„Wi feni a Mesias”!

Pikinmoro fo hondro yari baka di a lasti buku fu den Hebrew buku fu Bijbel skrifi, a profeititori fu Mika di ben e taki fu a Mesias, kon tru: Yesus gebore na ini Betlehem. Sowan 30 yari baka dati, na ini a yari 29, a fosi pisi fu a profeititori fu Danièl kon tru. A profeititori disi ben e taki dati a Mesias ben o kon. Yesus teki dopu èn Gado salfu en nanga santa yeye. Na a reti ten, a Mesias, noso a Pikin di sma ben e wakti langa ten kaba, ben doro!

Wantewante Yesus bigin nanga a diniwroko fu en èn a „preiki a bun nyunsu fu Gado Kownukondre” (Lukas 8:1). Neleki fa den profeititori ben taki, Yesus ben abi switifasi, èn a ben e broko en ede trutru nanga trawan. Den leri fu en ben bun, den ben e sori taki a ben lobi sma, èn a dresi sma di ben abi „ibri sortu siki”. Na so a sori taki Gado ben de nanga en (Mateyus 4:23). Yonguwan nanga owruman ben e kon na Yesus èn den ben e taki: „Wi feni a Mesias”!​—Yohanes 1:41.

Yesus ben taki dati syatu bifo a Kownukondre fu en ben o tiri grontapu, dan orloku, gronseki, nanga furu tra problema ben o miti den sma na grontapu. A gi ala sma deki-ati fu „tan na ai”.​—Markus 13:37.

Yesus no ben abi sondu èn a ben tan gi yesi na Gado, ma a ben abi feanti di meki taki sma kiri en te fu kaba. Dati meki a dede fu en ben de a yoisti ofrandi di ben kan bai baka san Adam nanga Eva ben lasi. Dati na a howpu fu libi fu têgo na ini Paradijs.

Nanga a dede fu Yesus, wan profeititori kon tru. Dri dei baka dati, wan tra profeititori kon tru di Gado gi Yesus wan opobaka leki wan makti yeye. Baka dati, Yesus sori ensrefi na moro leki 500 fu den disipel fu en. Fosi Yesus opo go na hemel, a taigi den bakaman fu en fu fruteri „sma fu ala kondre” a bun nyunsu fu en nanga en Kownukondre (Mateyus 28:19). Den ben du a wroko dati dorodoro?

​—Den tori disi abi fu du nanga Mateyus, Markus, Lukas, Yohanes, 1 Korentesma.