Bijbel e kenki sma libi
SAN yepi wan uma na Filippijnen fu tapu nanga a gwenti di a ben abi fu dringi furu sopi èn fu meki taki na osofamiri fu en kon de moro koloku? Fu san ede wan man na Australia di ben lobi feti karate tron wan preikiman fu a bun nyunsu? Leisi san den sma disi abi fu taki.
„A ben teki ten fu kenki.”—CARMEN ALEGRE
A GEBORE NA INI 1949
KONDRE: FILIPPIJNEN
FOSI: A BEN E DRINGI SOPI PASA MARKI
A LIBI FU MI FOSI: Mi gebore na San Fernando, wan foto na a distrikt Camarines Sur. Ma a moro bigi pisi fu mi libi mi tan na Antipolo, na a distrikt Rizal. Antipolo de na wan bergikontren pe furu grasi nanga bon e gro. Di mi froisi go drape, a ben de wan pikin foto di no ben abi furu sma. Te neti furu sma no ben waka na strati. Ma now Antipolo na wan bigi foto di lai nanga sma.
Baka di mi froisi go na Antipolo mi miti wan man di nen Benjamin èn baka wan pisi ten wi trow. A trowlibi ben de moro hebi leki san mi ben denki. Fu kan frigiti mi problema, mi bigin dringi furu sopi. Mi kon tron wan muilek sma èn dati ben de fu si na a fasi fa mi ben e libi nanga mi masra èn nanga den pikin fu mi. Mi ati ben e bron esi èn mi no ben abi pasensi nanga den. Boiti dati, mi no ben lespeki mi masra. Yu kan frustan taki wi osofamiri-libi no ben switi.
A FASI FA BIJBEL KENKI MI LIBI: Mi masra en sisa Editha na wan Yehovah Kotoigi èn a ben gi mi nanga Benjamin deki-ati fu studeri Bijbel nanga den Kotoigi. Na dati wi du fu di wi ben howpu taki wi osofamiri-libi ben o go moro bun.
Di wi studeri Bijbel wi kon leri furu moi tru tori. Spesrutu den wortu fu Openbaring 21:4 naki mi ati. A vers dati e taki fu den sma di o libi na ini wan grontapu paradijs di Gado Kownukondre o tiri. A e taki dati Gado „o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.” Mi ben wani de wan fu den sma di ben o kisi den blesi dati.
Mi kon frustan taki mi ben musu kenki den fasi nanga den gwenti fu mi. A ben teki ten fu kenki, ma te fu kaba mi ben man tapu nanga a gwenti fu dringi furu sopi. Mi ben leri tu fa fu sori mi osofamiri switifasi èn fa fu abi pasensi nanga den. Boiti dati, mi ben leri fu abi lespeki gi mi masra èn fu horibaka gi en leki edeman fu wi osofamiri.
Di mi nanga Benjamin bigin go na den konmakandra fu Yehovah Kotoigi, a ben naki wi ati fu si fa sani ben e go drape. Den Kotoigi no e dòbel, den no e dringi furu sopi, den no e teki sma sei èn den e sori lespeki gi ala sma. Wi ben sabi taki wi feni a tru bribi.—Yohanes 13:34, 35.
DEN WINI DI MI KISI: Wi osofamiri-libi de heri tra fasi now. Benjamin nanga mi abi wan koloku trowlibi èn wi breiti fu leri trawan san Bijbel e taki. Den tu bigi boi fu wi nanga den wefi fu den bigin studeri Bijbel tu. Wi howpu taki wán dei den o dini Yehovah makandra nanga wi. Iya, disi na a moro bun fasi fu libi.
„Mi ben denki taki noti no man pasa nanga mi.”—MICHAEL BLUNSDEN
A GEBORE NA INI 1967
KONDRE: AUSTRALIA
FOSI: A BEN LOBI KARATE
A LIBI FU MI FOSI: Mi kweki na ini Albury, wan moi foto na New South Wales pe bisnis ben e drai bun. Neleki fa a de na ini furu foto, dan ogridu ben de drape tu. Ma nofo tron, sma feni taki Albury na wan bun presi fu libi.
Di mi gro kon bigi, mi ben abi wan switi libi. Aladi mi papa nanga mama broko trow di mi ben abi seibi yari, toku den ben sorgu taki mi nanga mi brada nanga den tu sisa fu mi kisi ala san wi ben abi fanowdu. Mi kisi bun skoroleri fu di mi ben go na wan skoro na ini a birti dati di no de fu lanti. Mi papa ben wani taki te mi kaba nanga skoro, mi ben musu tron wan bisnisman. Ma san mi ben lobi moro na sport, fu di mi ben sabi rèi baisigri bun èn mi ben bun na ini karate. Te fu kaba mi teki wan wroko na wan presi pe den ben meki broko wagi. Disi ben gi mi moro ten fu poti prakseri na sport.
Mi ben lobi fu oefen mi skin bun. Son leisi, mi ben denki taki noti no man pasa nanga mi. Mi ben kan gebroiki a krakti fu mi makriki fu dwengi tra sma fu du san mi wani. Ma a sma di ben leri mi karate ben sabi taki mi ben meki muiti fu no du dati. Dati meki a ben leri mi fa fu dwengi misrefi èn fa fu tyari misrefi na wan fasi di fiti. A ben sori mi doronomo o prenspari a de fu tan hori den wèt fu karate.
A FASI FA BIJBEL KENKI MI LIBI: Di mi bigin studeri Bijbel, mi ben leri taki Yehovah no lobi ogridu (Psalm 11:5). Fosi, mi no ben si karate leki wan ogri sport, ma leki wan sport pe sma no man kisi mankeri. Mi ben denki taki neleki fa Bijbel e leri sma fu libi bun èn fu tyari densrefi na wan fasi di fiti, na so karate ben leri sma a sani dati tu. Den Kotoigi di ben studeri Bijbel nanga mi, ben abi furu pasensi. Noiti den taigi mi fu no feti karate moro, ma den tan leri mi den tru tori fu Bijbel.
Di mi kon leri moro fu Bijbel èn mi kon tron wan bun mati fu Yehovah, mi bigin si sani tra fasi. A naki mi ati di mi kon leri sortu eksempre Yesus, a Manpikin fu Yehovah, ben gi. Aladi Yesus ben abi furu makti, toku a no feti noiti. Mi ben lobi den wortu fu en na Mateyus 26:52: „A sma di e teki a feti-owru, na a feti-owru o kiri en.”
O moro mi ben leri fu Yehovah, o moro mi ben kon lobi en èn lespeki en. Te mi ben e prakseri fa wi Mekiman di abi so furu koni nanga makti, e broko en ede nanga mi, dan dati ben e naki mi ati. Mi ben breiti fu leri taki srefi te mi ben meki Yehovah firi sari noso te mi ben denki taki mi no man moro, dan Yehovah no ben o libi mi, solanga mi ben tan meki muiti. A pramisi disi fu en gi mi furu trowstu: „Mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu’” (Yesaya 41:13). Di mi kon frustan taki Gado ben sori mi a lobi dati, mi no ben wani lasi a lobi fu en.
Mi ben sabi taki efu mi ben o tapu nanga karate, dan dati ben o de a moro muilek sani fu du. Ma mi ben sabi tu taki a ben o plisi Yehovah èn mi ben de seiker taki fu dini en ben prenspari moro iniwan sani. A sani di yepi mi na den wortu fu Yesus na Mateyus 6:24: „Nowan sma kan dini tu masra leki srafu.” Mi kon frustan taki mi no ben o man dini Yehovah nanga mi heri ati efu mi ben o tan feti karate, fu di mi ben o poti tumusi furu prakseri na a sport disi. A ten ben doro fu bosroiti suma ben o de mi masra: Yehovah noso karate.
A no ben makriki fu tapu nanga karate. Na a wan sei mi ben breiti fu sabi taki mi ben meki Yehovah firi prisiri, ma na a tra sei mi ben abi a firi taki mi ben e drai baka gi a leriman fu mi. Nofo tron a de so taki sma di e feti karate e si en leki wan bigi sondu te wan sma e drai baka gi wan trawan. Son sma e kiri densrefi fu di den no wani teki a syen dati.
Mi no ben man fruteri mi leriman fu san ede mi ben tapu nanga karate. Na presi fu dati mi waka gowe èn noiti moro mi taki nanga a leriman èn nanga den karate mati fu mi. Mi ben sabi taki mi ben du a yoisti sani. Toku a ben hati mi taki mi no teki na okasi fu fruteri trawan fu a nyun bribi fu mi. A ben gersi leki mi meki Yehovah fesi fadon fosi mi bigin dini en srefi. A ben hebi gi mi trutru. Furu leisi mi pruberi fu begi Yehovah, ma na soso krei mi ben e krei.
A musu fu de taki Yehovah si wan bun sani na ini mi, fu di a meki den brada nanga sisa na ini a gemeente tan horibaka gi mi. A ben moi fu si fa den sori lobi gi mi, fa den trowstu mi èn fa den sori taki den ben de bunbun mati fu mi. A Bijbel tori fu David nanga Batseiba ben trowstu mi tu. Aladi David du bigi sondu, toku Yehovah gi en pardon di a sori trutru berow. Te mi e prakseri a tori dati, dan dati e yepi mi fu si den swakifasi fu mi na wan yoisti fasi.
DEN WINI DI MI KISI: Fosi mi ben studeri Bijbel, mi no ben span nanga tra sma. Mi ben denki misrefi nomo. Ma Yehovah nanga mi wefi di mi abi seibi yari kaba, yepi mi fu hori den firi fu trawan na prakseri. Wi kisi a grani fu studeri Bijbel nanga furu sma, sosrefi nanga sma di miti sari sani na ini den libi. Fu si fa a lobi fu Yehovah e naki na ati fu trawan, e gi mi moro prisiri leki fu de a moro bigi karate fetiman.
[Prenspari pisi na tapu bladzijde 14]
„Te mi ben e prakseri fa wi Mekiman di abi so furu koni nanga makti, e broko en ede nanga mi, dan dati ben e naki mi ati.”
[Faki/Prenki na tapu bladzijde 15]
„Tangi fu den moi artikel disi!”
Yu ben prisiri di yu leisi den ondrofenitori na tapu bladzijde 12-14? Disi na soso tu fu sowan 30 ondrofenitori di kon na ini A Waktitoren sensi augustus 2008. Furu sma lobi leisi den artikel di nen „Bijbel e kenki sma libi”. Fu san ede someni sma lobi den artikel disi?
Den sma di kari na ini den artikel e kon fu difrenti kondre nanga kulturu. Fosi den sma disi kon leri sabi Yehovah Gado, sonwan fu den ben abi wan bun libi, ma den no ben sabi san fu du nanga den libi. Trawan ben musu tyari bigi kenki kon fu di den ben gwenti kisi faya atibron èn den ben gebroiki drugs noso dringi furu sopi. Sonwan fu den ben sabi Yehovah di den ben pikin, ma di den gro kon bigi, den no ben wani dini en moro. Ala den ondrofenitori disi e sori taki sma man kenki den libi efu den wani plisi Gado. A sani disi e tyari wini kon ala ten. Sortu krakti den tori disi abi na tapu den leisiman fu wi?
Wan leisiman e sori fa na artikel fu 1 april 2009 yepi son umasma di ben de na strafu-oso.
◼ A e taki: „Furu uma di de na strafu e frustan fa den sma na ini na artikel e firi. Den fowtow di e sori fa den sma ben de fosi èn fa den de now, ben naki den ati, spesrutu te den ben leisi fa den sma libi ben de fosi. Furu fu den uma ben kisi fu du nanga den srefi sortu sani. Tu uma bigin studeri Bijbel, baka di den leisi den ondrofenitori disi.”—C. W.
Den ondrofenitori di skrifi na ini den artikel naki na ati fu son sma. Fu eksempre A Waktitoren fu 1 april 2011 ben abi na ondrofenitori fu Guadalupe Villarreal di bosroiti fu no de wan homo moro fu kan dini Yehovah. Luku san tu fu den furu brifi di kon fu leisiman e taki fu a tori disi.
◼ „Na ondrofenitori fu Guadalupe naki mi ati trutru. A moi fu si fa a lobi gi Yehovah nanga en Wortu kan kenki wan sma!”—L. F.
◼ „Fosi, mi ben pruberi fu taki nanga ala sma fu a bribi fu mi, sosrefi nanga homo. Ma no so langa pasa mi kon si taki mi no e taki moro nanga den sortu sma disi èn mi e wai pasi gi den srefi. Mi breiti taki na artikel disi kon na doro bika a yepi mi fu si den sortu sma disi leki fa Yehovah e si den. A e si den leki sma di kan tron anbegiman fu en.”—M. K.
Wan tra ondrofenitori di naki na ati fu furu sma, na a wan fu Victoria Tong di yu ben kan leisi na ini A Waktitoren fu 1 augustus 2011. Victoria ben taki fu den takru sani di a ondrofeni di a ben pikin. A ben taki dati aladi a ben e dini Yehovah furu yari kaba, toku a ben musu meki muiti fu bribi taki Yehovah lobi en. A e fruteri san yepi en fu kon si taki Yehovah lobi en trutru. Luku san wan tu leisiman taki fu a tori fu en.
◼ „Na ondrofenitori fu Victoria naki mi ati. Furu takru sani pasa na ini mi libi. Doronomo mi musu feti fu si sani na wan yoisti fasi, aladi mi de wan Kotoigi furu yari kaba. Ma na ondrofenitori fu Victoria gi mi deki-ati fu meki moro muiti fu kon si san Yehovah e si na ini mi.”—M. M.
◼ „Di mi ben yongu, mi ben feti nanga a gwenti fu luku seksbuku nanga seksfelem. No so langa pasa mi broko kindi baka gi a takru gwenti dati. Mi go suku yepi na den Kresten owruman èn mi e si taki mi man feti nanga a problema fu mi. Den owruman gi mi a dyaranti taki Gado lobi mi èn taki a abi sari-ati. Ma son leisi mi abi a firi taki mi no warti noti èn taki Yehovah no man lobi mi kwetikweti. Di mi leisi na ondrofenitori fu Victoria, dan dati yepi mi trutru. Now mi e frustan taki te mi e denki taki Gado no man gi mi pardon, dan mi e taki dati na ofrandi fu en Manpikin no man tapu den sondu fu mi. Mi poti na artikel disi aparti, so taki mi kan leisi en te mi e kisi a firi taki mi no warti noti. Tangi fu den moi artikel disi!”—L. K.