Na Kroetoe dei — Wan ten foe howpoe!

EFOE na prakseri foe a kroetoe dei e frede joe, foe san-ede joe no e ondrosoekoe san a bijbel e taki foe en? Foe eksempel, a de troe taki te Gado e strafoe den sondari, den e trowe den go ini helfaja?

We, a fosi kefal di skrifi foe wan takroe kroetoe foe Gado ben de leti na a bigin foe a libisma historia. Adam nanga Eva ben abi na okasi foe libi foe têgo na tapoe wan paradijs grontapoe (Gen. 1:26-28; 2:7-9, 15-25). Ma den ben sondoe èn ben kon ondro na takroe kroetoe foe Gado. A bakapisi? Gado ben teki na presenti foe libi baka. Foe taki en tra fasi, den ben dede. Gado ben taigi den: „Ini a sweti foe joe fesi joe sa njan brede te leki joe drai go baka na a gron, bika na foe drape den ben teki joe poeroe. Bikasi doti joe de èn na doti joe sa drai go baka.” — Genesis 3:16-19.

Disi ben de wan tranga kroetoe, ma a ben de regtfardiki. Èn seiker a no ben abi foe doe nanga helfaja. Di Adam nanga Eva ben dede, den ben drai go baka na doti. Den no ben de moro. A bijbel no e gi na nowan presi a prakseri taki wan pisi foe Adam ofoe foe iniwan tra libisma e tan a libi foe kan kisi pina na wan presi foe têgo. Joisti wi e leisi: „Den libiwan sabi taki den sa dede; ma den dedewan, den no sabi notinoti.” — Preikiman 9:5.

Joe ben sabi taki a bijbel e taki disi? Joe ben sabi toe, taki a bijbel noiti e gebroiki a wortoe „sili di no kan dede?” Na presi foe dati a e taki: „A sili di e sondoe, en sa dede” (Esekièl 18:4, King James Version). Disi de dorodoro ini akroederi nanga na gronprakseri foe na bijbel: „A paiman foe sondoe na dede” (Rome sma 6:23 KJ). A regel disi e wroko tapoe wi alamala. Wi alamala na bakapikin foe na sondari Adam, so boen wi alamala e sondoe èn e kisi a paiman foe sondoe, dede. Leki fa a bijbel e taki: Nanga jepi foe wán man sondoe kon na ini grontapoe, èn sondoe tjari dede kon, èn so dede pasa go na tapoe ala sma, bikasi alamala ben sondoe (Rome sma 5:12 KJ). Na dei foe Kroetoe na wan prenspari pisi na ini a seti foe Gado foe froeloesoe wi foe na situwâsi disi.

Na fondamenti foe na Kroetoe dei

Ini akroederi nanga a bijbel, a de 2000 jari pasa kaba di Gado ben poti a fondamenti foe san sa pasa na tapoe a Kroetoe dei. Disi ben de di Jesus ben kon na grontapoe èn ben òfer en volmaakti libisma libi foe na boen foe wi. Jesus srefi ben froeklari: „Gado ben lobi grontapoe sote, taki a ben gi en wan enkri gebore Manpikin, foe iniwan sma di e poti bribi na ini en no sa kisi pori ma sa kisi têgo libi.” — Johanes 3:16.

Efoe wi poti bribi na ini Jesus, wi sa njanboen foe en ofrandi, srefi now kaba ini wan jeje fasi. Gado e gi wi pardon foe wi fowtoe èn a e gi wi pasi foe kon krosibei na en (Johanes 14:6; 1 Johanes 2:1, 2). Ma te now ete wi de onvolmaakti, sondari, èn na so fasi, wi e siki ete na skinfasi èn e dede te foe kaba. Wi no abi na têgo libi ete di Jesus pramisi. Disi sa kon leki wan bakapisi foe a Kroetoe dei.

Na Kroetoe dei

Na apostel Johanes ben si wan fisjoen foe a Kroetoe dei, èn a ben taki foe en na a fasi disi: „Mi ben si wan bigi weti kownoestoeroe, nanga A Sma di ben sidon na tapoe, èn grontapoe nanga hemel ben lon gowe foe en fesi; èn presi no ben feni gi den. Èn mi ben si den dedewan, pikinwan nanga bigiwan, e tanapoe na fesi foe Gado; èn den ben opo den boekoe: èn wan tra boekoe ben opo, san ben de a boekoe foe libi: èn den dedewan ben kisi kroetoe tapoe a gron foe den sani di ben skrifi na ini den boekoe, akroederi den wroko foe den.” — Openbaring 20:11, 12 KJ.

Ija, ini akroederi nanga a fisjoen foe Johanes, Gado srefi sa de a fesiman tapoe a Kroetoe dei. Ma wan tra sma moro abi foe doe nanga disi. Na apostel Paulus e froeklari: „Gado ben poti wan dei, pe a abi na prakseri foe kroetoe grontapoe ini regtfardikifasi nanga jepi foe wan man di a ben poti” (Tori foe den Apostel 17:31 KJ). Soema ben de a man dati? Na Jesus, di ensrefi ben taki: „Na Tata no e kroetoe no wan sma, ma a ben gi a heri kroetoe na a manpikin” (Johanes 5:22, KJ) So boen Jesus sa de tapoe a Kroetoe dei na Kroetoeman di Gado poti.

Disi na boen njoensoe gi libisma. Den evangelium e tjari Jesus kon na fesi leki wan sma nanga bigi sari-atifasi. A no abi heimemre ofoe e aksi toemoesi foeroe foe sma ma „a abi safri-ati èn sakafasi” (Mateus 11:29; 14:14; 20:34). Wi de kolokoe foe de na ini anoe foe so wan Kroetoeman.

Oten dati sa de?

Ma Oten, na dei foe Kroetoe sa de? Openbaring e taki a sa de te „na grontapoe nanga na hemel [sa] lon gowe.” Disi e memre wi na den wortoe foe na apostel Petrus: „Na hemel nanga na grontapoe di de now poti na wan sei gi na faja èn kibri poti gi a dei foe kroetoe èn foe a pori foe den ogri sma” (2 Petrus 3:7). Na a letterlijk grontapoe sa bron? Nôno, na bijbel de krin tapoe a penti disi. Na letterlijk grontapoe noiti no sa bron. „Grontapoe . . . no sa seki noiti.” (Psalm 104:4, 5, Njoe Testament) Den wortoe foe Petrus e sori taki a disiten seti foe sani sa wai poeroe. Ogri sma, èn no a planeet Grontapoe, sa pori gowe. — Johanes 12:31; 14:30; 1 Johanes 5:19.

Den ogri sma disi sa wai poeroe ini san a bijbel e kari na feti foe Armageddon — di, so leki fa a tijdschrift disi foeroetron ben e sori, sa feni presi heri esi (Openbaring 16:14, 16). Baka dati, dan den sa poti Satan srefi ini na peti di no abi gron èn den sa skotoe en foe no abi boemoei nanga libisma foe doesoen jari langa, èn den doesoen jari disi na a troetroe langa foe a Kroetoe dei (Openbaring 19:17–20:3). San sa pasa nanga den bribiwan te den ogri sma dede na ini Armageddon? Den e tan na libi èn e kon so ini a Kroetoe dei. Wi e leisi: „Den sma sondro fowtoe na den wan di sa tan abra [na grontapoe]. Foe na sei foe den ogriwan, den sa koti poeroe foe a grontapoe srefi.” — Odo 2:21, 22.

Leki wan jepi foe disi a bijbel e froeteri foe „wan bigi ipi, di no wan sma ben kan teri, foe ala nâsi èn lo èn pipel èn tongo” di sa sori densrefi na grontapoe bifo Armageddon. Den disi „Komoto foe a bigi banawtoe”; foe taki en tra fasi, den pasa na kaba foe na ogri grontapoe disi libilibi so leki fa Noach ben pasa na kaba foe a grontapoe na ini den dei foe en libilibi (Openbaring 7:9-17; 2 Petrus 2:5). Joe sabi taki internationaal na bigi ipi disi foe aktief kresten de now kaba? Den memre foe en e howpoe foe pasa a bigi banawtoe libilibi èn libi foe têgo na grontapoe. A de di den de na wan seiker boeweisi taki na Kroetoe dei de krosibei.

Soema sa kisi kroetoe?

Na bigi ipi disi sa kisi kroetoe tapoe a Kroetoe dei. Ma den no sa de den wawan. Johanes tori e go doro: „Na se ben gi den dedewan di ben de na ini en; èn dede nanga hel ben gi den dedewan di ben de ini den; èn den ben kisi kroetoe, ibri sma ini akroederi nanga den wroko foe den” (Openbaring 20:13, KJ). Disi de ete wan boeweisi taki sma no e tan pina foe têgo ini hel. Efoe hel e gi den sma di de na ini en, fa wan sma kan de drape foe têgo? Te joe loekoe en leti, dan a bijbel hel na a gemeenschappelijk grebi foe a libisma famiri, pe den dedewan e tan, sondro foe sabi wan sani foe densrefi, èn e wakti na opobaka. Tapoe a kroetoe dei, hel sa kon legi krinkrin foe den dedewan. — Preikiman 9:10.

Soema sa kisi wan opobaka na a Kroetoe dei? Na apostel Paulus ben taki: „Wan opobaka sa de foe den regtfardikiwan èn den onregtfardikiwan” (Tori foe den Apostel 24:15, KJ). Foe dati-ede meki, den getrow dienstknekti foe Gado, „den regtfardikiwan”, sa kisi wan opobaka. Ma so toe wan heri ipi tra sma di wi no man teri, „den onregtfardikiwan”. So leki fa a sori dan na opobaka sa de gi den wan di ben dede èn di de te now ete na ini grebi — boiti den sma di den sondoe ben de so serjoesoe taki Gado kroetoe den kaba taki den no de warti foe libi srefisrefi. — Mateus 12:31.

Na Kroetoe

Ma, san e pasa nanga a bigi ipi foe sma di sa tan a libi nanga den wan di opobaka na a Kroetoe dei? A bijbel e taki: „Den dedewan ben kisi kroetoe tapoe a gron foe den sani di ben skrifi na ini den boekoe, akroederi den wroko.” Now na a ten foe doe wan soifri ondrosoekoe. Ala sma di wani handri akroederi ’den sani di skrifi na ini den boekoe’ — leki fa a sori, taki a de den markitiki foe Gado gi a libisma-famiri ini a ten dati — den sa skrifi den nen na ini „a boekoe foe libi” (Openbaring 20:12, KJ). Den sa de tapoe a pasi foe kisi têgo libi!

Dan, te foe kaba, Krestes en ofrandi dede sa tjari winimarki kon na skinfasi! Den sma di nen skrifi ini a boekoe foe libi na ini a ten dati no sa kon siki nanga dede moro langa. Na presi foe dati safrisafri den sa kon boen baka te kon miti libisma volmaaktifasi, nanga na têgo libi di pramisi na den di poti bribi na ini Jesus. Fa disi de wan aparti froewakti! Tokoe, sonwan leki fa a sori sa weigri foe gi jesi ’na den sani di skrifi na ini den boekoe’. San sa pasa nanga den? Den no sa kisi têgo libi. Na presi foe dati, boekoe e taki: „En ibri soema, disi dem no finni hem nem skrivi na ini da boekoe vo liebi, dem hiti na ini da fajazee.” — Openbaring 20:15, Njoe Testament nanga den Psalm.

Disi na a helfaja di a krestenhèit e taki foe en? Nôno, bikasi na ini a vers di e waka na en fesi wi e leisi: „En dem teki da dede nanga dedekondre hel, hiti na ini a fajazee. Dati de da tra dede” (Openbaring 20:14 NTP). Efoe hel ofoe dedekondre e iti go na ini a faja se, dan a se srefi no kan de a helfaja. Boiti dati, dede no de wan sani di joe kan si èn opo trowe go na wan presi. So boen na faja se moesoe de na agersifasi. Wan agersi foe san? A bijbel e taki: „Disi de da tra dede.” Te den e trowe dede nanga Hades go na ini a faja se, dan den e „dede”, wan kaba e kon na den. Na a srefi fasi, den oproeroe sma sa dede, den no sa de moro. Ma disi de a di foe toe dede, sondro howpoe foe wan opobaka.

Na Kroetoe dei — Wan ten foe howpoe

So boen te wi e denki foe a Kroetoe dei, wi no abi foe de nanga frede ofoe tegoe. A Kroetoe dei na wan ten foe howpoe, wan ten foe meki a têgo libi di Adam ben lasi kon baka. Arki den blesi di a sa tjari kon gi den sma di den kroetoe regtfardiki: „Loekoe! Na tenti foe Gado de na den libisma, èn a sa libi na den, èn den sa de en pipel. Èn Gado srefi sa de na den. Èn a sa figi poeroe ala watra na den ai, èn dede no sa de moro, no wan row, no wan babari, no wan pen no sa de moro. Den fosi sani pasa gowe.” — Openbaring 21:3, 4.

Na a kaba foe a doesoen jari Kroetoe dei, getrow sma foe ala sei foe grontapoe, sa de volmaakti te foe kaba. Den sa „kon na libi” so leki a wortoe wani taki troetroe, èn a Kroetoe dei sa doro en marki (Openbaring 20:5). Dan, a bijbel e taki, Satan sa kisi primisi foe kon na a libisma-famiri foe na lasti tron (Openbaring 20:3, 7-10). Den di e kakafoetoe gi en na lasti tron disi sa abi prisiri dorodoro foe na bijbel pramisi: „Den regtfardikiwan srefi sa kisi a grontapoe, èn den sa tan foe têgo na en tapoe.” — Psalm 37:29.

Fa a Kroetoe dei de wan froewondroe seti! Èn fa a de wan aparti sani foe sreka wisrefi now kaba foe dati, foe di wi e studeri a bijbel, leri sabi Gado wani, èn doe a wani disi foe Gado na ini wi libi! A no de foe froewondroe taki di na Psalmsingiman ben prakseri a kroetoe foe Gado a ben sori na prisiri foe en nanga den wortoe di a ben skrifi: „Meki den hemel njan prisiri, èn meki a grontapoe brèiti. Meki a se dondroe nanga san e foeroe en. Meki na opo sabana prisiri pasa marki nanga ala san de na tapoe. Meki na a srefi ten, ala den bon foe den boesi broko loesoe nanga wan prisiri babari gi Jehovah. Bikasi a kon; bikasi a kon foe kroetoe a grontapoe.” — Psalm 96:11-13.