Te wan rampu pasa

„Di a rampu miti wi, dan wi bruya. Hebi alen wasi tokotoko kon na ini a kontren èn sungu a heri presi. Wi lasi ala sani.”—Andrew, Sièra Leon.

„Baka a rampu wi drai go baka na wi oso. Noti no ben tan abra. Wi no ben man bribi. Mi umapikin fadon tapu en kindi èn a bari krei.”—David, Virgin Islands.

EFU yu pasa wan rampu libilibi, dan yu kan frustan san miti den sma di ondrofeni a srefi sani dati. Furu tron den sma disi no man bribi san miti den, den e bruya, den e broko den ede nanga ala sortu sani èn den e dren takru dren. Furu sma di pasa wan rampu libilibi lasi-ati èn den weri srefisrefi. Dati meki den no wani pruberi srefi fu seti den libi baka.

Efu yu lasi ala sani fu di wan rampu miti yu, dan kande yu e firi tu leki yu no man moro. Kande yu feni srefi taki na fu soso yu de na libi. Ma Bijbel e taki dati a libi no de fu soso èn taki howpu de gi wan moro bun tamara.

BIJBEL E GI WI HOWPU

Preikiman 7:8 e taki: „A kaba fu wan tori, moro bun leki a bigin fu en.” Syatu baka wan rampu, a kan gersi leki howpu no de. Ma te yu e meki muiti fu seti yu libi safrisafri baka, dan sani o go moro bun.

Bijbel e taki fu wan ten te „noiti moro sma o yere trawan . . . e bari krei fu di den e sari” (Yesaya 65:19). A sani disi o pasa te Gado Kownukondre o kenki grontapu kon tron wan paradijs (Psalm 37:11, 29). Rampu no o pasa moro. Wi no o memre nowan skin-ati èn nowan tra sani di ben meki wi firi sari. Wi kan bribi disi fu di na Almakti Gado e pramisi: „Sma no o memre den fositen sani moro èn den sani dati no o abi krakti na den tapu moro.”—Yesaya 65:17.

Denki a tori: A Mekiman ’wani taki sani waka bun gi yu na ini a ten di e kon èn a wani taki yu musu abi howpu’. Iya, na ondro a tiri fu Gado di bun dorodoro wi kan abi wan libi sondro problema (Yeremia 29:11). Efu yu sabi den sani disi, dan fa dati kan yepi yu fu no gi abra? Sally, di wi ben taki fu en na ini a fosi artikel, e taki: „Te yu e prakseri ala den moi sani di Gado Kownukondre o du gi wi na ini a ten di e kon, dan dati kan yepi yu fu no tan prakseri den sani di miti yu èn fu go doro nanga yu libi.”

Yu no ben o wani kon sabi sortu tra moi sani Gado Kownukondre o du gi libisma? Te yu kon sabi den sani dati, dan yu o si taki yu no abi fu gi abra fu di wan ten e kon te rampu no o pasa moro. Aladi yu e wakti a ten dati, Bijbel e sori san kan yepi yu fu no gi abra te wan rampu miti yu. Luku wan tu eksempre.

Bijbeltekst di kan yepi yu

Sorgu taki yu sribi nofo.

„Pikinso rostu betre moro furu tranga wroko. A betre moro leki te wan sma ben o feti fu fanga a winti.”—Preikiman 4:6.

Ondrosukuman e taki dati baka te wan sari sani miti yu, dan a kan taki „yu no o man sribi bun èn disi kan meki en moro muilek gi yu fu no sari moro”. Dati meki a bun fu rostu nofo.

Taki fa yu e firi.

„Tumusi furu broko-ede o meki wan sma lasi-ati, ma te sma e taki switi nanga en, dan a e firi prisiri.”—Odo 12:25.

Taki nanga wan famiriman fu yu noso nanga wan mati di yu e frutrow. Boiti taki famiriman noso mati e arki yu te yu e fruteri den fa yu e firi, den kan trowstu yu tu èn den kan gi yu a yepi di yu abi fanowdu.a

Prakseri a ten te sani o go moro bun.

„Wi e fruwakti nyun hemel nanga wan nyun grontapu, soleki fa [Gado] ben pramisi èn na drape retidu o de.”—2 Petrus 3:13.

a Son leisi wan sma di abi stress wan heri pisi ten kaba èn e firi leki wan hebi de na en tapu musu go na datra fu suku yepi.