Kon krosibei na Gado
„A Graniwan di de sensi owruten go sidon”
„NOITI wan sma si Gado”, na so Bijbel e taki (Yohanes 1:18). A glori fu Gado bigi so te taki nowan libisani man si en, dan a tan na libi (Eksodes 33:20). Ma Bijbel e sori taki son leisi Yehovah meki son sma si wan fisyun fu hemel. Wan fu den ben de a profeiti Danièl. Wi kan de seiker taki a sani di a si, meki a kisi furu lespeki gi Gado. Na so a musu de tu nanga wi. Danièl ben feni en wan bigi grani di a kisi wan fisyun. Luku san a e taki fu en.a—Leisi Danièl 7:9, 10.
„A Graniwan di de sensi owruten.” Den wortu disi, di Danièl wawan e gebroiki, abi fu du nanga „wan sma di owru srefisrefi (noso di grani)” (Danièl 7:9, 13, 22). O owru Yehovah de? Fu di en na „têgo Kownu”, meki wi kan taki dati a ben de sensi ten èn a o tan fu ala ten (1 Timoteyus 1:17; Yudas 25). Fu di Gado de fu têgo, meki wi abi a dyaranti taki a koni pasa marki, bika Bijbel e sori taki sma di owru abi furu koni (Yob 12:12). A tru taki a muilek srefisrefi gi wan libisma fu frustan taki wan sma no abi wan bigin èn taki a no abi wan kaba. Ma wi no musu fruwakti taki wi o man frustan ala sani fu a Gado disi di koni pasa marki.—Romesma 11:33, 34.
Luku taki a Graniwan di de sensi owruten „go sidon”. Fu du san? Den tra tekst e yepi wi fu kon frustan san a ben o du, fu di den e taki fu sani leki „a Grankrutu” èn „koti krutu” (Danièl 7:10, 22, 26). Sobun, na ini a fisyun Yehovah e go sidon leki Krutuman. Suma a ben o krutu? Na den pipel fu grontapu di Danièl ben si na a bigin fu a fisyun èn di Gado ben agersi nanga meti (Danièl 7:1-8).b Fa Yehovah e koti krutu?
„En krosi ben weti srefisrefi èn en ede-wiwiri ben weti leki a moro weti skapu-wiwiri.” Weti e prenki retidu nanga krin fasi. Son skapu-wiwiri weti srefisrefi. Sobun, efu wan sma ede-wiwiri weti leki skapu-wiwiri, dan a weti trutru. Yu e si san Danièl si? Yu e si wan Krutuman di abi weti wiwiri èn di e weri wan langa krosi di weti srefisrefi? Den wortu disi e gi wi a dyaranti taki Yehovah e krutu sani na wan reti èn koni fasi. En na wan Krutuman di warti fu kisi lespeki èn di wi musu frutrow nanga wi heri ati.
En na wan Krutuman di warti fu kisi lespeki èn di wi musu frutrow nanga wi heri ati
„Dusun tron dusun engel ben e dini en èn tin dusun tron tin dusun ben e tanapu leti na en fesi.” Suma na den engel disi di ben dini en? Bijbel e kari engel „den dinari fu” Gado (Psalm 104:4). Den engel fu Gado de nanga hondrohondro milyun èn den e wroko tranga, iya, den e „du san a taki” èn den „e du a wani fu en” (Psalm 103:20, 21). Disi e sori tu taki Gado abi koni pasa marki, a no so? Suma boiti Yehovah ben o man orga so wan bigi grupu engel èn sorgu taki den tan wroko so wan langa ten?
A fisyun fu Danièl e yepi wi fu frutrow Yehovah, a Graniwan di de sensi owruten. A e krutu sani na wan reti fasi èn wi kan frutrow na tapu a koni fu en. Fu san ede yu no e leri moro fa yu kan kon krosibei na a Gado disi di koni pasa marki?
A bun fu leisi a pisi disi fu Bijbel na ini oktober:
a Danièl no ben si Gado trutru. Na presi fu dati, Gado poti sani na ini en prakseri èn a ben de neleki den ben pasa leti na en fesi. Di Danièl fruteri san a si, dan a taki sani na wan agersi fasi. Sobun, a gebroiki wortu di libisma sabi fu yepi den kon frustan moro bun fa Gado de. Wi no musu denki taki den sani na ini den fisyun pasa trutru.
b Efu yu wani sabi moro fu den fisyun fu Danièl, dan luku kapitel 9 fu a buku ¡Poti Prakseri na a Profeititori fu Danièl! Yehovah Kotoigi tyari en kon na doro.