Bijbel e kenki sma libi

„Na omeni yari kaba mi aksi misrefi: ’Fu san ede wi de na grontapu?’”​—ROSALIND JOHN

• A GEBORE NA INI 1963

• KONDRE: INGRISIKONDRE

• A BEN ABI WAN KEFALEK WROKO

A LIBI FU MI FOSI:

Mi gebore na ini Croydon, na zuidsei fu Londen, èn mi na a di fu siksi pikin fu den neigi pikin na ini na osofamiri. Mi papa nanga mama ben de fu a Karibis èilanti Sint Vincent. Mi mama ben go na a Methodist Kerki. Aladi mi ben lobi leri sani, toku mi no ben wani leri noti fu Gado. Te mi ben abi fakansi fu skoro, dan mi ben lobi go na wan liba na ini a birti pe mi ben e leisi furu buku di mi ben leni na a bibliotheek.

Wan tu yari baka di mi kaba nanga skoro, mi ben wani yepi den mofina sma. Mi ben bigin yepi sma di no abi tanpe, sma di abi wan mankeri na den skin, nanga sma di no man leri bun. Dan mi go studeri na universiteit pe mi ben leri fa fu gebroiki sabidensi fu gi moro bun datrayepi. Di mi kisi mi diploma gi dati, mi ben kisi furu kefalek wroko, èn mi ben libi wan gudu libi. Mi ben de mi eigi basi èn mi ben sori sma fa den musu orga den bisnis. Mi ben ondrosuku tu fa sani kan waka moro bun na ini a libimakandra. A wan-enkri sani di mi ben abi fanowdu fu du mi wroko, ben de mi laptop computer nanga Internet. Mi ben gwenti go na tra kondre wan tu wiki langa, pe mi ben tan na ini den hotel di mi lobi, mi ben go luku moi presi, mi ben go na spesrutu presi pe sma e du ala sortu sani fu sorgu taki den skin tan gosontu èn mi ben e du sport. Mi ben feni taki mi ben abi wan bun libi trutru. Ma noiti mi ben frigiti den mofina sma.

A FASI FA BIJBEL KENKI MI LIBI:

Na omeni yari kaba mi aksi misrefi: ’Fu san ede wi de na grontapu èn fu san ede wi de na libi?’ Ma noiti mi pruberi fu feni den piki tapu den aksi disi na ini Bijbel. Wan dei na ini 1999, mi pikin sisa Margaret di ben tron wan Kotoigi fu Yehovah, kon luku mi nanga wan mati fu en di ben de wan Kotoigi tu. En mati ben sori taki a e broko en ede nanga mi. Mi ben fruwondru taki mi ben agri fu studeri Bijbel nanga a mati fu mi sisa. Ma mi no ben go na fesi esi fu di mi wroko nanga den sani di mi ben e du na ini mi libi, ben teki furu ten fu mi.

Na ini a waran pisi ten fu a yari 2002, mi froisi go na zuidwest-sei fu Ingrisikondre. Drape mi go na universiteit baka fu kisi a moro hei diploma leki ondrosukuman di e luku fa sani kan waka moro bun na ini a libimakandra. Mi ben bigin go moro na a Kownukondre zaal na ini a birti makandra nanga mi manpikin di ben yongu ete. Aladi mi ben lobi a heiskoro-leri di mi ben teki, toku a studeri di mi ben e studeri Bijbel ben yepi mi fu frustan den problema fu a libi moro bun èn a ben yepi mi fu sabi san na a lusu gi den problema. Mi frustan taki Mateyus 6:24 tru, pe skrifi taki yu no man dini tu masra. Mi no ben man dini Gado èn gudu na a srefi ten. Mi ben sabi taki mi ben musu bosroiti san o kon na a fosi presi na ini mi libi.

A yari na fesi mi ben go furu tron na wan Bijbelstudie grupu di ben hori na wan sma en oso, èn drape den Kotoigi ben studeri a buku Is er een Schepper die om u geeft?a (Wan Mekiman de di e broko en ede nanga yu?) Mi ben kon kisi na overtoigi taki na soso wi Mekiman, Yehovah, sabi fa fu lusu den problema fu libisma. Ma now mi ben e leri na a universiteit taki wi no o man kon sabi fu san ede wi de na libi efu wi e bribi na ini wan Mekiman. Mi ben ati bron srefisrefi. Baka tu mun, mi tapu nanga a leri di mi ben teki na a universiteit èn teki a bosroiti fu du moro so taki mi kan kon moro krosibei na Gado.

Odo 3:5, 6 ben gi mi deki-ati fu kenki mi libi. Drape skrifi: „Frutrow na tapu Yehovah nanga yu heri ati. No frutrow na tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti.” Fu leri sabi a lobi-ati Gado fu wi, ben gi mi moro prisiri leki iniwan gudu noso posisi di mi ben kan abi efu mi ben o kaba universiteit. O moro mi leri sabi san na den sani di Yehovah abi na prakseri gi grontapu èn o prenspari a de taki Yesus dede gi wi, o moro mi ben wani gi mi libi abra na wi Mekiman. Mi teki dopu na ini april 2003. Baka dati, mi ben du muiti safrisafri fu no libi wan gudu libi moro.

DEN WINI DI MI KISI:

A matifasi di mi abi nanga Yehovah na a moro prenspari sani gi mi. Mi kon kisi wan korostu firi trutru èn mi abi prisiri fu di mi kon leri sabi en. Mi e prisiri srefisrefi tu fu di mi abi demakandra nanga tra anbegiman fu Gado.

Te now ete mi lobi leri sani èn mi e kon sabi bun furu sani fu Bijbel èn mi e leri furu na den Kresten konmakandra. Mi lobi fruteri tra sma sani di abi fu du nanga a bribi fu mi. A sani disi tron mi wroko. A wroko disi e meki taki mi man yepi sma trutru fu abi wan moro bun libi now èn fu abi a moi howpu fu libi na ini a nyun grontapu. Sensi yuni 2008 mi bigin gebroiki moro ten fu preiki gi sma èn mi de moro koloku now. Now mi sabi fu san ede mi de na libi èn mi de Yehovah tangi gi dati trutru.

„A dede fu mi mati ben hebi srefisrefi gi mi.”​—Roman Irnesberger

• A GEBORE NA INI 1973

• KONDRE: OOSTENRIJK

• A BEN LOBI DÒBEL

A LIBI FU MI FOSI:

Mi kweki na ini a pikin foto Braunau, na ini Oostenrijk. A ben de wan gudu birti èn furu ogri no ben e pasa drape. Mi famiri ben de Lomsu èn mi kweki na ini a kerki dati.

Wan sani di pasa di mi ben yongu ete, ben abi furu krakti na mi tapu. Na ini 1984, di mi ben abi 11 yari, mi e memre ete taki mi ben e plèi bal nanga wan bun mati fu mi. A srefi bakadina dati a dede di wan ongoloku ben pasa nanga wagi. A dede fu mi mati ben hebi srefisrefi gi mi. Furu yari baka na ongoloku, mi ben e aksi misrefi san e pasa nanga wi te wi dede.

Di mi tapu nanga skoro, mi ben sabi wroko nanga stroom èn na a wroko dati mi ben e du. Aladi mi ben gwenti dòbel èn mi ben dòbel nanga furu moni, toku mi no ben abi moni problema. Mi ben lobi sport tu èn mi ben lobi hebi rock poku nanga punk rock poku. Mi ben lobi go na dansi nanga fesa. Na soso prisiri mi ben lobi meki èn mi ben libi wan yayolibi, ma toku mi no ben de koloku.

A FASI FA BIJBEL KENKI MI LIBI:

Na ini 1995, wan owru Kotoigi kon na mi oso èn a gi mi wan buku di gi a piki fu Bijbel tapu na aksi: San e pasa te wan sma dede? Fu di a dede fu mi mati ben muilek ete gi mi fu frustan, meki mi teki a buku. Mi no ben leisi a kapitel wawan di e taki fu dede, ma mi leisi a heri buku!

Den sani di mi leisi piki den aksi fu mi di abi fu du nanga dede. Ma mi leri moro ete. Fu di mi ben kweki leki wan Lomsusma, meki a bribi fu mi ben abi fu du moro furu nanga Yesus. Ma fu di mi ben studeri Bijbel finifini, meki mi kon abi wan bun matifasi nanga Yehovah Gado, a Papa fu Yesus. Mi ben breiti srefisrefi fu leri taki Yehovah e broko en ede nanga wi èn taki a wani wi kon leri sabi en (Mateyus 7:7-11). Mi leri taki Yehovah abi firi. Mi leri tu taki a e du san a pramisi ala ten. Disi meki taki mi ben wani sabi moro fu den Bijbel profeititori èn mi ben ondrosuku fa den ben kon tru. Den sani di mi leri, tranga a bribi fu mi na ini Gado.

Heri esi mi kon frustan taki na Yehovah Kotoigi wawan e du tranga muiti fu yepi sma fu frustan Bijbel. Mi ben si den Bijbeltekst na ini den publikâsi fu den Kotoigi èn mi go suku den tekst na ini mi Lomsu Bijbel. O moro mi ben e ondrosuku sani, o moro mi ben frustan taki mi feni a tru bribi.

Den sani di mi leri fu Bijbel sori mi taki Yehovah wani taki mi musu hori misrefi na den markitiki fu en. Di mi leisi Efeisesma 4:22-24, mi si taki mi ben musu ’puru na owru fasi fa mi ben de’, èn mi no ben musu du ’den sani di mi ben du fosi’. Mi ben musu ’kisi nyun fasi fu tron wan sma di de leki fa Gado wani’. Fu dati ede mi no ben libi wan yayolibi moro. Mi ben frustan tu taki mi no ben musu dòbel moro, fu di dati e meki sma feti baka gudu èn a e meki den kon gridi (1 Korentesma 6:9, 10). Mi ben sabi taki efu mi ben wani tyari den kenki disi kon, dan mi no ben musu bumui moro nanga den owru mati fu mi èn taki mi ben musu suku tra mati di ben hori densrefi na den srefi markitiki leki mi.

A no ben makriki fu tyari den kenki disi kon. Ma mi bigin go na den konmakandra fu den Kotoigi na ini a Kownukondre zaal èn mi bigin meki nyun mati na ini a gemeente drape. Misrefi tan go doro fu studeri Bijbel finifini. Den sani disi meki taki mi ben arki tra sortu poku, tra sani ben kon de prenspari na ini mi libi, èn mi ben weri krosi na wan moro bun fasi. Na ini 1995 mi teki dopu èn tron wan Kotoigi fu Yehovah.

DEN WINI DI MI KISI:

Mi e denki heri tra fasi now fu moni èn fu gudu. Fosi mi ben ati bron esi, ma now mi man hori misrefi fu no ati bron. Mi no e broko mi ede tumusi moro nanga a ten di e kon.

Mi breiti fu de wan fu den sma fu a pipel fu Yehovah di e dini en na heri grontapu. Aladi sonwan fu den abi problema, toku den e tan dini Gado. Mi e prisiri srefisrefi taki mi no e gebroiki ala mi ten nanga mi krakti fu du sani gi mi wawan, ma fu anbegi Yehovah èn fu du bun gi tra sma.

„Now mi sabi san fu du nanga mi libi.”​—IAN KING

• A GEBORE NA INI 1963

• KONDRE: INGRISIKONDRE

• A NO BEN SABI SAN FU DU NANGA EN LIBI

A LIBI FU MI FOSI:

Mi gebore na ini Ingrisikondre, ma na a ten di mi ben abi seibi yari, mi famiri froisi go na Australia. Wi go libi na a Gold Coast, wan presi na ini Queensland, Australia pe furu sma e kon koiri. Aladi mi famiri no ben gudu, toku ala ten wi ben abi san de fanowdu.

Aladi mi ben abi san mi abi fanowdu, toku mi no ben de koloku trutru. Mi no ben sabi san mi musu du nanga mi libi. Mi papa ben de wan sopiman. Mi no ben abi trutru lobi gi mi papa, fu di a ben dringi furu sopi èn fu di a no ben libi bun nanga mi mama. Ma bakaten di mi kon sabi san ben miti en di a ben de na ini Malakka leki srudati, mi kon frustan fu san ede a ben de so.

Di mi ben de na middelbaar skoro mi ben dringi tumusi furu sopi. Di mi ben abi 16 yari, mi gowe libi skoro èn mi go du srudatiwroko. Mi bigin gebroiki drugs èn mi ben e smoko ala dei. Mi no ben man moro sondro sopi. A no na a kaba fu a wiki nomo mi ben dringi so furu sopi, ma na ibri dei mi ben dringi sopi.

Di mi ben pasa 20 yari, dan mi bigin tweifri efu Gado de trutru. Mi ben denki: ’Efu Gado de trutru, dan fu san ede a e gi pasi taki sma e pina?’ Mi ben skrifi puwema srefi pe mi ben taki dati na Gado meki taki so furu ogri de na grontapu.

Mi tapu nanga a srudatiwroko di mi ben abi 23 yari. Baka dati mi du difrenti wroko èn mi ben go na tra kondre srefi fu wan yari, ma noti ben gi mi prisiri. Mi no ben wani du noti na ini mi libi. Noti ben de di mi ben lobi du. Mi ben si en leki wan soso sani fu abi mi eigi oso, wan bun wroko, noso wan bun posisi. A wan-enkri sani di mi feni taki ben yepi mi, ben de te mi ben dringi sopi èn te mi ben arki poku.

Mi sabi heri bun o ten mi ben angri fu du wan sani nanga mi libi. Di mi ben de na ini Polen, mi go luku na Auschwitz strafuman-kampu. Mi ben leisi taki kefalek ogri sani ben pasa drape. Ma di mi tanapu drape èn mi si o bigi a kampu de, dan mi ati priti. Mi no ben man frustan fa libisma ben kan du den kefalek ogri sani disi nanga tra libisma. Mi e memre ete taki mi ben waka lontu a kampu èn mi ben e krei. Mi ben aksi misrefi fu san ede den sani disi ben pasa.

A FASI FA BIJBEL KENKI MI LIBI:

Na ini 1993, di mi drai go baka na oso, mi bigin leisi Bijbel fu feni piki tapu den aksi di mi ben abi. Syatu baka dati, tu Kotoigi fu Yehovah kon na mi oso èn den gi mi wan kari fu kon na wan kongres di ben o hori na ini wan stadion na ini a birti. Mi go na a kongres.

Wan tu mun na fesi mi ben go luku wan plèi na ini a stadion, ma a kongres ben de heri tra fasi leki dati. Den Kotoigi ben abi switifasi èn den ben weri krosi di fiti. Den pikin fu den ben abi bun maniri. Mi no ben bribi san mi ben si baka a pauze. Hondrohondro Kotoigi ben nyan na tapu a veld, ma di den go sidon baka, mi no ben si nowan doti na tapu a veld! Ma san ben naki mi ati moro, na taki mi ben kan si na den sma disi taki den ben de koloku èn taki den ben de nanga prisiri, wan sani di mi ben angri fu abi. Mi no man memre nowan fu den lezing di ben hori, ma a fasi fa den Kotoigi ben tyari densrefi mi no o frigiti noiti moro.

A neti dati mi ben prakseri mi neef di ben leisi Bijbel èn di ondrosuku sani na ini difrenti kerki. Wan tu yari na fesi, a ben taigi mi taki Yesus ben taki dati yu ben o man si san na a tru bribi te yu luku den sani di den sma fu a bribi dati e du (Mateyus 7:15-20). Mi ben feni taki mi ben musu go ondrosuku fu san ede den Kotoigi e difrenti so fu tra kerki. Disi ben de a fosi leisi na ini mi libi taki mi ben abi pikinso howpu.

A wiki baka dati, den tu Kotoigi di ben gi mi wan kari fu kon na a kongres, ben kon baka na mi. Di den aksi mi efu mi wani studeri Bijbel, dan mi ben wani dati. Mi bigin go tu na den Kresten konmakandra nanga den.

Di mi ben e studeri Bijbel, mi bigin denki tra fasi fu Gado. Mi leri taki a no en e meki taki ogri sani e pasa èn taki pina de. Boiti dati, ensrefi e sari te sma e du ogri (Genesis 6:6; Psalm 78:40, 41). Mi ben bosroiti fu no du nowan sani di ben o meki Yehovah sari. Mi ben wani prisiri en ati (Odo 27:11). Mi ben tapu fu dringi tumusi furu sopi, mi no ben smoko moro, èn mi no ben libi wan yayolibi moro. Na ini maart 1994, mi teki dopu èn tron wan Kotoigi fu Yehovah.

DEN WINI DI MI KISI:

Now mi de koloku trutru èn mi de nanga prisiri. Mi no e dringi sopi moro fu lusu den problema fu mi. Na presi fu dati mi leri fu trowe mi hebi na tapu Yehovah.​—Psalm 55:22.

Now mi trow tin yari kaba nanga wan moi uma di nen Karen, èn a abi wan bun umapikin di nen Nella. Wi ala dri lobi fu gebroiki furu fu wi ten na ini a Kresten diniwroko, èn na so wi e yepi trawan fu leri den tru tori di abi fu du nanga Gado. Now mi sabi san fu du nanga mi libi.