Yesus ben pramisi na ogriman taki a ben o libi na ini hemel?

Sma e aksi densrefi a sani disi, fu di Yesus ben pramisi na ogriman di ben anga na wan postu na en sei taki a ben o libi na ini Paradijs. Yesus ben taigi en: „Fu tru, mi e taigi yu tide: Yu o de nanga mi na ini Paradijs” (Lukas 23:43). Luku taki Yesus no taigi en pe a Paradijs dati ben o de. Ma disi wani taki dati na ogriman ben o de nanga Yesus na ini hemel?

Meki wi luku fosi efu na ogriman ben libi na wan fasi di ben o meki taki a kisi libi na ini hemel. Sma di abi a howpu fu libi na ini hemel, dopu na ini watra èn nanga santa yeye. Na so den e tron disipel fu Yesus di salfu nanga santa yeye (Yohanes 3:3, 5). Wan tra sani, na taki den sma disi musu hori den wèt fu Gado, den no musu abi bedrigi fasi, den musu du san reti, èn den musu abi sari-ati (1 Korentesma 6:9-11). Boiti dati, den musu tai hori na Gado nanga Krestes te na a kaba fu den libi na grontapu (Lukas 22:28-30; 2 Timoteyus 2:12). Na soso te den e du den sani dati den kan sori taki den warti fu kisi wan opobaka èn taki den o man tyari a hebi frantwortu di den o kisi na ini hemel. Dati na fu tiri libisma leki kownu nanga priester makandra nanga Yesus wán dusun yari langa.​—Openbaring 20:6.

Ma na ogriman di ben de na sei Yesus, ben libi leki wan ogriman èn a dede leki wan ogriman (Lukas 23:32, 39-41). A tru taki a sori lespeki gi Yesus di a aksi en: „Memre mi te yu kon na ini yu Kownukondre” (Lukas 23:42). Ma a no ben dopu leki wan disipel fu Yesus èn a no ben salfu nanga santa yeye. A no ben sori tu taki a ben du san reti èn taki a ben e gi yesi na Gado ala ten. Dan yu denki taki Yesus ben o pramisi a man disi taki a ben o libi leki kownu na ini hemel makandra nanga den reti-ati bakaman fu en?​—Romesma 2:6, 7.

Luku na eksempre disi: Efu wan man fufuru yu moni èn a aksi yu fu gi en pardon, dan yu kan bosroiti fu no tyari a tori go na skowtu. Ma yu ben o meki a man disi luku a bisnis fu yu? Yu ben o meki a luku yu osofamiri? Na soso wan sma di yu e frutrow dorodoro yu ben o gi den frantwortu disi. Na so a de tu taki den sma di abi a howpu fu libi na ini hemel musu sori krin taki den o tan hori den wèt fu Gado te den o tiri libisma (Openbaring 2:10). A tru taki na ogriman di ben de fu dede ben aksi Yesus nanga wan krin ati fu memre en. Toku a no ben sori na ini en libi taki a ben hori den wèt fu Gado.

Ma a de so taki Yesus taigi na ogriman taki a ben o de nanga en na ini hemel a srefi dei dati? Dati no kan de so, fu di Yesus no go na hemel a srefi dei dati. Na presi fu dati, a ben de „na ini en grebi”, dri dei langa (Mateyus 12:40; Markus 10:34). Srefi baka di a kisi wan opobaka, a tan 40 dei na grontapu fosi a opo go na hemel (Tori fu den apostel 1:3, 9). Sobun, na ogriman no ben kan de nanga Yesus na ini hemel, a dei dati.

Ma na ini sortu Paradijs na ogriman ben o de dan? Baka te a kisi wan opobaka, a o de na ini Paradijs na grontapu, di Yesus o tiri (Tori fu den apostel 24:15; Openbaring 21:3, 4). Efu yu wani sabi moro fu a Paradijs dati èn efu yu wani sabi san Gado e aksi fu yu, dan taki nanga iniwan Kotoigi fu Yehovah.