Na lasti kroetoe

“TE JOE dede joe sili sa njan pina en wawan; dati sa de wan hel gi en. Ma na a kroetoe dei joe skin sa go moksi ensrefi nanga joe sili, èn dan joe so abi wan dobroe hel: joe sili sa sweti dropoe foe broedoe èn joe skin sa foeroe nanga hebi skin-ati na ala sei”.

DISI na fa a di foe 19-jarihondro preikiman C.H. Spurgeon ben skrifi foe a fasi fa den kerki leriman e si na kroetoe dei nanga na pina foe den sma di den floekoe. Na tekenman foe Italiakondre, di ben nen Michelangelo, ben abi so wan srefi sortoe prakseri di e frede sma, so leki sma kan si ini na prenki di a teken foe „Na Lasti Kroetoe” (di wan pisi foe en de foe si dja na tapoesei), na tapoe a skotoe foe a kerki-oso di pawsoe Sixtus IV ben bow na ini Rome. The New Encyclopædia Britannica e taki foe na prenki disi tapoe a skotoe: „Na Krestes di de ini a Kroetoe de moro foeroe wan gado di e strafoe sma leki wan kresten froeloesoeman, èn a abi moro belangstelling foe floekoe na libisma ras leki foe gi den blesiwan wan switi kon na ini hemel”.

Gronleri foe na krestenhèit

Ini den jarihondro di pasa, kroetoe dei nanga helfaja ben de moi tori foe hori preiki. Komoto foe den preikistoeroe, preikiman leki C.H. Spurgeon ben e hori preiki foe frede sma nanga eksempel di ben e gi wan toemoesi libilibi prenki foe na takroe pina di e wakti sondari. Na ini a ten disi, den sortoe preiki dati joe e jere wawantron. Ma helfaja nanga na lasti kroetoe na officiëel kerkileri ete foe moro foeroe foe den kerki.

Moro foeroe foe den relisi foe na krestenhèit e agri pikinso ofoe krinkrin nanga a Lomsoe leri taki na kroetoe foe Gado e kon na toe pisi. Fosi, joe e kisi na „spesroetoe kroetoe” foe aparti sma. Te wan sma dede, dan en sili di den e denki taki a no e dede e kisi kroetoe wantewante èn e seni go foe têgo na ini hel ofoe hemel.a Dan na lasti kroetoe noso a kroetoe foe alasma e kon na a ten foe a kaba te den skin foe den dedewan sa opobaka èn tjari kon de wan baka nanga den sili foe den di no kan dede.

Tapoe na kroetoe dei disi, sili na ini hemel e tan drape èn sa tjari kon moksi nanga skin di meki foe no kan pori moro. Den di e pina ini hel e tan drape toe, èn den sili foe den e tjari konmakandra toe nanga wan skin di opobaka, di no kan pori. Ini akroederi nanga san son sma e taki, dan disi e meki na pina foe den e kon moro hebi. Den di de ete na libi leki libisma, no e dede. Den e kisi kroetoe ala di den de na libi ete, èn so leki fa den de „skin nanga sili”, den e go wantewante na hemel noso na hel.

A kan di a kan taki sma o njan toemoesi hebi pina ini helfaja, meki na heri tori foe na lasti kroetoe ini anoe foe Jesus Krestes kon tron wan frede sani foe denki foe en. Nanga a sabi disi, a sa froewondroe joe foe kon sabi taki, te joe loekoe en leti, taki den kroetoe foe Gado de foeroe tron wan reide foe prisiri èn taki a Kroetoe Dei sa de wan foe den moro kolokoe ten ini na heri libisma historia? Fa dati kan?

[Foetoewortoe]

[Sma di abi a reti foe a prenki na tapoe bladzijde 3]

Random/Sipa Icono