Gado e yepi Kownu Heskia

YU SABI fu san ede a man disi e begi Yehovah? Fu san ede a poti den brifi disi na fesi na altari fu Yehovah? A man na Heskia. A de kownu fu den tu lo fu Israel na zuidsei. A de na ini bigi problema. Fu san ede?

Fu di na Asiria legre pori den tin lo na noordsei kaba. Yehovah ben meki disi pasa, fu di den sma dati ben de so ogri. Èn now na Asiria legre kon fu feti nanga a tu-lo kownukondre.

Didyonsro a kownu fu Asiria seni brifi gi Kownu Heskia. Na den brifi disi Heskia poti dya na fesi Gado. Den brifi e spotu Yehovah èn e taigi Heskia fu gi ensrefi abra. Dati meki Heskia e begi: ’O Yehovah, frulusu wi puru na a anu fu a kownu fu Asiria. Dan ala nâsi sa sabi taki yu wawan na Gado.’ Yehovah sa arki Heskia?

Heskia na wan bun kownu. A no de leki den ogri kownu fu a tin-lo kownukondre Israel, noso leki en papa, na ogri Kownu Akas. Heskia e gi yesi na ala den wet fu Yehovah. Dati meki baka te Heskia kaba fu begi, a profeiti Yesaya e seni a boskopu disi fu Yehovah gi en: ’A kownu fu Asiria no sa kon na Yerusalem. Nowan fu en srudati sa kon krosibei srefi. Den no sa sutu nowan enkri peiri kon na a foto.’

Luku a prenki na tapu a bladzijde disi. Yu sabi suma na ala den dede srudati disi? Na den Asiriasma. Yehovah ben seni en engel èn na ini wán neti na engel ben kiri 185.000 srudati fu Asiria. Fu dati ede a kownu fu Asiria e libi a tori èn e go na oso baka.

A tu-lo kownukondre kisi frulusu èn a pipel abi vrede fu wan pisi ten. Ma te Heskia e dede, dan en manpikin Manase e tron kownu. Manase nanga en manpikin Amon di e kon na en baka, na tumusi ogri kownu. Na so a kondre e kon furu baka nanga ogridu nanga dwengi. Te den futuboi fu Kownu Amon e kiri en, dan en manpikin Yosia e tron kownu fu a tu-lo kownukondre.