Rutu iniwan denki puru di de teige den leri fu Gado!

1. Sortu warskow na apostel Paulus ben gi den salfu Kresten?

NA APOSTEL Paulus ben gi a warskow disi: „No libi moro leki den sma fu a grontapu disi” (Rom. 12:2). Paulus ben e taki nanga den fosi Kresten. Fu san ede a gi a rai disi na man nanga uma di ben e dini Gado kaba èn di ben salfu nanga santa yeye?​—Rom. 1:7.

2-3. Fa Satan wani meki wi drai baka gi Yehovah, ma fa wi kan puru iniwan fowtu denki di rutu dipi na ini wi ati?

² Paulus ben e broko en ede fu di son Kresten ben teki den fowtu denki fu a grontapu fu Satan abra (Ef. 4:17-19). A sani disi kan pasa nanga iniwan fu wi. Satan na a tiriman fu a grontapu disi èn a kan gebroiki difrenti sani fu pori wi denki. Fu eksempre, efu a sabi taki wi wani abi biginen noso taki wi wani kon pôpi, dan a o pruberi fu gebroiki a sani dati fu meki wi drai baka gi Yehovah. A kan gebroiki srefi den sani di wi leri na oso, na skoro noso sani di wi leri fu tra sma fu meki wi denki leki en.

³ A de so taki wi man rutu iniwan fowtu denki puru? (2 Kor. 10:4) Luku san Paulus e taki: „Den sani di wi e broko na den fowtu denki fu sma èn ala sortu kefalek denki fu sma di de teige a sabi fu Gado. Wi e wini ala den denki disi. Dan den de leki katiboman èn wi e meki den gi yesi na Krestes” (2 Kor. 10:5). Iya, Yehovah kan yepi wi fu rutu iniwan fowtu denki puru di wi abi. Efu wan sma siki, dan a e dringi dresi fu feti a siki. Na so a de tu taki efu wi abi son denki ete fu a grontapu fu Satan, dan Gado Wortu kan yepi wi fu rutu den denki disi puru.

„KENKI UN DENKI”

4. Sortu kenki furu fu wi ben abi fu tyari kon di wi bosroiti fu dini Yehovah?

⁴ Prakseri den kenki di yu ben musu tyari kon di yu bigin studeri Bijbel èn di yu bosroiti fu dini Yehovah. Furu fu wi ben abi fu tapu nanga sani di no bun (1 Kor. 6:9-11). Wi breiti srefisrefi taki Yehovah yepi wi fu no du sani moro di no bun!

5. San na tu sani di wi musu du soleki fa Romesma 12:2 e sori?

⁵ Ma noiti wi musu denki taki wi no abi fu kenki moro. Awinsi wi tapu fu du den seryusu sondu di wi ben e du fosi wi dopu, toku wi musu luku bun nanga iniwan sani di kan meki taki wi du seryusu sondu baka. Fa wi kan du dati? Paulus taki: „No libi moro leki den sma fu a grontapu disi, ma kenki un denki, so taki unu kan kenki un libi” (Rom. 12:2). Sobun, wi musu du tu sani. A fosi sani di wi musu du na taki wi ’no musu libi moro’ leki den sma fu a grontapu disi. A di fu tu sani na taki wi musu kenki wi denki so taki wi kan ’kenki wi libi’.

6. San wi e leri fu den sani di Yesus taki na Mateyus 12:43-45?

⁶ Paulus e sori taki wi no musu du neleki wi kenki, ma wi musu kenki trutru. (Luku a faki „Wi kenki trutru noso a gersi leki wi kenki?”) Wi musu kenki a fasi fa wi e denki èn a fasi fa wi e firi. Boiti dati, wi musu kon lobi du sani di Yehovah feni bun. Sobun, wi alamala musu aksi wisrefi: ’Mi kenki soso den sani di tra sma e si, noso mi kenki dipi na ini mi ati?’ Na aksi disi prenspari. Na Mateyus 12:43-45 Yesus sori san wi musu du. (Leisi en.) Den wortu disi e leri wi wan prenspari sani: Wi no musu puru den fowtu denki nomo, ma wi musu leri fu denki na wan fasi di Gado feni bun.

’WI MUSU MEKI A DENKI FU WI KON NYUN’

7. Fa wi kan kenki a fasi fa wi de dipi na ini wi ati?

⁷ A de so trutru taki wi man kenki a fasi fa wi de dipi na ini wi ati? Gado Wortu e piki: „Tan du muiti fu meki a denki fu unu kon nyun. Un musu kisi nyun fasi fu tron sma di de leki fa Gado wani, sobun, reti-ati sma di e gi yesi na Gado ala ten” (Ef. 4:23, 24). Sobun, wi man kenki, ma a no makriki. Wi no musu pruberi nomo fu basi takru firi èn fu no du sani di no bun. A ’denki fu wi musu kon nyun’. Dati wani taki dati wi musu kenki a fasi fa wi e firi, a fasi fa wi e tyari wisrefi èn wi musu leri fu du sani fu di wi lobi Yehovah. Fu man tyari den kenki disi kon, wi musu meki tranga muiti.

8-9. Fa na ondrofenitori fu wan brada e sori o prenspari a de fu kenki dipi na ini wi ati?

⁸ Meki wi luku na eksempre fu wan brada di ben lobi feti fosi. A brada disi ben e dringi furu sopi èn a ben lobi feti nanga sma, ma a tapu nanga den sani disi èn te fu kaba a dopu. Disi meki taki den sma na ini a pikin foto fu en bigin denki moro bun fu Yehovah Kotoigi. Ma syatu baka di a dopu, a kisi wan tesi di a no ben fruwakti. Wan neti, wan drunguman kon na en oso èn a ben wani feti nanga a brada. Na ini a bigin a brada hori ensrefi. Ma di a man kosi Yehovah, a brada lasi ensrefi. A go na dorosei, dan a fon a man. San ben de a problema? Bijbel ben yepi en fu dwengi ensrefi fu no feti, ma dipi na ini en ati a no ben kenki ete. A no ben kisi nyun fasi ete.

⁹ Ma a brada disi tan meki muiti fu kenki (Odo 24:16). Den owruman yepi en fu tan wroko na ensrefi. Te fu kaba a tron wan owruman. Ma wan neti a brada disi kisi wan srefi sortu tesi di a ben kisi wan tu yari pasa. Leti na fesi a Kownukondre zaal wan drunguman ben wani fon wan fu den tra owruman. San a brada fu wi du? A taki nanga a drunguman na wan lespeki fasi. Te fu kaba a man no ben atibron moro èn a brada tyari en go na oso. Fa a du kon taki disi leisi a brada no lasi ensrefi? A brada fu wi kisi nyun fasi. Dipi na ini en ati, a brada tron wan sma di abi sakafasi èn di lobi freide. Disi meki Yehovah kisi glori!

10. San wi musu du efu wi wani kenki dipi na ini wi ati?

¹⁰ A e teki ten fu kenki èn wi musu du tranga muiti tu (2 Petr. 1:5). A kan teki furu yari srefi. A no te wi e dini Yehovah furu yari langa, dan wi o kenki. Ma wi musu du ala san wi man fu kenki dipi na ini wi ati. Meki wi luku wan tu sani di kan yepi wi.

FA WI KAN MEKI A DENKI FU WI KON NYUN?

11. Fa begi e yepi wi fu meki a denki fu wi kon nyun?

¹¹ Begi na a fosi prenspari sani di wi musu du. Wi musu begi neleki a psalm skrifiman. A ben taki: „Gado, mi e begi yu, meki mi kon abi wan krin ati èn meki mi kisi wan nyun denki, so taki mi no degedege” (Ps. 51:10). Wi musu si taki a de fanowdu fu kenki èn wi musu aksi Yehovah fu yepi wi. Fa wi du sabi taki Yehovah o yepi wi fu kenki? Luku san Yehovah pramisi den trangayesi Israelsma na ini a ten fu Esekièl. A taki: „Mi o meki den tron wán èn mi o meki den kisi wan nyun denki. . . . Mi o gi den wan ati di safu [wan ati di de klariklari fu gi yesi na Gado]” (Esek. 11:19). Yehovah ben de klariklari fu yepi den Israelsma fu kenki èn a wani yepi wi tu.

12-13. (a) Fu san wi musu denki dipi, soleki fa Psalm 119:59 e sori? (b) San wi musu aksi wisrefi?

¹² Wan tra prenspari sani di wi musu du, na taki wi musu denki dipi. Te wi e leisi Gado Wortu ala dei, dan wi musu meki ten tu fu denki dipi fu san wi leisi. Disi kan yepi wi fu si sortu denki nanga firi wi musu kenki (leisi Psalm 119:59; Hebr. 4:12; Yak. 1:25). Wi musu ondrosuku wisrefi fu si efu wi lobi iniwan fowtu denki fu a grontapu disi. Wi musu si sortu swakifasi wi abi èn wi musu wroko tranga fu kenki den fasi disi.

¹³ Yu kan aksi yusrefi: ’Mi e dyarusu tapu trawan, awinsi na wan pikinso nomo?’ (1 Petr. 2:1) ’Mi feni taki mi bun moro trawan fu di mi kisi bun skoroleri noso fu di mi abi furu moni?’ (Odo 16:5) ’Mi e wisiwasi sma di no abi den srefi sani di mi abi noso di de fu wan tra ras?’ (Yak. 2:2-4) ’Son sani fu a grontapu fu Satan e hari mi?’ (1 Yoh. 2:15-17) ’Mi lobi luku noso arki sani di abi hurudu noso ogri na ini?’ (Ps. 97:10; 101:3; Amos 5:15) Te wi o piki den aksi disi, dan wi kan si sortu kenki wi musu tyari kon. Te wi e rutu den fowtu denki nanga firi puru na ini wi ati, dan wi o prisiri wi hemel Tata.​—Ps. 19:14.

14. Fu san ede a prenspari fu suku bun mati?

¹⁴ A prenspari tu fu suku bun mati. Den mati fu wi abi furu krakti na wi tapu (Odo 13:20). Te wi de na wrokope noso na skoro, wi de nanga sma di no o yepi wi fu denki na wan fasi di Gado feni bun. Ma na den Kresten konmakandra wi kan feni den moro bun mati. Drape wi o kisi deki-ati fu „abi lobi èn fu du bun wroko”.​—Hebr. 10:24, 25.

„TANAPU STEIFI” NA INI A BRIBI

15-16. Fa Satan e pruberi fu kenki wi denki?

¹⁵ Hori na prakseri taki Satan o tan meki muiti fu kenki wi denki. A sabi taki den sani di wi e leri na ini Gado Wortu e yepi wi fu denki soleki fa Gado e denki. A e gebroiki ala sortu fowtu leri fu meki wi denki tra fasi èn fu meki wi tweifri.

¹⁶ Satan e tan poti a srefi sortu aksi di a ben poti gi Eva na ini a dyari fu Eden. A ben taki: „A de so trutru taki Gado taki dati . . . ?” (Gen. 3:1) Na ini a grontapu fu Satan, wi e yere furu aksi di kan meki wi tweifri. Aksi soleki: ’A de so trutru taki Gado no feni en bun taki tu man noso tu uma e hori nanga makandra? A de so trutru taki Gado no wani taki yu hori Kresneti noso friyari-oso? A de so trutru taki Gado no wani taki yu teki brudu? A de so trutru taki wan Gado di abi lobi no wani taki yu bumui nanga mati nanga famiri di puru fu a gemeente?’

17. San wi musu du te sma e poti aksi fu meki wi tweifri fu san wi e bribi èn san o de a bakapisi, soleki fa Kolosesma 2:6, 7 e sori?

¹⁷ Wi musu de seiker fu san wi e bribi. Efu wi no sabi den piki tapu prenspari aksi di abi fu du nanga a bribi fu wi, dan wi kan bigin tweifri. Te wi e tweifri, dan te fu kaba dati kan pori wi denki èn wi bribi kan kon swaki. Sobun, san wi musu du? Gado Wortu e taigi wi taki wi musu kenki wi denki so taki wi kan sabi san na „a wani fu Gado di bun, di e gi en prisiri, èn di no e mankeri noti” (Rom. 12:2). Te wi abi a gwenti fu studeri Bijbel, dan wi o de seiker taki den sani di wi leri tru. Wi no o tweifri taki den wet fu Yehovah bun gi wi. Neleki fa den rutu fu wan bon e meki a tanapu steifi, na so wi o „tanapu steifi” na ini a bribi.​—Leisi Kolosesma 2:6, 7.

18. San wi musu du efu wi no wani taki a denki fu a grontapu fu Satan abi krakti na wi tapu?

¹⁸ Wi srefi musu du muiti fu abi wan tranga bribi. Nowan sma kan du dati gi wi. Sobun, tan meki muiti fu kenki yu denki. Begi doronomo. Aksi Yehovah fu gi yu en santa yeye. Denki dipi fu san yu e leri. Tan ondrosuku yusrefi fu si sortu denki nanga firi yu musu kenki. Suku bun mati di o yepi yu fu kenki yu denki. Te yu e du dati, dan a denki fu a grontapu fu Satan no o abi krakti na yu tapu èn yu o man rutu iniwan denki puru di de teige den leri fu Gado.​—2 Kor. 10:5.