„Heskia no gowe libi Yehovah”

YU SABI san a wani taki fu no gowe libi wan sma?​—a Dati wani taki dati a sma dati prenspari gi yu, taki yu lobi en srefisrefi, èn taki yu e lespeki en. Wi wani taki fu wan sma na ini Bijbel di „no gowe libi Yehovah”, a tru Gado. A sma dati nen Heskia. Meki wi luku san wi kan leri fu na eksempre fu en.

Heskia en libi no ben makriki di a ben pikin. En papa, Akas, a kownu fu Yuda, ben drai baka gi Yehovah. Di Heskia ben pikin ete, dan Akas ben e teki fesi na ini na anbegi fu falsi gado. Akas ben meki sma kiri awinsi wán fu den manpikin fu en srefi, iya, Heskia en eigi brada, fu gi en leki ofrandi na wan fu den gado di a ben e anbegi!

Aladi Akas tan du ogri, toku Heskia tan gi yesi na Yehovah. Yu denki taki a ben muilek gi en fu du dati?​— A ben musu fu de so. Ma Heskia no lasi-ati! Meki wi go luku san yepi en fu no gowe libi Yehovah, èn fa wi kan teki na eksempre fu en.

Heskia ben kon sabi sani fu tra sma di no ben gowe libi Yehovah. David ben de wan fu den sma dati. Aladi David ben libi hondrohondro yari fosi en, toku Heskia ben kan leri wan sani fu en di a leisi den Santa Buku. David ben skrifi: „Awinsi mi eigi papa, noso mi eigi mama ben o gowe libi mi, toku Yehovah srefi ben o sorgu gi mi.”

Yu e si san yepi David fu tan gi yesi na Yehovah?​— Na a bribi fu en! David ben bribi taki efu a ben e gi yesi na Yehovah, dan Yehovah ben o yepi en. David no ben e tweifri na a sani dati! Fu di Heskia ben e denki David, meki a no de fu taki dati a sani dati yepi en fu gi yesi na Yehovah èn fu no gowe libi en. Yu kan abi na overtoigi tu taki Yehovah o yepi yu te yu e gi yesi na en èn te yu no e gowe libi en.

Ma fa a de te yu papa noso yu mama no e anbegi Yehovah?​— Gado e taki dati pikin musu gi yesi na den papa nanga mama. Sobun, yu musu du dati tu. Ma efu yu papa nanga mama e taigi yu fu du wan sani di Gado no wani taki yu du, dan yu kan fruteri den fu san ede yu no kan du a sani dati. Yu no musu lei, yu no musu fufuru, èn yu no musu du nowan enkri tra sani di Yehovah no feni bun, awansi suma e taigi yu fu du den sani dati. Te yu e gi yesi na Gado, dan na wan bun sani yu e du!

Bun eksempre de di wi kan teki. Heskia no ben abi na eksempre fu David wawan, ma sosrefi a di fu en eigi granpapa Yotam. Heskia ben kan leri fu en, neleki fa wi na ini a ten disi kan du dati te wi e leisi Bijbel. Yu sabi tra bun eksempre di wi kan teki?​—

A tru taki Bijbel kan leri yu sortu fowtu Heskia, David, Yotam, nanga tra sondu sma meki. Ma den sma dati ben lobi Yehovah, den no kibri den fowtu fu den, èn den pruberi fu du san reti. Hori na prakseri tu taki Gado en wan-enkri Manpikin, Yesus, no ben abi sondu. Meki wi du ala muiti fu kon sabi moro fu en, èn meki wi pruberi fu teki na eksempre fu en.