Bijbel e kenki sma libi

„Mi tron wan moro bun masra.”​—RIGOBERT HOUETO

• A GEBORE NA INI 1941

• KONDRE: BENIN

• A BEN ABI FO WEFI ÈN A BEN DE WAN GENSMAN FU DEN KOTOIGI

A LIBI FU MI FOSI:

Mi na fu Cotonou, wan bigi foto na ini Benin. Mi kweki leki wan Lomsu, ma mi no ben e go na kerki doronomo. Furu Lomsu sma fu a presi pe mi ben e libi ben abi moro leki wán wefi, fu di na a ten dati wèt ben e gi sma primisi fu libi na a fasi dati. Te fu kaba mi trow nanga fo uma.

Di wan refo bigin na ini den yari baka 1970, dan mi ben denki taki mi ben kan du wan sani gi a kondre fu mi. Mi horibaka dorodoro gi a refo èn mi go na ini a politiek. Den refo man no ben lobi Yehovah Kotoigi, fu di den Kotoigi no ben e teki sei na ini politiek afersi. Mi ben de wán fu den sma di ben e frufolgu den Kotoigi. Na ini 1976, di lanti taigi den zendeling fu den Kotoigi taki den ben musu komoto na ini a kondre, dan mi ben de seiker taki den no ben o kon noiti moro.

A FASI FA BIJBEL KENKI MI LIBI:

A refo kon na wan kaba na ini 1990. A fruwondru mi fu si taki syatu baka dati den zendeling fu den Kotoigi ben de na ini a kondre baka. Mi bigin denki taki kande Gado ben e horibaka gi den sma disi. Na a ten dati, mi go wroko na wan tra presi. Wan fu den sma na a wrokope dati ben de wan Kotoigi, èn a no draidrai fu fruteri mi fu a bribi fu en. A sori mi Bijbeltekst di ben e taki dati Yehovah na wan Gado fu lobi èn fu retidu (Deuteronomium 32:4; 1 Yohanes 4:8). Mi ben lobi den fasi dati. Èn fu di mi ben wani kon sabi moro fu Yehovah, meki mi agri fu teki wan Bijbelstudie.

Syatu baka dati, mi bigin go na den konmakandra fu Yehovah Kotoigi. Di mi si fa den sma drape ben lobi makandra trutru, dan a sani dati naki mi ati. Ala sortu sma ben de drape, sosrefi guduwan nanga pôtiwan, èn den no ben e desko makandra. O moro mi ben abi demakandra nanga den Kotoigi, o moro mi ben e si taki den Kotoigi ben de trutru bakaman fu Yesus.​—Yohanes 13:35.

Mi kon si taki efu mi ben wani dini Yehovah, dan mi ben o abi fu gowe libi a Lomsu Kerki. A sani dati no ben makriki gi mi, fu di mi ben frede san trawan ben o denki. Baka wan heri pisi ten èn nanga yepi fu Yehovah, mi teki deki-ati èn mi gowe libi a kerki.

Ma mi ben musu tyari ete wan bigi kenki kon. Di mi ben e studeri Bijbel, mi leri taki Gado no feni en bun taki wan man abi moro leki wán wefi (Genesis 2:18-24; Mateyus 19:4-6). Gado ben e agri soso nanga a fosi trow fu mi. Dati meki mi go skrifi na ini lantibuku taki mi ben trow nanga a fosi wefi fu mi, èn mi seni den tra wefi fu mi gowe. Ma mi seti sani so taki den ben e kisi san den ben abi fanowdu fu tan na libi. Baka wan pisi ten, tu fu den tron Yehovah Kotoigi.

DEN WINI DI MI KISI:

Aladi mi wefi tan wan Lomsu, toku a e lespeki a bosroiti di mi teki fu dini Yehovah. Wi ala tu feni taki mi tron wan moro bun masra.

Fosi, mi ben e denki taki mi ben kan tyari kenki kon na ini a libimakandra nanga yepi fu politiek, ma a muiti di mi meki ben de fu soso. Now mi sabi taki Gado Kownukondre na a wan-enkri lusu gi den problema fu libisma (Mateyus 6:9, 10). Mi de nanga tangi taki Yehovah sori mi fa mi kan libi wan trutru koloku libi.

„A no ben makriki fu tyari den kenki dati kon.”​—ALEX LEMOS SILVA

• A GEBORE NA INI 1977

• KONDRE: BRASYONKONDRE

• A BEN DE WAN FESIMAN FU A PINKSTER GEMEENTE

A LIBI FU MI FOSI:

Mi kweki na den boitipresi fu Itu, na ini a distrikt São Paulo. Na ini a kontren disi, ogridu ben lai srefisrefi.

Mi ben de wan tumusi ogri-ati sma èn mi ben e libi wan yayolibi. Boiti dati, mi ben e seri drugs. Baka wan pisi ten, mi kon si taki a libi dati ben o tyari mi go na strafu-oso noso na mi grebi. Fu dati ede, mi tapu nanga a libi dati. Baka dati, mi tron wan memre fu a Pinkster Gemeente èn te fu kaba mi tron fesiman.

Mi ben prakseri taki mi ben kan yepi sma trutru nanga a wroko di mi ben e du gi a kerki. Mi ben abi wan kerki programa tu na radio di sma fu a kontren ben kan arki. Na so sma fu a heri kontren kon sabi mi. Ma safrisafri mi kon si taki a kerki no ben e broko en ede nanga den memre fu en. A kerki no ben e prakseri srefisrefi fu gi Gado grani. Mi ben feni taki a ben e suku nomo fu kisi moni. Mi bosroiti fu gowe libi a kerki.

A FASI FA BIJBEL KENKI MI LIBI:

Di mi bigin studeri Bijbel nanga Yehovah Kotoigi, mi ben kan si wantewante taki den de tra fasi leki den sma fu tra bribi. Tu sani fu den mi ben lobi. A fosi sani, na taki Yehovah Kotoigi no e taki nomo dati den lobi Gado nanga tra sma, ma den e sori dati tu. A di fu tu sani, na taki den no e teki prati na politiek afersi èn na orloku (Yesaya 2:4). Den tu sani dati gi mi na overtoigi taki mi ben feni a tru bribi, iya, mi ben feni a pasi di e tyari sma go na têgo libi.​—Mateyus 7:13, 14.

Mi kon si taki efu mi ben wani plisi Gado, dan mi ben o abi fu tyari wan tu bigi kenki kon. Mi ben musu poti moro prakseri na mi osofamiri. Mi ben musu kon abi moro sakafasi tu. A no ben makriki fu tyari den kenki dati kon, ma nanga yepi fu Yehovah mi ben man du dati. A wefi fu mi ben breiti nanga den kenki di mi ben tyari kon. A ben bigin studeri Bijbel fosi mi, ma now a ben e go na fesi moro esi. Heri esi wi ala tu ben sabi taki wi ben wani tron Yehovah Kotoigi. Wi teki dopu na a srefi dei.

DEN WINI DI MI KISI:

Mi nanga mi wefi breiti taki wi man yepi den dri pikin fu wi fu kon abi wan bun matifasi nanga Yehovah. Wi na wan koloku osofamiri. Mi e taigi Yehovah tangi taki a yepi mi fu kon sabi den tru tori fu en Wortu, Bijbel. A e kenki sma libi trutru! Mi na wan eksempre fu dati.

„Mi konsensi no e fon mi moro.”​—VICTORIA TONG

• A GEBORE NA INI 1957

• KONDRE: AUSTRALIA

• A BEN DE WAN UMA DI BEN ONDROFENI TAKRU SANI DI A BEN PIKIN

A LIBI FU MI FOSI:

Mi kweki na ini a foto Newcastle, na New South Wales. Mi na a moro bigiwan fu seibi pikin. Mi papa ben de wan sopiman èn en nanga mi mama ben e handri na wan ogri-ati fasi nanga mi. Mi mama ben lobi fon mi èn a ben lobi taigi mi hati sani. Ibri tron baka a ben e taigi mi taki mi ben de wan takru pikin èn taki mi ben o bron na ini hel. Den sani dati ben e meki mi frede srefisrefi.

Den mankeri di mi ben e kisi te mi mama ben fon mi, ben meki taki nofo tron mi no ben man go na skoro. Di mi ben abi 11 yari, dan lanti puru mi na mi papa nanga mama, èn den poti mi na wan presi pe den e luku pikin di abi problema. Bakaten, den poti mi na wan presi pe non e tan. Di mi kon abi 14 yari, mi lon gowe fu a presi dati. Mi no ben wani go baka na oso èn fu dati ede mi ben e libi na strati na ini Kings Cross, wan presi na a lanki fu Sydney.

Di mi ben e libi na strati, mi bigin gebroiki drugs, mi bigin dringi sopi, mi bigin luku porno, èn mi bigin seri mi skin. Ne wan sani pasa nanga mi di meki mi kon frede srefisrefi. Mi ben e tan na ini na oso fu wan man di ben abi wan dansi-oso. Wan neti, tu man kon na en. A seni mi go na ini a sribikamra, ma mi ben kan yere san den ben e taki. A man di ben abi a dansi-oso ben e seti sani fu seri mi gi den tu man disi. Den ben o kibri mi na ini wan sipi di ben e tyari bigi lai, èn den ben o tyari mi go na Yapan fu wroko na ini wan bar. Fu di mi kon frede srefisrefi, meki mi dyompo fu a balkon, èn mi lon go suku yepi.

Mi miti wan man di ben kon na Sydney èn mi fruteri en fu a situwâsi fu mi, fu di mi ben e howpu taki a ben o gi mi moni. Na presi fu dati a kari mi kon na a presi pe a ben e tan, so taki mi ben kan wasi mi skin èn nyan wan sani. Na so mi kon tan drape, mi no gowe noiti moro. Wán yari baka dati, wi trow.

A FASI FA BIJBEL KENKI MI LIBI:

Di mi bigin studeri Bijbel nanga Yehovah Kotoigi, dan mi ben e firi ala sortu fasi. Mi ben e atibron di mi kon sabi taki na Satan e meki taki ogri de, bika mi heri libi langa mi ben leri taki na Gado e meki wi pina. Ma mi ben e firi frulekti trutru di mi leri taki Gado no e bron sma na ini hel. A leri dati ben tapu skreki gi mi langa ten kaba.

A ben naki mi ati fu si fa den Kotoigi ben e meki Bijbel abi krakti tapu ibri bosroiti di den ben e teki. Den ben e hori densrefi na den sani di den ben e bribi. Mi ben de wan muilek sma, ma awansi san mi ben e taki èn ben e du, toku den Kotoigi ben e sori lobi nanga lespeki gi mi.

A moro bigi problema di mi ben abi, na taki mi ben e firi leki mi no warti noti. Mi no ben lobi misrefi kwetikweti èn mi ben abi den firi disi ete langa ten baka di mi teki dopu leki wan Yehovah Kotoigi. Mi ben sabi taki mi ben lobi Yehovah, ma mi ben e bribi taki noiti a ben kan lobi wan sma leki mi.

Sowan 15 yari baka di mi teki dopu, mi bigin denki tra fasi fu misrefi. Wan brada di ben e hori wan taki na a Kownukondre zaal fu Yehovah Kotoigi, ben poti prakseri na Yakobus 1:23, 24. Den vers dati e agersi Gado Wortu nanga wan spikri, èn na ini a spikri dati wi kan si wisrefi soleki fa Yehovah e si wi. Mi bigin aksi misrefi efu a fasi fa mi ben e si misrefi ben e difrenti fu a fasi fa Yehovah ben e si mi. Na a bigin, mi no ben wani bribi a nyun sani disi di mi ben kon sabi. Mi ben de nanga a denki ete taki mi no ben kan fruwakti fu Yehovah taki a lobi mi.

Wan tu dei baka dati, mi leisi wan Bijbeltekst di kenki mi libi. A tekst dati na Yesaya 1:18, pe Yehovah e taki: „Grantangi, meki wi seti sani kon reti baka. . . . Awinsi den sondu fu unu redi leki brudu, toku den o kon weti leki snew.” Mi ben e firi leki Yehovah ben e taigi mi: „Grantangi Vicky, meki wi seti sani kon reti baka. Mi sabi yu, mi sabi den sondu fu yu, mi sabi san de na ini yu ati, èn mi lobi yu.”

Mi no ben man sribi a neti dati. Mi ben e tweifri ete efu Yehovah ben kan lobi mi trutru. Ne mi bigin prakseri a lusu-paiman fu Yesus. Wantronso mi kon frustan taki Yehovah ben abi pasensi nanga mi bun langa kaba, fu di a ben e sori mi na someni difrenti fasi taki a lobi mi. Ma te yu luku en bun, mi ben e taigi en: „A lobi fu yu no tranga nofo fu mi kan kisi wini fu dati. Na ofrandi fu yu Manpikin no nofo fu puru den sondu fu mi.” A ben de neleki mi ben trowe a lusu-paiman go baka gi Yehovah. Ma fu di mi go denki dipi fu a lusu-paiman disi di Yehovah ben gi wi, meki now fosi mi bigin firi taki Yehovah lobi mi.

DEN WINI DI MI KISI:

Mi konsensi no e fon mi moro, mi e libi soleki fa Gado wani èn mi de koloku trutru. A trowlibi fu mi e waka moro bun, èn mi breiti taki mi kan gebroiki den sani di mi ondrofeni fu yepi trawan. Noiti ete mi ben e firi taki mi de so krosibei fu Yehovah, leki now.

„Disi ben de a piki na tapu a begi fu mi.”​—SERGEY BOTANKIN

• A GEBORE NA INI 1974

• KONDRE: ROSIAKONDRE

• A BEN DE WAN MAN DI BEN LOBI HEBI ROCK POKU

A LIBI FU MI FOSI:

Mi gebore na ini Votkinsk, a presi pe a pôpi pokuman Pyotr Ilich Tchaikovsky ben gebore. Mi famiri ben pôti. Mi papa ben de wan bun man, ma a ben lobi dringi sopi. Dati meki a situwâsi na ini na oso noiti no ben switi.

Mi no ben man leri so bun na skoro èn bakaten mi bigin denki takru fu misrefi. Mi no ben wani moksi moro nanga trawan èn mi no ben e frutrow sma moro. A ben hebi gi mi fu go na skoro. Fu eksempre, te mi ben musu taki na fesi a klas, dan nofo tron mi no ben man fruklari den moro makriki sani srefi, aladi mi no ben abi a problema dati na tra okasi. Di mi pasa a di fu aiti klas fu mi skoro, dan den skrifi na tapu mi raportu: „A no sabi furu wortu, èn a no man taki san a e denki.” Den wortu dati broko mi saka èn now mi ben e firi trutru leki mi no warti noti. Mi bigin aksi misrefi fu san ede mi ben de na libi.

Di mi ben de wan tini, dan mi bigin dringi sopi. Na a bigin, mi ben e firi bun te mi ben e dringi. Ma te mi ben e dringi tumusi furu, dan mi konsensi ben e trobi mi. A ben gersi leki mi libi no ben warti noti. Mi bigin firi moro brokosaka èn son leisi mi no ben e komoto na ini mi oso omeni dei langa. Mi bigin prakseri fu kiri misrefi.

Di mi kon abi 20 yari, dan ete wan sani pasa di gi mi pikinso frulekti, ma dati no ben de fu langa. Mi bigin arki hebi rock poku. A poku disi ben e meki mi firi bun èn mi bigin moksi nanga tra sma di ben e arki den poku disi. Mi meki mi wiwiri gro langa, mi boro mi yesi, èn mi ben e weri den srefi sortu krosi leki den pokuman di mi ben lobi. Safrisafri mi no ben e broko mi ede moro nanga sani, mi ben e kisi atibron esi-esi, èn nofo tron mi ben e haritaki nanga mi famiri.

Mi ben e denki taki te mi ben e arki hebi rock poku, dan mi ben o de koloku. Ma dati no ben de so kwetikweti. Mi ben e tron wan heri tra sma! Èn di mi kon sabi taki den pokuman di mi ben lobi ben du ogri, dan mi ben feni taki den ben kori mi.

Agen mi bigin prakseri fu kiri misrefi, èn disi leisi mi ben e denki seryusu fu a tori dati. A wan-enkri sani di tapu mi fu du dati, na di mi prakseri san dati ben o du nanga mi mama. Mi mama ben lobi mi trutru èn a ben du bun furu gi mi. Now, a situwâsi disi ben muilek srefisrefi gi mi. Mi no ben wani libi moro, ma mi no ben man tyari wan kaba kon na mi libi.

Fu puru mi prakseri na a tori dati, mi bigin leisi owruten tori fu Rosiakondre. Wan fu den tori dati ben e taki fu wan prenspari man di ben e dini na ini wan kerki. Wantronso mi bigin angri fu du wan sani gi Gado èn gi tra sma. Mi begi Gado fu taigi en ala san ben de na tapu mi ati, wan sani di noiti mi ben du ete. Mi aksi Gado fu sori mi fa mi ben kan kon abi wan marki na ini mi libi. Di mi ben e begi, dan mi ben e firi frulekti trutru. Ma san ben moro moi, na a sani di pasa baka dati. Tu yuru nomo baka dati, wan Kotoigi fu Yehovah naki na mi doro èn a aksi mi efu mi ben wani studeri Bijbel. Mi ben e bribi taki disi ben de a piki na tapu a begi fu mi. Gi mi, dati ben de a fosi dei fu wan nyun èn koloku libi.

A FASI FA BIJBEL KENKI MI LIBI:

Aladi a ben muilek srefisrefi, toku mi trowe ala den sani fu mi di ben abi fu du nanga hebi rock poku. Ma a poku tan na ini mi ede wan heri pisi ten. Ibri leisi te mi ben e waka pasa wan presi pe a sortu poku dati ben e prei, dan wantewante mi ben e prakseri a libi fu mi fu fosi. Mi no ben wani moksi den takru prakseri dati nanga den bun sani di ben e teki rutu now na ini mi ati nanga mi frustan. Sobun, mi ben e wai pasi gi den sortu presi dati fu espresi. Èn ibri leisi te mi ben wani bigin prakseri a libi fu mi fu fosi, dan mi ben e begi Gado fayafaya. Dati yepi mi fu ondrofeni „a freide fu Gado di bigi moro iniwan sani di libisma man frustan”.​—Filipisma 4:7.

Di mi ben e studeri Bijbel, mi leri taki Kresten abi a frantwortu fu fruteri trawan fu a bribi fu den (Mateyus 28:19, 20). Mi ben e denki trutru taki noiti mi ben o man du dati. Ma na a srefi ten, den nyun sani di mi ben e leri, ben e meki mi firi koloku trutru èn den ben e gi mi wan korostu firi. Mi ben sabi taki tra sma ben musu kon sabi den tru tori disi tu. Aladi mi ben frede, toku mi bigin taki nanga trawan fu den sani di mi ben e leri. Mi ben fruwondru srefisrefi fu si taki te mi ben e fruteri trawan sani fu Bijbel, dan dati ben e yepi mi fu kon abi moro frutrow na ini misrefi. A sani dati meki tu taki den tru tori dati beri rutu go moro dipi na ini mi ati.

DEN WINI DI MI KISI:

Now mi trow èn mi de koloku trutru. Mi breiti taki mi ben man yepi difrenti sma fu kon sabi Bijbel, èn tu fu den sma dati na mi sisa nanga mi mama. Mi kon abi wan trutru marki na ini mi libi fu di mi e dini Gado èn fu di mi yepi trawan fu kon leri sabi en.