Te a gersi leki a libi hebi tumusi

Luku san miti Sallya di e libi na ini Amerkankondre. A ben lasi ala den sani fu en di wan bigi winti wai. A e taki: „Mi no ben sabi efu mi ben o man teki en moro. Son leisi a ben gersi leki mi ben o law.”

Noso fa a de te wan sma di yu lobi dede? Janice, na ini Australia e taki: „Di mi lasi den tu boi fu mi, dan a sani dati broko mi so te taki mi no ben sabi moro san mi ben musu du. Mi begi Gado: ’Mi no man teki en moro! Meki mi dede. Mi no wani libi moro.’”

Wan tra eksempre na a di fu Daniel. A ben brokosaka srefisrefi di en frow waka gi en. A e taki: „Di mi frow taigi mi taki a ben waka gi mi, dan a ben gersi leki wan nefi boro mi ati. Ibri leisi baka mi ben e firi a pen disi na ini mi ati èn a teki wan tu mun fosi a pen dati gwe.”

Na ini A Waktitoren disi, wi o luku fu san ede wi no musu gi abra srefi te

• Wan rampu pasa

• Wan sma di yu lobi dede

• Yu trowpatna waka gi yu

• Yu abi wan seryusu siki

• Yu e firi leki yu no man moro

Wi o luku fosi san kan yepi wi fu no gi abra te wan rampu pasa.