroe sani ala di den sabi dati noso teki sani sondro primisi. — Exodus 20:15; Efeisesma 4:28.

4. Atibron, Ogri di e doe nanga tranga: Atibron di wan sma no man basi, kan tjari en go doe ogri nanga tranga (Genesis 4:5-8). Wan sma di e doe ogri nanga tranga no kan de wan mati foe Gado (Psalm 11:5; Odo 22:24, 25). A fowtoe foe teki refensi noso pai baka nanga ogri foe den takroe sani di trawan ben sa kan doe nanga wi. — Odo 24:29; Romesma 12:17-21.

5. Wisi nanga Afkodrei: Son sma e begi foe kisi a krakti foe den jeje foe proeberi foe dresi siki. Trawan e wisi den feanti foe den foe meki den siki noso srefi foe kiri den. Satan na a krakti na baka ala den doe disi. Dati meki kresten no moesoe teki prati na no wan foe den (Deuteronomium 18:9-13). Tan krosibei na Jehovah na a moro boen kibri gi a wisi di trawan kande wisi wi. — Odo 18:10.

6. Droengoe: A no fowtoe foe dringi pikinso win, biri noso tra dringi di abi sopi na ini (Psalm 104:15; 1 Timoteus 5:23). Ma foe dringi pasa marki nanga droengoe, fowtoe na ini na ai foe Gado (1 Korentesma 5:11-13; 1 Timoteus 3:8). Dringi toemoesi foeroe kan pori a gosontoe foe joe èn broko joe osofamiri. A kan meki joe broko kindi esi-esi toe gi tra tesi. — Odo 23:20, 21, 29-35.

7. Sma di e doe sani di Gado taki dati den takroe, „no [sa] kisi a kownoekondre foe Gado” (Galasiasma 5:19-21). Efoe joe lobi Gado troetroe èn wani plisi en, dan joe kan tapoe nanga den doe disi (1 Johanes 5:3). Leri foe no wani si na ai san Gado e taki dati a takroe (Romesma 12:9). De makandra nanga sma di abi gwenti di abi foe doe nanga a dini foe Gado (Odo 13:20). Lepi kresten kompe kan sori taki den de wan fonten foe jepi (Jakobus 5:14). Moro foeroe, froetrow na tapoe a jepi di Gado e gi nanga jepi foe begi. — Filipisma 4:6, 7, 13.

[Prenki na tapoe bladzijde 20, 21]

Gado no wani si droengoe, foefoeroe, dòbel, nanga a doe foe ogri nanga tranga, na ai

Lès 11

Bribi nanga gwenti di no e plisi Gado

Sortoe bribi nanga gwenti fowtoe? (1)

Kresten moesoe bribi taki Gado na wan Dri-wánfasi? (2)

Foe san ede troe kresten no e hori Kresneti, Pasen, noso frijaridei? (3, 4)

Den dedewan kan doe den libiwan ogri? (5)

Jesus ben dede na wan kroisi? (6)

O prenspari a de foe plisi Gado? (7)

1. A no ala bribi nanga gwenti takroe. Ma Gado no e feni den boen efoe den e kon foe falsi relisi noso de teige den leri foe bijbel. — Mateus 15:6.

2. Dri-wánfasi: Jehovah na wan Dri-wánfasi — dri sma ini wán Gado? Nôno! Jehovah, a Tata, na „a wan-enkri troe Gado” (Johanes 17:3; Markus 12:29). Jesus na En fosi gebore Manpikin èn a de na Gado ondro (1 Korentesma 11:3). A Tata moro bigi leki a Manpikin (Johanes 14:28). A santa jeje a no wan sma; na a wroko krakti foe Gado. — Genesis 1:2; Tori foe den Apostel 2:18.

3. Kresneti nanga Pasen: Jesus no ben gebore tapoe 25 december. A ben gebore wan sani foe 1 oktober, wan ten foe a jari di skapoeman ben hori den ipi foe den na dorosei na netiten (Lukas 2:8-12). Noiti Jesus ben gi kresten a komando foe hori fesa foe a dei di en mama meki en. Na presi foe dati, a ben taigi den disipel foe en foe tjari kon na prakseri, noso memre, a dede foe en (Lukas 22:19, 20). Kresneti nanga den gwenti foe en kon foe falsi relisi foe owroeten. A srefi de troe nanga den gwenti foe Pasen, soleki a gebroiki foe eksi nanga konikoni. Den fositen kresten no ben hori Kresneti noso Pasen, èn so srefi troe kresten na ini a ten disi toe.

4. Frijaridei: Den soso toe frijari-oso di bijbel e taki foe den, na sma di no ben anbegi Jehovah, ben hori den (Genesis 40:20-22; Markus 6:21, 22, 24-27). Den fositen kresten no ben hori frijaridei. A gwenti foe hori frijaridei kon foe falsi relisi foe owroeten. Troe kresten e gi presenti èn abi wan boen ten nanga makandra na tra ten na ini a jari.

5. Frede gi den dedewan: Den dedewan no kan doe wan sani noso firi wan sani. Wi no kan jepi den èn den no kan doe wi ogri (Psalm 146:4; Preikiman 9:5, 10). A sili e dede; a no e tan libi baka te wan sma dede (Esekièl 18:4). Ma son tron ogri engel, di den e kari ogri jeje, e doe leki den na den jeje foe den dedewan. Ibri gwenti di abi foe doe nanga frede noso anbegi foe den dedewan, fowtoe. — Jesaja 8:19.

6. Kroisi: Jesus no ben dede na wan kroisi. A ben dede na wan paal, noso wan postoe. A Griki wortoe di vertaal nanga „kroisi” na ini foeroe bijbel, wani taki wán pisi oedoe nomo. A simbôl foe a kroisi kon foe falsi relisi foe owroeten. Den fositen kresten no ben gebroiki noso anbegi a kroisi. Foe dati ede, joe denki taki a ben sa joisti foe gebroiki wan kroisi ini na anbegi foe Gado? — Deuteronomium 7:26; 1 Korentesma 10:14.

7. A kan de moeilek srefisrefi foe libi wan toe foe den bribi nanga gwenti disi. Famiriman nanga mati sa proeberi kande foe overtoigi joe foe no kenki den bribi foe joe. Ma foe plisi Gado moro prenspari leki foe plisi libisma. — Odo 29:25; Mateus 10:36, 37.

[Prenki na tapoe bladzijde 22]

Gado a no wan Dri-wánfasi

[Prenki na tapoe bladzijde 23]

Kresneti nanga Pasen e kon foe falsi relisi foe owroeten

[Prenki na tapoe bladzijde 23]

Reide no de foe anbegi den dedewan noso foe frede den

Lès 12

Sori lespeki gi libi nanga broedoe

Fa wi moesoe si libi? (1) poeroebere? (1)

Fa kresten e sori taki den e hori a tanboen foe sma na prakseri? (2)

A fowtoe foe kiri meti? (3)

San na wan toe doe di no e sori lespeki gi libi? (4)

San na a wet foe Gado ini a tori foe broedoe? (5)

Broedoe transfusie de na ini disi toe? (6)

1. Jehovah na a Fonten foe libi. Ala libi sani abi foe taki Gado tangi foe a libi foe den (Psalm 36:9). Libi na wan santa sani gi Gado. Srefi a libi foe wan pikin di no gebore ete, èn di de na ini en mama bere, na wan diri sani gi Jehovah. Foe kiri foe espresi so wan beibi di e gro, fowtoe na ini na ai foe Gado. — Exodus 21:22, 23; Psalm 127:3.

2. Troe kresten e hori a tanboen foe sma na prakseri. Den e sorgoe taki na oto nanga oso foe den de sondro kefar (Deuteronomium 22:8). Foetoeboi foe Gado no e poti a libi foe den ini kefar sondro foe a de fanowdoe, soso foe prisiri noso sensâsi ede. So boen, den no e teki prati na den ogri-ati sport di foe espresi e gi sma skin-ati. Den e tan farawe foe prisiri di e gi deki-ati foe doe sma ogri nanga tranga. — Psalm 11:5; Johanes 13:35.

3. A libi foe meti na wan santa sani toe gi a Mekiman. Wan kresten kan kiri meti foe sorgoe gi njanjan nanga krosi noso foe kibri ensrefi gi siki nanga kefar (Genesis 3:21; 9:3; Exodus 21:28). Ma a fowtoe foe meshandri meti noso foe kiri den soso foe sport noso prisiri ede. — Odo 12:10.

4. Smoko, kaw pinangnoto, èn gebroiki drug foe prisiri ede no de gi kresten. Den doe disi fowtoe, bika (1) den e meki wi tron den srafoe foe den, (2) den e doe wi skin ogri, èn (3) den no krin (Romesma 6:19; 12:1; 2 Korentesma 7:1). A kan de wan moeilek sani srefisrefi foe tapoe nanga den gwenti disi. Ma wi moesoe doe dati foe plisi Jehovah.

5. Broedoe santa toe na ini na ai foe Gado. Gado e taki dati a sili, noso libi, de na ini a broedoe. Dati meki a fowtoe foe njan broedoe. A fowtoe toe foe njan a meti foe wan meti di a broedoe no lon komoto na wan boen fasi. Efoe den tjokro wan meti kiri noso a dede na ini wan trapoe, dan wi no moesoe njan en. Efoe den soetoe en nanga lansri noso gon, dan den moesoe meki a broedoe lon komoto esi-esi, efoe wi o njan en. — Genesis 9:3, 4; Lefitikus 17:13, 14; Tori foe den Apostel 15:28, 29.

6. A fowtoe foe teki broedoe transfusie? Memre taki Jehovah e aksi taki wi tan farawe foe broedoe. Disi wani taki dati wi no moesoe teki kwetikweti na no wan enkri fasi tra sma broedoe na ini wi skin noso srefi wi eigi broedoe di den teki poti na wan presi (Tori foe den Apostel 21:25). Dati meki troe kresten no sa teki wan broedoe transfusie. Den sa teki tra sortoe datra jepi, soleki transfusie foe sani di no abi broedoe. Den wani libi, ma den no sa proeberi foe kibri a libi foe den foe di den e pasa den wet foe Gado. — Mateus 16:25.

[Prenki na tapoe bladzijde 25]

Foe plisi Gado, wi moesoe tan farawe foe broedoe transfusie, foe gwenti di no krin, èn foe sani di e poti a libi foe wi ini kefar sondro foe a de fanowdoe