PIKI TAPU AKSI FU BIJBEL

San na a Krutudei?

Na ini Bijbel ten Gado ben gebroiki krutuman fu frulusu en pipel fu sma di ben pina den (Krutuman 2:18). Bijbel e sori taki a Krutudei o de wan ten fu prisiri. Yehovah, a Krutuman fu heri grontapu, o frulusu libisma so taki nowan sma no du ogri nanga den.​—Leisi Psalm 96:12, 13; Yesaya 26:9.

Gado poti Yesus fu krutu den libiwan nanga den dedewan (Tori fu den apostel 10:42; 17:31). Furu sma dede sondro taki den ben sabi Gado. Na a Krutudei, Yesus o wiki den sma disi so taki den kan kisi na okasi fu leri sabi a tru Gado èn fu sori taki den lobi en.​—Leisi Tori fu den apostel 24:15.

Fu san ede a Krutudei o de dusun yari langa?

Na ini a pisi ten fu dusun yari den dedewan o kon na libi baka (Openbaring 20:4, 12). Den o abi ten fanowdu fu leri sabi Gado èn fu gi yesi na en. Bijbel e sori taki sma o kisi krutu fu sani di den o du baka te den kisi wan opobaka, den no o kisi krutu fu sani di den du fosi den dede, soleki fa furu sma e denki.​—Leisi Romesma 6:7.

Boiti a Krutudei di o de dusun yari langa, Bijbel e taki tu fu wan tra Krutudei di o kon fosi a wan dati. A dei dati na a kaba fu na ogri grontapu disi, soleki fa wi ben si na ini den fosi artikel fu a tijdschrift disi. Na a dei dati Gado o puru ala ogri sma di no wani du san a e taki (2 Petrus 3:7). Dati meki wi musu sori taki wi lobi Gado.​—Leisi 2 Petrus 3:9, 13.