A preikiwroko fu yu de leki dow?
A PREIKIWROKO fu wi prenspari èn a de wan warti sani. Ma a no ala sma di wi e fruteri a bun nyunsu e frustan a sani disi. Srefi te sma e arki a Bijbel boskopu, toku a no ala ten den wani taki wi studeri Gado Wortu nanga den.
Na so Gavin ben denki fosi. Aladi a ben bigin go na den konmakandra, toku a no ben wani wan Bijbelstudie. A e taki: „Mi no ben sabi furu fu Bijbel èn mi no ben wani taki sma sabi dati. Mi ben frede taki mi ben o abi fu go na ini wan kerki èn mi no ben wani taki sma kori mi.” Te yu e leisi a sani disi, dan san yu e denki? Yu denki taki na fu soso yu ben o meki muiti fu yepi Gavin? Nôno. Fu san ede? We, luku san den leri fu Bijbel kan du nanga wan sma. Yehovah ben taigi en pipel na ini owruten: „Den sani di mi taki o saka kon leki dow, leki alen di e fadon safri na tapu a grasi” (Deut. 31:19, 30; 32:2). A fasi fa dow e wroko, e sori wi na wan heri moi fasi fa wi kan yepi ala sortu sma na ini a preikiwroko.—1 Tim. 2:3, 4.
FA WI KAN MEKI A PREIKIWROKO DE LEKI DOW?
Dow e saka kon na gron safrisafri. Soleki fa wi sabi, dan dow no e kon de wantronso. Ma a e kon de fu di a dampu na loktu e saka kon na gron leki finifini dropu watra. Na so den sani di Yehovah taki, ben ’saka kon tu leki dow’. Fa so? We, a ben e taki nanga a pipel fu en na wan switi fasi èn a ben e hori a firi fu den na prakseri. Wi kan teki na eksempre fu Gado te wi e lespeki a fasi fa sma e denki. Wi e gi sma na okasi fu denki fu wan tori, so taki densrefi kan si fa sani de trutru. Te wi e du dati, dan sma o de moro gaw fu arki san wi e taki èn wi o man preiki moro bun.
Dow e gi sani krakti baka. Te wi e denki bun san wi kan du fu yepi sma di wani sabi moro fu Bijbel, dan a preikiwroko fu wi o gi den krakti. Te wi e luku a tori fu Gavin baka, dan wi e si taki Chris, a brada di ben aksi en fosi fu studeri Bijbel nanga en, no ben dwengi en. Ma te a ben e taki nanga Gavin fu Bijbel, a ben pruberi ala sortu fasi fu meki a firi bun. Chris fruteri Gavin taki na ini a heri Bijbel wán prenspari boskopu de fu feni. Te a ben o kon sabi san na a boskopu dati, dan dati ben o yepi en fu frustan den sani di a e leri na den konmakandra moro bun. Baka dati Chris taigi Gavin taki na di a ondrosuku den profeititori na ini Bijbel, dan dati yepi en fu bribi taki Bijbel na trutru a Wortu fu Gado. Na so Chris ben man taki omeni leisi nanga Gavin fu profeititori di kon tru. Gavin ben lobi den takimakandra disi èn te fu kaba a bigin studeri Bijbel.
Dow e hori sani na libi. Na ini a kondre Israel, dreiten e hori omeni mun langa èn nowan alen e fadon. Efu dow no ben e fadon, den bon nanga den bromki ben o drei èn te fu kaba den ben o dede. Yehovah ben taki na fesi dati na ini a ten disi, wan sortu dreiten ben o de. San disi wani taki? We, sma ben „o angri fu yere den wortu fu Yehovah” (Amos 8:11). A ben pramisi taki den salfu Kresten ben o de „leki dow fu Yehovah” te den e preiki a Kownukondre boskopu, èn den „tra skapu” ben o yepi den nanga a wroko disi (Mika 5:7; Yoh. 10:16). A bun nyunsu fu a Kownukondre na wan seti fu Yehovah fu hori sma na libi. Wi e frustan o furu krakti a boskopu disi abi?
Dow na wan blesi fu Yehovah. (Deut. 33:13) A preikiwroko fu wi kan de wan blesi gi den sma di e arki. Gavin kisi blesi tu. Di a studeri Bijbel a feni piki tapu ala den aksi fu en. Fosi yu denki, a go na fesi èn a dopu. Now en nanga en frow Joyce e preiki a bun nyunsu fu a Kownukondre fayafaya.
Na agersi fasi Yehovah Kotoigi e nati a heri grontapu nanga a Kownukondre boskopu
SI A PREIKIWROKO LEKI WAN WARTI SANI
Te wi e prakseri san dow man du, dan dati kan yepi wi tu fu si en leki wan bigi grani taki wi kan teki prati na ini a preikiwroko. Fu san ede? We, wán dropu watra no man du furu. Ma milyunmilyun dowdropu kan nati a gron. Na so a de tu taki, te wi e teki prati na ini a preikiwroko a kan gersi leki wi no man du furu. Ma te wi e luku san ala den milyunmilyun futuboi fu Yehovah man du, dan wi e si taki den man preiki gi „sma fu ala kondre” (Mat. 24:14). Sobun, fa a preikiwroko fu wi kan de wan blesi fu Yehovah gi tra sma? A o de wan blesi gi den te a boskopu di wi e preiki de leki dow di e saka kon na gron safrisafri, di e gi sani krakti baka èn di e hori sani na libi.