Fu san ede wi musu begi na ini a nen fu Yesus?

FURU TRON, Yesus ben e leri sma fa fu begi. Di a ben de na grontapu, den Dyu kerki fesiman ben gwenti fu begi „na tapu den uku fu den bigi strati”. Fu san ede? ’So taki sma ben kan si den.’ A de krin taki den ben wani sori sma taki den ben de fayafaya na ini na anbegi fu den, so taki den sma ben kan lespeki den. Furu fu den ben e begi langa èn den ben e taki den srefi sani ibri tron baka, fu di den ben e denki taki den ben musu „taki furu sani” so taki Gado ben kan arki den begi fu den (Mateyus 6:5-8). Yesus ben sori taki na fu soso sma e du den sortu sani disi, èn na so a yepi opregtisma fu kon sabi san den no musu du te den e begi. Ma boiti taki a leri sma fa den no musu begi, a leri den tra sani tu di abi fu du nanga begi.

Yesus leri wi taki te wi e begi, wi musu sori taki wi wani a nen fu Gado kon santa, taki a Kownukondre fu En kon, èn taki sma du a wani fu En. Yesus leri wi tu taki a fiti fu aksi Gado fu yepi wi nanga sani di abi fu du nanga wi eigi libi (Mateyus 6:9-13; Lukas 11:2-4). Yesus gebroiki agersitori fu sori taki efu wi wani taki Gado piki den begi fu wi, dan wi musu horidoro te wi e begi, wi musu abi bribi, èn wi musu abi sakafasi (Lukas 11:5-13; 18:1-14). Èn na eksempre fu en meki taki den sani di a ben taki ben abi furu krakti tapu sma.—Mateyus 14:23; Markus 1:35.

A no de fu taki, dati den rai disi yepi den disipel fu Yesus fu begi na wan moro opregti fasi. Ma Yesus wakti teleki a lasti neti di a ben de na grontapu, fu leri den disipel fu en a moro prenspari sani di abi fu du nanga begi.

„Wan prenspari kenki di kon na ini a fasi fa sma musu begi”

A neti fosi Yesus dede, a teki ala en ten fu gi den getrow apostel fu en deki-ati. Dati ben de a yoisti ten fu leri den wan nyun sani. Yesus ben taigi den: „Mi na a pasi, a waarheid nanga a libi. Nowan sma kan kon na a Tata, efu mi no yepi en.” Bakaten, a gi den a moi dyaranti disi: „Mi o du ala sani di unu e aksi na ini mi nen, so taki den sani di a Manpikin e du, kan gi a Tata glori. Ala sani di unu e aksi na ini mi nen, mi o du.” Na a kaba fu a takimakandra fu en, a taki: „Teleki now unu no aksi nowan sani na ini mi nen. Aksi, dan unu o kisi, so taki unu sa prisiri pasa marki.”—Yohanes 14:6, 13, 14; 16:24.

Den wortu disi ben prenspari trutru. Wan buku e taki dati disi ben de „wan prenspari kenki di kon na ini a fasi fa sma musu begi”. Yesus no ben wani sori sma taki den musu begi en now, na presi fu Gado. Na presi fu dati, a ben leri den wan nyun fasi fa den kan begi Yehovah Gado.

A no de fu taki dati ala ten Gado ben e arki den begi fu den getrow futuboi fu en (1 Samuel 1:9-19; Psalm 65:2). Ma sensi a ten di Gado meki wan frubontu nanga Israel, sma di ben wani taki Gado arki den begi fu den, ben musu bribi taki Gado ben teki Israel leki a pipel fu en. Èn bakaten, sensi a ten fu Salomo, sma ben musu si a tempel leki a presi pe Gado ben wani taki sma ben musu tyari srakti-ofrandi (Deuteronomium 9:29; 2 Kroniki 6:32, 33). Ma a no ala ten sma ben o anbegi Gado na a fasi disi. Na apostel Paulus ben skrifi taki a Wet di Gado ben gi Israel, èn den srakti-ofrandi di den ben e tyari na a tempel, ben de „wan skaduw fu den bun sani di [ben] musu kon ete, ma a no de a trutru sani srefi” (Hebrewsma 10:1, 2). A trutru sani ben musu kon na ini a presi fu a skaduw (Kolosesma 2:17). Sensi a yari 33, sma di wani abi wan bun matifasi nanga Gado, no abi fu hori densrefi moro na a Wet di Gado ben gi Moses. Na presi fu dati, wan sma di wani abi wan bun matifasi nanga Gado, musu gi yesi na a sma di a Wet ben taki fu en, namku Krestes Yesus.—Yohanes 15:14-16; Galasiasma 3:24, 25.

Wan nen „di hei moro ibri tra nen”

Yesus seti wan moro bun fasi fa wi kan begi Yehovah. Yesus meki wi kon sabi taki en na wan mati di abi furu makti, iya, wan mati di e opo a pasi so taki Gado kan yere èn kan piki den begi fu wi. Fa a du kon taki Yesus man du disi gi wi?

Fu di wi alamala gebore na ini sondu, meki nowan sani di wi e du èn nowan ofrandi di wi e tyari, kan krin wi fu sondu. Boiti dati, nowan fu den sani dati kan gi wi a reti fu abi wan matifasi nanga wi santa Gado, Yehovah (Romesma 3:20, 24; Hebrewsma 1:3, 4). Ma Yesus gi en volmaakti libi leki wan ofrandi gi wi, èn a pai gi den sondu fu den libisma di kan kisi wan bun matifasi baka nanga Gado (Romesma 5:12, 18, 19). Now, ala sma di wani kon krin fu den sondu fu den abi na okasi fu kon abi wan bun nen na Yehovah èn fu „taki fri” nanga En. Ma den musu sori bribi fosi na ini na ofrandi fu Yesus, èn den musu begi na ini a nen fu en.—Efeisesma 3:11, 12.

Te wi e begi na ini a nen fu Yesus, dan wi e sori taki wi e bribi na ini dri sani di abi fu du nanga a frantwortu di Yesus abi fu meki a wani fu Gado kon tru. Wi e bribi taki: (1) En na „a Pikin Skapu fu Gado”, èn taki a srakti-ofrandi fu en e meki taki wi kan kisi pardon fu den sondu fu wi. (2) Yehovah gi en wan opobaka èn now a e dini leki „granpriester” di e sorgu taki sma e kisi wini fu a frulusu-ofrandi fu en. (3) En wawan na „a pasi”, èn dati wani taki dati wi kan begi Yehovah soso nanga yepi fu Yesus.—Yohanes 1:29; 14:6; Hebrewsma 4:14, 15.

Te wi e begi na ini a nen fu Yesus, dan wi e gi grani na en. A fiti fu gi en a grani dati, fu di Yehovah wani taki ibri sma musu ’boigi en kindi na ini a nen fu Yesus, èn ibri tongo musu taki krin dati Yesus Krestes na Masra, so taki Gado a Tata kan kisi glori’ (Filipisma 2:10, 11). Ma san moro prenspari, na taki te wi e begi na ini a nen fu Yesus, dan wi e gi glori na Yehovah, a sma di gi en Manpikin leki wan ofrandi gi a bun fu wi.—Yohanes 3:16.

Na ini Bijbel, Yesus abi difrenti nen di e yepi wi fu frustan sortu bigi frantwortu a abi. Den nen disi e yepi wi fu kon frustan o furu wini den sani di Yesus du kaba gi wi, den sani di a e du gi wi nownowde, èn den sani di a o du gi wi na ini a ten di e kon, sa tyari kon gi wi. (Luku a faki „A tumusi prenspari frantwortu di Yesus abi” .) Fu tru, Yesus kisi „a nen di hei moro ibri tra nen”.a A kisi ala makti na hemel èn na grontapu.—Filipisma 2:9; Mateyus 28:18.

A no musu de wan gwenti nomo

Iya, efu wi wani taki Yehovah arki den begi fu wi, dan wi musu begi na ini a nen fu Yesus (Yohanes 14:13, 14). Ma noiti wi musu teki en leki wan gwenti nomo fu taki den wortu „na ini a nen fu Yesus”. Fu san ede wi no wani du dati?

Luku na agersitori disi. Te yu kisi wan brifi fu wan bisnisman, dan kande na a kaba fu a brifi yu kan leisi den wortu „tan bun” di sma gwenti skrifi na a kaba fu den sortu brifi disi. Yu ben o bribi taki a bisnisman e winsi a sani disi gi yu trutru, noso taki a e du wan sani nomo di sma gwenti du te den e skrifi brifi? Iya, te wi e taki den wortu „na ini a nen fu Yesus”, dan wi musu du dati na wan opregti fasi. Den wortu disi no musu de leki den wortu na a kaba fu wan brifi di wan bisnisman skrifi. Aladi wi musu „begi doronomo”, wi musu du dati nanga wi „heri ati”. Iya, te wi e begi, dan wi no musu teki en leki wan gwenti fu taki den srefi sani ibri tron baka.—1 Tesalonikasma 5:17; Psalm 119:145.

Fa yu kan sorgu taki yu no e teki en leki wan gwenti nomo fu gebroiki den wortu „na ini a nen fu Yesus”? We, kande yu kan denki dipi fu den moi fasi fu Yesus. Prakseri fu den sani di a du kaba gi yu, èn fu den sani di a wani du gi yu na ini a ten di e kon. Te yu e begi, dan a bun fu taigi Yehovah tangi èn fu prèise en gi den tumusi moi sani di a meki en Manpikin du. Te yu e du dati, dan yu sa kisi moro frutrow na ini a pramisi disi di Yesus ben gi: „Iniwan sani di unu e aksi a Tata, a o gi unu na ini mi nen.”—Yohanes 16:23.