Bijbel e leri wi taki Gado, a Manpikin, nanga a santa yeye na wán Gado?

▪ Furu difrenti fasi de fa sma e frustan a leri disi. Wan fu den na: „Dri gado de (a Tata, a Manpikin, a Santa Yeye), sma e taki dati ibriwan fu den e libi fu têgo, ibriwan fu den almakti, nowan fu den moro hei noso moro lagi leki a trawan, ibriwan fu den na Gado, toku ala dri makandra na wán Gado nomo.” Bijbel e leri wi a sani disi?

Nofo tron sma e kari Mateyus 28:19 fu sori taki a leri disi tru. A Nyun Testamenti e taki fu Yesus: „Un go na ala folku fu grontapu. Un musu meki den kon tron sma di e teki leri fu Mi. Dopu den ini a nen fu a P’pa, a Manpikin nanga a Santa Yeye.” A tru taki a tekst e taki fu ala den dri sani, a Tata, a Manpikin èn a santa yeye (noso yeye). Ma a tekst no e taki dati den na wán. Yesus ben taigi den Dyu bakaman fu en fu gi sma leri èn fu dopu den na ini a nen fu a Tata, a Manpikin, nanga a santa yeye. San a Dyu pipel ben e bribi?

Di den Israelsma ben kisi a Wètfrubontu di de wan pisi fu Bijbel, dan Gado taigi den: „Noiti unu musu anbegi tra gado, boiti mi” (Deuteronomium 5:7). Omeni sma ben e taki dyaso? Deuteronomium 6:4 e taki krin: „Arki, un Israelsma: Yehovah wi Gado na wán Yehovah.” Iya, a de krin taki a no dri sma ben taki, ma wán sma nomo. No so langa na fesi, Gado ben frulusu den Israelsma komoto na Egepte pe sma ben e anbegi grupu fu dri gado di den ben e si leki wán gado. Wan fu den grupu dati na a di fu den gado Osiris, Isis nanga Horus (a prenki na a kruktu-anusei). Fu dati ede, Gado ben taigi den Israelsma taki den ben musu anbegi wán Gado nomo. O prenspari a ben de gi sma fu frustan a sani disi di Gado ben taki? Sabiman Dr. J. H. Hertz, di ben de wan Dyu leriman tu ben taki: „A krin warskow disi taki sma ben musu anbegi wán Gado nomo, ben e sori taki Gado no ben feni en bun kwetikweti taki sma ben e anbegi moro leki wán gado . . . A Syema e sori taki a leri di den Kresten kerki abi taki dri gado de na ini wán, na wan sani di no tru, fu di Gado na wán sma nomo.”a

Fu di Yesus ben gebore leki wan Dyu, meki a ben leri fu du a srefi sani dati. Baka di a teki dopu èn Didibri pruberi fu kori en, Yesus taki: „Gowe fu dya, Satan! Bika Gado Buku taki: ’Na Yehovah yu Gado, yu musu anbegi èn na en wawan yu musu dini’” (Mateyus 4:10; Deuteronomium 6: 13). Wi kan leri awansi tu sani dyaso. A fosi sani, na taki Satan ben pruberi fu kori Yesus fu anbegi wan tra gado boiti Yehovah, èn dati no ben o man efu Yesus ben de Gado tu. A di fu tu sani, na taki Yesus ben sori krin taki wán Gado nomo de, fu di a taki na „en wawan” wi musu anbegi. A no ben taki na „wi” sma musu dini. Na dati Yesus ben o taki efu a ben de Gado tu.

Te sma e kon frustan a soifri leri fu Gado èn te den wani dini en, dan den e teki dopu „na ini a nen fu a Tata, fu a Manpikin, èn fu a santa yeye” (Mateyus 28:19). Den e frustan taki Yehovah na a tru Gado èn taki Yesus abi a frantwortu fu meki a wani fu En kon tru. Den e bribi den sani disi tu (Psalm 83:18; Mateyus 28:18). Den e frustan tu san na a santa yeye fu Gado, noso a krakti fu en, èn fa a yeye e wroko.​—Genesis 1:2; Galasiasma 5:22, 23; 2 Petrus 1:21.

A leri di e taki dati Gado, a Manpikin, nanga a santa yeye na wán, e bruya sma hondrohondro yari langa kaba. Ma na a tra sei, Yesus meki den bakaman fu en kon frustan san tru èn a leri den fu anbegi „a wan-enkri tru Gado”, Yehovah.​—Yohanes 17:3.

[Futuwortu]

[Sma di abi a reti fu a prenki na tapu bladzijde 23]

Musée du Louvre, Paris