„Tan du den sani di mi taki”

„Efu unu tan du den sani di mi taki, dan unu na mi disipel trutru. Unu o sabi san tru èn dati o meki unu kon fri.”​—YOHANES 8:31, 32.

San disi wani taki? Den ’sani di Yesus ben taki’, na den sani di a ben e leri sma èn di ben e kon fu wan sma di hei moro en. „A Tata di seni mi kon, taigi mi san mi musu taki èn san mi musu leri sma”, na so Yesus ben taki (Yohanes 12:49). Di Yesus ben e begi en hemel Tata, Yehovah Gado, dan a taki: „Yu wortu e taki san tru.” A ben gwenti gebroiki Gado Wortu te a ben e gi leri (Yohanes 17:17; Mateyus 4:4, 7, 10). Fu dati ede, tru Kresten e ’tan du den sani di a taki’. Iya, den e si a Wortu fu Gado, Bijbel, leki wan buku di e taki „san tru” èn leki a wan-enkri buku di e sori den san den musu bribi èn fa den musu tyari densrefi.

Fa a ben de nanga den fosi Kresten? Na apostel Paulus di skrifi furu fu den Bijbel buku, ben abi lespeki tu gi Gado Wortu, neleki Yesus. A ben skrifi: ’Na Gado srefi ben meki sma skrifi ala den sani di de na ini Gado Buku, èn den sani disi bun’ (2 Timoteyus 3:16). Den man di ben kisi a frantwortu fu gi den Kresten leri, ben musu ’hori densrefi finifini na a wortu di tru’ (Titus 1:7, 9). Den fosi Kresten ben kisi a rai fu wai pasi gi ’soso takitaki di e bedrigi sma, fu di den sani disi no abi noti fu du nanga den leri fu Krestes, ma nanga den gwenti fu libisma èn nanga den sani di e tiri grontapu’.​—Kolosesma 2:8.

Suma e du a sani dati na ini a ten disi? Wan buku fu a Lomsu kerki e taki: „A Lomsu Kerki no e luku nomo san den Santa Buku fu Bijbel e taki fu kon sabi efu ala den sani di kon na krin de so trutru. Sobun, a srefi lespeki di sma abi gi den Santa Buku fu Bijbel, den musu abi tu gi den gwenti di wi e si leki santa sani.” Wan artikel na ini a tijdschrift Maclean’s ben e taki fu wan domri na ini Toronto, Kanada, di ben aksi: „Fu san ede wi musu meki wan denki fu 2000 yari pasa tiri wi fu du sani tra fasi? Wi abi wi eigi moi denki, ma wi e meki den lasi krakti doronomo te wi e luku efu den e kruderi nanga san Yesus noso Bijbel e taki.”

Wan buku e taki fu Yehovah Kotoigi: „Den e si Bijbel leki a wan-enkri buku di musu sori den san den musu bribi èn fa den musu tyari densrefi” (New Catholic Encyclopedia). No so langa pasa, wan Kotoigi sisa na ini Kanada ben wani taigi wan man drape suma na en. Ne a man koti en mofo èn a taki: „Mi sabi suma na yu,” aladi a sori go na a Bijbel fu en, „mi si a Bijbel fu yu”.