Gado e seti sani fu frulusu libisma

Gado ben pramisi Abraham di ben abi bribi, taki a „pikin” di ben o kon ben o de wan bakapikin fu en. Nanga yepi fu a pikin dati, sma fu „ala den pipel” ben o kisi blesi (Genesis 22:18). Wan pisi ten baka dati, Abraham en manpikin Yakob froisi go na Egepte pe en famiri kon tron na owruten pipel Israel.

Bakaten, di den ben de na ini Egepte, wan ogri-ati kownu gebroiki den Israelsma leki srafu, teleki Gado meki a profeiti Moses tyari a pipel komoto na ini a kondre. A tyari den pasa na ini a Redi Se di a ben prati na wan wondru fasi. Baka dati, Gado gi Israel wèt, soleki den Tin Komando, fu tiri den èn fu kibri den. Den wèt ben e taki krin sortu ofrandi sma ben musu tyari fu man kisi pardon gi sondu. Gado meki Moses taigi Israel taki a ben o seni wan tra profeiti kon gi den. A profeiti dati ben o de a pramisi „pikin”.

Moro leki fo hondro yari baka dati, Gado pramisi Kownu David taki a sma di ben o kon, a „pikin” di Gado ben taki fu en na ini Eden, ben o tiri wan kownukondre di ben o tan fu ala ten. A pikin ben o de a Mesias, a Frulusuman di Gado ben o seni kon fu frulusu libisma èn fu kenki grontapu kon tron wan paradijs.

Nanga yepi fu David nanga tra profeiti, Gado meki taki safrisafri sma kon sabi moro sani fu a Mesias. Den ben taki na fesi taki a ben o abi sakafasi nanga switifasi, èn taki na ondro a tiri fu en angriten, kruktudu, nanga orloku no ben o de. Ala libisma ben o libi na ini freide nanga makandra èn nanga den meti. Siki, pina, nanga dede, sani di noiti Gado ben wani, ben o kon na wan kaba, èn dedesma ben o kisi libi baka na grontapu.

Gado ben meki a profeiti Mika fruteri taki a Mesias ben o gebore na ini Betlehem, èn a meki a profeiti Danièl fruteri taki bakaten sma ben o kiri a Mesias disi. Ma Gado ben o gi a Mesias wan opobaka èn a ben o poti en leki Kownu na hemel. Danièl ben si na fesi tu taki te fu kaba a Kownukondre fu a Mesias ben o kon na ini a presi fu ala tra tirimakti, èn a ben o tan fu ala ten. A Mesias ben kon soleki fa den profeiti ben taki?

​—Den tori disi abi fu du nanga Genesis kapitel 22-50, sosrefi Eksodes, Deuteronomium, 2 Samuel, Psalm, Yesaya, Danièl, Mika, Sakaria 9:9.