Yotam tan dini Yehovah aladi problema ben de na ini en famiri

TE WAN papa noso wan mama e tapu fu dini a tru Gado, Yehovah, dan dati kan meki a libi muilek gi wan pikin. Meki wi luku a tori fu Yotam. Wi o si sortu problema ben miti en na oso di a ben e gro kon bigi.

Yotam en papa, Usia, ben de a kownu fu Yuda. A ben de a moro makti man na ini a kondre. Usia ben de wan bun kownu furu yari langa, srefi fosi Yotam gebore. Ma bakaten, di Yotam ben de wan yonguyongu boi, Usia kisi bigifasi èn a pasa a Wèt fu Gado. Dati meki Gado naki en nanga gwasi, wan takru siki. Yu sabi san Yotam du di a sani dati pasa?​—a

Yotam tan dini Yehovah. Kande en mama, Yerusa, yepi en. Toku a kan taki a ben muilek gi Yotam fu tan gi yesi na Yehovah baka di en papa Usia drai baka gi a tru anbegi.

San yu o du efu yu papa noso yu mama e tapu fu dini Yehovah? A no ben o makriki gi yu, a no so?​— Ma a bun fu prakseri san yu ben o du te so wan sani ben o miti yu. Luku san David ben skrifi na ini Bijbel.

David en papa, Isai, ben de wan bun man. A ben e dini Yehovah, èn wi kan de seiker taki David ben lobi en papa. Ma David ben leri fu lobi Yehovah moro leki fa a ben lobi Isai srefi. Meki wi luku fu san ede wi kan bribi dati.

Grantangi opo yu Bijbel na Psalm 27:10. Dyaso David ben skrifi: „Awinsi mi eigi papa, noso mi eigi mama ben o gowe libi mi, toku Yehovah srefi ben o sorgu gi mi.” Prakseri a sani disi: Bijbel e taki dati, efu David en papa, Isai, noso en mama ben o tapu fu dini Yehovah, dan toku David ben o tan dini En.

Fa a de nanga yu? Yu ben o tan dini Yehovah, srefi efu yu papa nanga mama no e du dati?​— Disi na wan bun sani fu aksi yusrefi. Fu san ede? Fu di a abi fu du nanga a moro prenspari wèt na ini Bijbel. Dati na: „Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan.”

A sani disi wani taki dati wi musu tan gi yesi na Yehovah, srefi te a no makriki. Yu sabi suma wani taki wi musu tapu fu dini Yehovah?​— Na Satan Didibri, a feanti fu Gado, wani dati. Yesus ben kari en „a tiriman fu a grontapu disi”. Bijbel e taki tu taki en na „a gado fu a grontapu disi”. Yu denki taki wi musu frede Satan?​—

Nôno, wi no abi fu frede en. Na presi fu dati, wi musu hori na prakseri taki Yehovah abi makti moro Satan. Yehovah o kibri wi efu wi e frutrow na en tapu. Leisi na ini yu Bijbel fa Yehovah kibri David gi a bigiskin man Goliat di ben e tapu skreki gi sma. Yehovah kan kibri yu tu te yu e tan gi yesi na en.