PIKI TAPU AKSI FU BIJBEL
Ala kerki e du san Gado wani?
Efu yu arki a nyunsu, dan kande yu si taki son leisi sma e du ogri na ini a nen fu kerki. A tru Gado no feni ala kerki bun (Mateyus 7:15). A no de fu taki dati kerki kori furu sma.—Leisi 1 Yohanes 5:19.
Toku Gado e poti prakseri na reti-ati sma di lobi san bun èn san tru (Yohanes 4:23). Gado e gi den sma dati a kari fu kon sabi den tru tori fu en Wortu, Bijbel.—Leisi 1 Timoteyus 2:3-5.
Fa yu kan kon sabi sortu kerki na a tru kerki?
Yehovah Gado e tyari sma di ben de fu tra kerki kon na wán, fu di a e leri den san tru èn a e leri den fu lobi makandra (Mika 4:2, 3). Sobun, yu kan kon sabi suma abi a tru bribi te yu e luku a fasi fa den sma dati e libi nanga makandra.—Leisi Yohanes 13:35.
Yehovah Gado e tyari ala sortu sma kon na wán nanga yepi fu a tru anbegi.—Psalm 133:1
Den sani di sma fu a tru anbegi e bribi èn a fasi fa den e libi e kruderi nanga Bijbel (2 Timoteyus 3:16). Den e gi grani tu na a nen fu Gado (Psalm 83:18). Boiti dati, den e fruteri sma taki Gado Kownukondre na a wan-enkri howpu gi libisma (Danièl 2:44). Neleki Yesus, den e meki den „leti skèin” fu di den e du bun gi tra sma (Mateyus 5:16). Dati meki sma sabi tru Kresten leki sma di e go oso fu oso fu fruteri trawan a bun nyunsu fu Gado kownukondre.—Leisi Mateyus 24:14; Tori fu den apostel 5:42; 20:20.