Brifi foe a bijkantoro

Lobi brada nanga sisa,

Wi de grantangi foe skrifi na brifi disi gi oen alamala. Na ini na heri historia foe libisma Jehovah ben gi en pipel someni réde foe de grantangi. Foe de grantangi ben de ook toe alaten wan marki foe Jehovah anbegiman di ben meki taki tangi de spesroetoe wan tori foe na begi foe den. Na psalmsingiman foe eksempre ben skrifi ini Psalm 118:1: „Taki Jehovah tangi.” A ben ferteri ook toe na wan moi eenvoudigfasi na sortoe réde a ben gi na dek’ati dati: „Taki Jehovah tangi, bika en de boen; bika en lobi boenfasi e tan te ten di no abi marki.” Joe ati e kon waran ook toe nanga na boenfasi foe Jehovah?

Te wi e loekoe baka na den jari di psa na ini Jehovah dienst dan wi alamala tapoe na fundamenti foe wi égi ondrofeni, abi rede foe de grantangi na Jehovah. Prakseri pikinso na disi: Wi e libi now kaba na ini 1983. Na organisaatsi foe wi na ini na kondre disi gro foe 10 prékiman na ini 1945 kon miti wan nomroe foe 946 prékiman foe na boen njoensoe. Na ini den jari di psa foeroe owroe getrow wan ben gwe libi wi, dede ben hari den poeroe foe wi, ma fa den ben libi wan bericht foe loyaliteit nanga horidoro na baka! Wi e taki Jehovah grantangi foe den foeroe eksempre foe getrowfasi na wi mindri pe joe abi foeroe wrokoman foe na fosi joeroe na ini. Joe abi wantoe foe den owroe getrow wan dati na ini joe gemeente?

Èn san wi sa taki foe na kon moro foeroe foe den faciliteit? Wantoe foe wi kan memre na bigi oso na Zwartenhovenbrugstrati ete, wan bijkantoro, wan zending-oso nanga wan kownoekondrekomakandrapresi di pikinmoro ben loekoe foe fadon. Baka dati na bijkantoro ben froisi go na Weidestrati tapoe na oekoe foe Rust en Vrede-strati tapoesé foe wan chinési wenkri. Drape a ben abi presi foe den zendeling ben kan libi èn na fosi kownoekondre-komakandrapresi na ini foto di wisrefi bow ben kon na Gemenelandsweg. Na ini 1964 na moi èn boen oso na Wichersstrati ben kon èn na ini den jari di psa foeroetron ben meki kon moro bigi. Wan heri njoen kownoekondre-komakandrapresi kon a tapoe èn na owroe konmakandrapresi tron wan presi gi na bijkantoro foe seni boekoe gi den gemeente. Disi ook toe no de wan rede foe de grantangi?

Ija, „taki Jehovah tangi” gi den dienst foe den getrow èn koni srafoe”. Den brada disi e doe getrow na wroko di na Méstri ben gi den (Matt. 24:45). Ibri wiki wan njoen tijdschrift, ibri jari njoen boekoe, brochure nanga tractaat, njoen cassette lolo nanga bijbelboekoe, bijbeldrama, toemsi moi kownoekondre pokoe, nanga somoro fara. „Wan switi afersi no e seki” wi ati sodati wi e kon ini boewégi foe taki neleki den manpikin foe Korach „wi wroko abi foe doe nanga wan kownoe”? (Ps. 45:1) A no de so dati na dipi lobi foe wi gi na kownoe èn gi en lobi boen-ati Tata no e tjari wi so fara foe wani foe taki? Disi sondro degedege ben meki dati na ini na moen april wan toemsi moi bericht foe préki-wroko ben bow. Sowan 946 prékiman ben de ini na dienst èn 128 foe den ben de jepi pionier. Fa disi ben de wan toemsi moi fasi foe sori grantangi gi Jehovah no-ferdini boenfasi!

Èn san na ten di de krosbé na wi fesi sa tjari kon? Baka wantoe wiki wi „Kownoekondre-wán-fasi”-districtcongres e bigin èn na ini oktober wi kondre e kisi na fisiti foe wi zone-opziener, David Mercante, wan memre foe Bethel ini Brooklyn. Èn aladi disi e fré psa esesi baka makandra, dan doesoendoesoen zendeling nanga trawan e reis foe go na den congres foe den kondre foe pe den ben komoto. Bijkantoro e wij in, ofoe ben wij in kaba, ini Australië, Denemarken, Spanjorokondre, Engeland, Doisirikondre nanga Nederland.

Ete wan spesroetoe sani de pe wi kan de grantangi foe en. Ini Leicester, Engeland, tapoe 1 oktober na jarikomakandra foe na internationale corporatie foe na Genootschap sa hori. Sowan féfi hondro brada di abi belangstelling foe den tra presi foe Europa gi den nen kaba foe de na a bigi okasi disi. Na wan toe wiki na baka na 29 oktober dan na njoen bijkantoro ini Emmen, Nederland, sa wij in.

Lobi brada nanga sisa, den switi afersi disi no e seki joe ati, di alamala abi foe doe nanga na kownoekondre èn nanga na loyaal tiriman foe na kownoekondre disi, Jezus Kristus? Fa a ben sa de wan moi sani foe de grantangi foe disi. A no de foe taki dati ibriwan foe wi tapoe en égi fasi sa opo doe wan sani nanga ala den boen sani disi, ma a no fiti dati alamala go prakseri san wi leki wan aparti sma èn leki osofamiri kan doe foe kan span wisrefi troetroe tranga gi Jehovah èn foe wi meki wi persoonlek matifasi nanga en kon moro dipi? Ook toe foe disi na ten e kon moro sjatoe. Meki Jehovah tan jepi wi alamala foe soekoe na kownoekondre nanga en regtvaardikifasi.

Oenoe brada tapoe na bijkantoro ini Paramaribo