Pristeri na boen njoensoe — Nanga a tjari foe gobaka na den abonnees
1 Na ini november nanga december wi ben abi na abonnementveldtocht foe Ontwaakt! nanga Na Wachttoren. A no a misi, dati na ini den moen disi wan lo abonnement ben sroto, èn a boen te wi e go fisiti den adres disi baka foe si efoe oen ben sa kan bigin wan bijbelstudi. Fa wi kan doe disi?
2 Efoe na wantoe wiki psa kaba di a abonnement ben sroto, den no sa kisi den tijdschrift nanga post ete. Wi ben sa man tjari wan gobaka nanga den more njoen uitgave. Baka wantoe foe den fisiti disi wan banti foe matifasi e bigin gro. Foeroetron wan boen takimakandra bigin tapoe na fundamenti foe wán ofoe toe artikel foe san a njoen abonnee sa abi belangstelling. A de prenspari, foe sabi den tijdschrift boen èn foe tjari wan fisiti foe matifasi. Meki na abonnee si taki joe abi belangstelling gi en èn dati den bodoi di joe abi de toemsi prenspari foe en égi tan-boen èn kolokoe.
3 Ma efoe wan abonee e kisi en tijdschrift kaba nanga post ofoe no e kisi en, prakseri dati oen marki na den abonnee de foe bigin wan bijbelstudi. Dati den kisi bodoi, no de nofo. Na eunuch ben abi na boekoe Jesaja, ma a ben de fanowdoe dati Filippus ben poeroe den sani kon na krin gi en foe a ben ferstan den (Tori. 8:27-36). Filippus ben gebroiki na direkte fasi foe opo wan studi èn wantron wan bijbelstudi ben ori di ben gi froktoe. Foe san-ede joe no e proberi a srefi na abonnee? Efoe a fosi moeiti disi waka boen ofoe no waka boen, pristeri nanga krin taki foe konbaka èn foe studeri na bijbel nanga sma. Djaso wan fasi de fa joe ben sa man foe doe dati:
4 Te wisrefi abi wan abonnement, dan oen sabi pikinso oten den sa kisi den uitgave nanga post. Baka wan toe dé oen ben sa kan psa na a sma foe kan sori en tapoe moi artikel na ini a njoen uitgave. Efoe a de mogelek, a de boen sontron foe go sidon nanga a abonnee makandra èn lési wan toe paragraaf. Den sortoe switi takmakandra disi foeroetron baka wan pisten kan kon tron wan bijbelstudi. Te wan sma e tjari sowan fisiti, a kan gi en mede-abonnee odi tapoe switifasi èn moro fara a kan taki wan sani leki: „Mi sabi taki na net joe kisi joe Wachttoren [ofoe Ontwaakt] foe [na datum] nanga na post, bikasi misrefi kisi a di foe mi net, èn mi ben moesoe prakseri joe di mi ben e lési na artikel disi. [Meki a si na artikel] Efoe joe abi a di foe joe djaso, dan mi ben sa wani foe sori joe nanga prisiri tapoe wan sani di mi ben lési en foe san mi ben abi boen belangstelling gi.” Den sortoe fisiti disi, awansi den sjatoe, ben sa kan meki kon moro langa èn ben sa kan tjari oen go na wan moro dipi takimakandra o moro wan boen matifasi e gro. Te foe kaba na sma foe na oso sa wakti tapoe na alawiki bijbeltakimakandra di a abi nanga joe. Te na ten lepi gi dati, wan studi kan bigin nanga jepi foe na Tégo libi-boekoe.
5 Wi howpoe dati a sa waka joe boen nanga a bigin foe studi na den sma disi di sori dati den abi belangstelling gi na wortoe foe Gado. Prakseri dati wi wani foe jepi den foe tron troe discipel foe Jezus Kristus (Mat. 28:19, 20). Sori switifasi na den fisiti foe joe: meki sma si dati joe abi opregti belangstelling gi den nanga den osofamiri. Jepi den foe si fa den tijdschrift Na Wachttoren nanga Ontwaakt! di den e kisi sa meki den sabi foe Gado nanga san a abi na prakseri foe doe, kon moro bigi. Pristeri tapoe na joisti momenti foe studeri nanga den èn ori joesrefi na den mofo di joe meki foe jepi den foe teki sabi na ini den di e tjari den go na a libi foe tégo. — Joh. 17:3.