Bijbel e kenki sma libi

Fu san ede wan man di ben lobi fu rèi motro, di ben e gebroiki drugs, èn ben e du sport, teki a bosroiti fu tron wan furuten dinari? San meki taki wan man di ben lobi dòbel, tapu nanga a sani dati èn e wroko now fu sorgu gi en osofamiri? San meki taki wan yongu uma di ben kweki leki wan Yehovah Kotoigi, ma di no ben libi moro soleki fa Bijbel e sori, bigin poti prakseri baka na a fasi fa a e libi? Luku san den sma disi abi fu taki.

NEN: TERRENCE J. O’BRIEN

YARI: 57

KONDRE: AUSTRALIA

A BEN DE WAN SMA DI BEN E GEBROIKI DRUGS ÈN DI BEN LOBI FU RÈI MOTRO

A LIBI FU MI FOSI: Mi gro kon bigi na ini a bigi foto Brisbane, a mamafoto fu Queensland. Mi famiri ben de Lomsusma, ma di mi tapu aiti yari, wi no ben e go moro na kerki èn noiti wi ben e taki fu kerkitori. Di mi ben abi tin yari, wi osofamiri froisi go na a Goudkust fu Australia. Wi ben e libi krosibei fu a se, èn leki wan tini mi ben lobi swen èn seiri na tapu bigi skwala.

Toku mi no ben de koloku na ini den yongu yari fu mi. Mi papa gowe libi na osofamiri di mi ben abi aiti yari. Mi mama trow baka, ma doronomo trobi ben de na ini na osofamiri èn den ben e dringi furu sopi. Wan neti, baka di mi papa nanga mama ben kisi bigi trobi, mi ben e sidon na tapu mi bedi èn mi ben sweri taki efu wan leisi mi trow, noiti mi o meki trobi nanga mi wefi. Aladi problema ben de na ini na osofamiri, toku wi tan na makandra. Wi ben de nanga siksi pikin, wan mama nanga wan kwekipapa.

Di mi kon moro owru, furu fu den speri fu mi ben opo densrefi teige lantiwet. Den ben e gebroiki marwana, tabaka, nanga tra sortu drugs. Boiti dati, den ben e dringi sopi pasa marki. Mi bigin libi leki den speri fu mi di no ben e broko den ede nanga noti. Boiti dati, mi ben lobi fu rèi motro. Aladi mi ben kisi mankeri fu di mi ben naki wan tu leisi nanga motro, toku mi no tapu fu du dati èn mi bosroiti fu rèi fu a wan sei fu Australia go na a tra sei.

Aladi mi ben e du san mi wani, toku nofo tron mi ben e firi brokosaka te mi ben e prakseri fa a situwâsi de na grontapu èn fa furu sma no e broko den ede nanga den problema fu libisma. Mi ben e angri fu kon sabi suma na Gado, sortu kerki bun, èn fu san ede a situwâsi na grontapu de so. Ma di mi aksi tu Lomsu priester den sani di mi ben wani kon sabi, dan den piki fu den ben bruya mi. Mi taki fu den srefi sani disi nanga difrenti fesiman fu a Protestant kerki, ma den no gi mi bun piki tu. Dan wan mati fu mi seti sani so taki mi kan miti nanga Eddie, wan Kotoigi fu Yehovah. Mi ben abi fo takimakandra nanga Eddie, èn ibri tron a ben e gebroiki Bijbel fu piki den aksi fu mi. Na a fosi takimakandra kaba, mi ben sabi taki mi feni wan spesrutu sani. Ma na a ten dati, mi no ben feni en fanowdu fu kenki a fasi fa mi ben e libi.

A FASI FA BIJBEL KENKI MI LIBI: Di mi ben e rèi go na a tra sei fu Australia, mi ben abi takimakandra nanga wan tra Kotoigi di mi ben miti na pasi. Ma di mi drai go baka na Queensland, mi no ben miti moro nanga Kotoigi, siksi mun langa.

Wan dei di mi ben komoto na wroko e go na oso, mi si tu man e waka na strati nanga pikin kofru na ini den anu èn den ben weri krosi di fiti. Mi ben denki taki den na Yehovah Kotoigi. Mi waka go miti den èn mi aksi den efu den na Kotoigi. Di den taigi mi taki den na Kotoigi, dan mi aksi den fu studeri Bijbel nanga mi. Wantewante mi bigin go na den konmakandra fu Kotoigi èn mi ben go srefi na wan bigi kongres di ben hori na Sydney na ini 1973. Ma di mi famiri, spesrutu mi mama, kon sabi san mi ben e du, dan den no ben lobi a tori srefisrefi. Fu a sani disi ede, èn fu tra reide, mi tapu fu abi demakandra nanga Kotoigi. Baka dati, wán yari langa mi ben e du wan tra sani di mi lobi trutru, èn dati ben de cricket.

Ma te fu kaba, mi kon si taki mi ben de koloku trutru, soso di mi ben e studeri Bijbel nanga Yehovah Kotoigi. Mi go na den baka èn mi bigin go na den konmakandra. Boiti dati, mi tapu fu abi demakandra nanga den mati fu mi di ben e gebroiki drugs.

A sani di trutru meki taki mi tyari den kenki disi kon, na a tori fu a man Yob, na ini Bijbel. Bill, wan owru Kotoigi, di abi switifasi ma di no ben e frede fu taigi mi sani, ben e taki doronomo nanga mi fu Bijbel. Baka di wi studeri a tori fu Yob, Bill aksi mi fu suma Satan e taki tu dati den no e dini Gado nanga den heri ati (Yob 2:3-5). Mi kari ala den sma fu Bijbel di mi sabi, èn nanga pasensi Bill piki mi: „Iya, iya, den tu.” Dan a luku mi na ini mi fesi èn a taki: „Satan e taki dati fu yu tu!” Pikinmoro mi fadon nanga baka di a taigi mi dati. Fosi a studie dati, mi ben sabi taki den sani di mi leri, tru. Ma now mi kon frustan taki mi musu du den sani di mi leri. Fo mun baka dati, mi teki dopu leki wan Kotoigi fu Yehovah.

DEN WINI DI MI KISI: Mi no wani denki fa mi libi ben o de now, efu mi no ben leri fu libi soleki fa Bijbel e sori. A no abi misi taki mi no ben o de na libi now. Furu fu den owru mati fu mi dede, fu di den ben gebroiki drugs èn dringi sopi. Boiti dati, den no abi wan koloku trowlibi. Mi kan taki nomo dati mi libi ben o de a srefi.

Now mi trow, èn mi nanga mi wefi Margaret, breiti fu wroko na a bijkantoro fu Yehovah Kotoigi na ini Australia. Nowan fu den famiriman fu mi tron anbegiman fu Yehovah. Toku na ini den yari di pasa, mi nanga Margaret ben breiti srefisrefi fu studeri Bijbel nanga wan tu sma èn sosrefi wan tu trowpaar, di kenki den libi neleki fa mi du dati. Di wi du dati, wi kon abi furu bun mati. Boiti dati, Margaret, di kweki leki wan Kotoigi, yepi mi fu hori misrefi na a pramisi di mi meki sowan 40 yari pasa. Now wi trow moro leki 25 yari kaba, èn wi de koloku. A no ala ten wi e agri nanga makandra, ma teleki now wi no e meki trobi nanga makandra. Wi ala tu sabi taki na Bijbel yepi wi èn wi de nanga tangi gi dati.

NEN: MASAHIRO OKABAYASHI

YARI: 39

KONDRE: YAPAN

A BEN DE WAN MAN DI BEN E DÒBEL

A LIBI FU MI FOSI: Mi gro kon bigi na ini Iwakura, wan presi di no de fara fu Nagoya. A e teki sowan afu yuru nanga loko fu Nagoya go na Iwakura. Mi sabi ete taki mi papa nanga mi mama ben abi switifasi trutru. Ma bakaten, mi kon yere taki mi papa ben de wan yakuza, noso wan ogriman, di ben e du kruka sani. A ben e du dati fu sorgu fu wan pisi ten gi na osofamiri fu wi fu feifi sma. A ben e dringi furu sopi ibri dei, èn di mi ben abi 20 yari, a dede fu di a ben siki na en lefre.

Mi papa ben de fu Korea, èn fu dati ede den sma fu a presi pe wi ben e libi, nofo tron ben e desko wi osofamiri. A sani disi nanga tra problema sosrefi, meki taki mi no ben de koloku srefisrefi na ini mi tini yari. Mi ben go na middelbaar skoro, ma na wanwan leisi nomo mi ben e go èn baka wán yari mi tapu nanga skoro. Skowtu ben kisi mi kaba èn san ben meki en moro muilek gi mi fu feni wroko, na taki mi papa ben de fu Korea. Te fu kaba, mi feni wan wroko, ma mi ben kisi mankeri na mi kindi èn dati meki taki mi no man du tranga wroko.

Mi bigin prei pachinko, dati na wan sortu dòbel pe sma e gebroiki wan masyin nanga pikin bal na ini. Na a ten dati mi ben e libi nanga wan yongu uma di ben wani taki mi musu suku wan bun wroko èn trow nanga en. Ma mi ben e meki furu moni nanga a dòbel di mi ben e dòbel èn mi no ben wani kenki a fasi fa mi ben e libi.

A FASI FA BIJBEL KENKI MI LIBI: Wan dei, wan Yehovah Kotoigi kon na mi oso èn a gi mi a buku Leven— Hoe is het ontstaan? Door evolutie of door schepping? Noiti ete mi ben aksi misrefi a sani disi. Ma baka di mi leisi a buku mi ben wani kon sabi moro fu Bijbel. Ala ten mi ben aksi misrefi san e pasa te wan sma dede. A krin piki di mi kisi fu Bijbel tapu na aksi disi èn sosrefi tra tori, meki mi ai kon opo.

Mi ben si taki a de fanowdu fu du den sani di mi leri fu Bijbel. Sobun, mi trow na lanti, mi tapu nanga smoko, mi koti mi langa wiwiri di mi ben ferfi kon geri, èn mi bigin weri krosi di fiti. Boiti dati mi tapu nanga dòbel.

A no ben makriki gi mi fu tyari den kenki disi kon. Fu eksempre, nanga mi eigi krakti mi no ben man tapu fu smoko tabaka. Ma fu di mi ben e begi fayafaya èn mi ben poti mi frutrow tapu Yehovah Gado, meki mi ben man tapu nanga a gwenti disi. A fosi wroko di mi ben feni baka di mi ben tapu nanga dòbel, ben muilek gi mi srefisrefi. Mi ben e wroko afu nomo fu a moni di mi ben e meki te mi ben e dòbel, èn a wroko ben hebi srefisrefi. Wan Bijbeltekst di yepi na ini a muilek pisi ten dati ben de Filipisma 4:6, 7. Drape skrifi: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu; èn a vrede fu Gado di bigi moro leki san libisma man frustan, sa kibri un ati èn un frustan nanga yepi fu Krestes Yesus.” Na furu okasi mi si taki a pramisi disi tru.

DEN WINI DI MI KISI: Di mi bigin studeri Bijbel nanga Yehovah Kotoigi, mi wefi no ben lobi a tori. Ma di a si sortu bigi kenki mi tyari kon na ini a fasi fa mi ben e tyari misrefi, dan a bigin kon sidon na a studie tu èn a bigin kon nanga mi na den konmakandra fu Yehovah Kotoigi. Now wi ala tu na Yehovah Kotoigi. A de wan heri moi blesi taki wi man dini Gado makandra.

Fosi mi bigin studeri Bijbel, mi ben denki taki mi de koloku. Ma now mi sabi san a wani taki fu de trutru koloku. A no makriki fu libi soleki fa Bijbel e sori, ma mi de seiker taki dati na a moro bun fasi fu libi.

NEN: ELIZABETH JANE SCHOFIELD

YARI: 35

KONDRE: INGRISIKONDRE

A BEN DE WAN UMA DI BEN E DENKI SOSO PRISIRI

A LIBI FU MI FOSI: Mi gro kon bigi na ini Hardgate, wan pikin foto krosibei fu Glasgow, na Skotland. Di mi ben abi seibi yari, mi mama di tron wan Yehovah Kotoigi, bigin leri mi sani fu Bijbel. Ma di mi ben abi 17 yari, mi ben lobi fu abi demakandra nanga den skoromati fu mi. Wi ben e go na dansi, wi ben e arki hebi rock poku èn wi ben e dringi sopi. Mi no ben e prakseri nowan sani di abi fu du nanga Gado. Mi ben e denki soso prisiri. Ma sani kon kenki di mi ben abi 21 yari.

Mi ben go luku wan tu famiriman fu mi na ini Noord-Ierland. Di mi ben de drape, mi si wan grupu Protestantsma di ben hori wan waka. A ben de krin fu si taki den Protestantsma nanga den Lomsusma ben abi bita-ati gi makandra èn den ben e desko makandra. A sani dati meki mi skreki srefisrefi. Fu taki en leti a ben meki mi go denki fu sani. Mi ben prakseri den sani di mi mama leri mi fu Bijbel èn mi ben sabi taki Gado noiti ben o feni den sma bun di no e hori densrefi na Bijbel markitiki. Dan mi kon frustan wantronso taki mi ben e suku mi eigi wini nomo, sondro fu poti prakseri na a fasi fa Gado wani taki mi musu libi. Mi bosroiti taki te mi drai go baka na oso, na Skotland, mi ben o ondrosuku seryusu san Bijbel e leri.

A FASI FA BIJBEL KENKI MI LIBI: A fosi leisi di mi go baka na wan konmakandra fu Yehovah Kotoigi na ini a foto pe mi ben e libi, mi ben e firi syen èn mi ben e senwe. Ma ala sma ben gi mi wan switikon. Di mi bigin du den sani di mi ben e leri fu Bijbel, dan wan sisa fu a gemeente sori switifasi gi mi èn a poti prakseri na mi. A yepi mi trutru fu firi taki mi de wan pisi fu a gemeente baka. Den mati di mi ben abi fosi ben e tan kari mi fu go na dansi nanga den, ma mi taigi den taki mi de seryusu now fu libi soleki fa Bijbel e taki. Te fu kaba, den no ben kari mi moro.

Fosi mi ben e si Bijbel leki wan buku nomo di lai nanga wet. Now mi e denki tra fasi. Mi bigin si den sma di kari na ini Bijbel leki trutru sma di abi firi nanga swakifasi, neleki mi. Den sosrefi ben meki fowtu, ma toku Yehovah Gado gi den pardon di den sori berow trutru. Mi kon kisi na overtoigi taki aladi mi ben drai baka gi Gado di mi ben yongu, toku a o gi mi pardon èn frigiti den fowtu di mi meki na ini a ten di pasa, efu mi du tranga muiti fu plisi en.

A fasi fa mi mama ben tyari ensrefi ben abi furu krakti tapu mi tu. Aladi mi ben drai baka gi Gado, toku a no du dati noiti. A fasi fa a tan dini Gado sondro fu degedege, meki mi frustan taki a de prenspari fu dini Yehovah. Di mi ben yongu, dan noiti mi ben lobi en te mi mama ben e tyari mi go preiki oso fu oso èn mi no ben kan frustan taki wan sma ben kan preiki omeni yuru langa gi trawan. Ma now, mi bosroiti fu luku efu a pramisi fu Yesus di skrifi na ini Mateyus 6:31-33 de so trutru. A ben taki: „Noiti un musu broko un ede nanga sani èn un no musu taki: ’San wi o nyan?’ noso ’San wi o dringi?’ noso ’San wi o weri?’ . . . Un Tata na hemel sabi taki unu abi ala den sani disi fanowdu. Fu dati ede, tan suku a kownukondre nanga En regtfardikifasi fosi, dan unu sa kisi ala den tra sani tu.” Syatu baka di mi teki dopu leki wan Yehovah Kotoigi, mi libi a wroko fu mi, èn mi bigin wroko wan tu dei na ini a wiki. Baka dati mi tron wan furuten preikiman.

DEN WINI DI MI KISI: Di mi ben moro yongu èn ben e denki soso prisiri, noiti mi ben firi taki mi de koloku trutru. Mi no ben abi wan marki na ini a libi. Now di mi e gebroiki furu fu mi ten fu dini Yehovah, mi e firi koloku. Mi libi abi wan marki now. Now mi trow èn mi nanga mi masra e go na difrenti gemeente fu Yehovah Kotoigi ibri wiki fu gi den deki-ati. Mi e si a wroko disi leki a moro bigi grani na ini mi libi. Mi de Yehovah tangi trutru taki a gi mi ete wan okasi fu dini en!

[Prenspari pisi na tapu bladzijde 27]

„Na a fosi takimakandra kaba, mi ben sabi taki mi feni wan spesrutu sani. Ma na a ten dati, mi no ben feni taki a de fanowdu fu kenki a fasi fa mi ben e libi”

[Prenspari pisi na tapu bladzijde 29]

„Nanga mi eigi krakti mi no ben man tapu fu smoko tabaka. Ma fu di mi ben e begi fayafaya èn mi ben poti mi frutrow tapu Yehovah Gado, meki mi ben man tapu nanga a gwenti disi”

[Prenki na tapu bladzijde 30]

„Fosi mi ben e si Bijbel leki wan buku nomo di lai nanga wet. Now mi e denki tra fasi. Mi bigin si den sma di kari na ini Bijbel leki trutru sma di abi firi nanga swakifasi, neleki mi”