Sori a sari-ati foe Jehovah ini wi libi — Leki jepi-pionier
1 Presi foe a hori ensrefi na en toewijzing foe préki ini na di foe négi jarhondro bifo G.T. gi den Ninevésma, Jona ben teki na bosroiti foe teki sipi na a selanpresi Joppe foe go na Tarsis (Spanjorokondre) di ben didon sowan 3500 kilometer moro fara toe Ninevé. Kapitel wán foe na bijbelboekoe Jona e ferteri fa èn foe san-ede den ben trowe en foe a boto go ini a se na a ten foe wan bigi winti, èn wan bigi fisi ben swari en tap Jehovah wortoe èn bakaten ben poti baka tapoe dré gron. Ini kroederi nanga wan tweede komando foe Gado, a ben go na en toewijzing èn a ben taki drape: „Ete sowan 40 dé èn Ninevé sa drai ondrosé kon na tapoe.” A dorosé foe a foto a ben wakti ini a kowroepe foe wan batra-krabasibon, di ben gro kefarlek gaw foe si san ben o psa nanga a foto. Ma a tra dé a bon ben dré, èn wan faja oostoewinti èn wan son di ben e bron foe troe ben e pina Jona, san ben meki en ati kon faja. San Jehovah ben doe ini disi? Sortoe les Jona ben moesoe leri?
2 Ini Jona 4:10, 11 wi e lési: „Ma Jehovah ben taki: ’Joe, foe joe sé, joe ben firi sari-ati nanga na batra-krabasibon, gi san joe no ben wroko te foe dede gi èn di joe no ben meki a gro, di ben sori foe de noti moro leki wan sani di ben gro ini wan neti èn di ben dede leki noti moro leki wan sani di gro ini wan neti. Èn mi foe mi sé, mi no ben moesoe firi sari-ati nanga Ninevé, a bigi foto, pe moro leki wan hondro toetenti doesoen sma de di no sabi kwet’kweti na difrenti mindri den leti- nanga kroektoe anoe, nanga ooktoe foeroe osometi?’” Jehovah ben sori djaso en sari-ati, wan égifasi di na proféti Jona ben moesoe kisi na krakti foe si a mene foe en moro krin.
3 Jehovah ben méne taki den Ninevésma ben de so don dati den no ben kan sabi na difrenti mindri den anoe? Nono, bika, bewijsi di gi foe archeologie (sabi di e diki gron foe poeroe den owroe foto kon na loktoe) e kotoigi foe den technise sabi foe doe sani. Moro foeroe disi ben sori taki eigenlek den no ben abi no wan boen markitiki nanga san den ben kan kroetoe san ben de joisti ofoe no te joe loekoe en foe na sé foe Jehovah. Pas a baka di Jona ben meki Jehovah boskopoe bekenti, den ben kan si a difrenti a mindri boen nanga ogri, baka foe dati den ben abi beraw èn ben drai den baka gi na ogri. Disi ben plisi Jehovah troetroe.
4 Omeni sma e libi ini oenoe kontren di na kerkisé ’no sabi srefsrefi na difrenti mindri den leti-anoe nanga den kroektoe-anoe’? Den no de foeroe doesoendoesoen toe? Srefi now toe Jehovah no ’wani dati wan sma moesoe pori ma a e winsi taki ala sma sori beraw’ (2 Petr. 3:9). Fa wi abi wan kefarlek moi okasi foe sori Jehovah sari-ati ini wi prékiwroko! O moro foeroe wi e go na den sma doro ofoe e taki nanga den sma na tapoe strati, o moro bigi na okasi foe den de foe kisi wini foe Gado sari-ati.
5 Den wortoe ini na bigintekst foe na bijbel (Hebrewtongo: rácham, Griki: éleos), di vertaal nanga sari-ati noso firi sari gi wan sma, wani taki „faja te kon redi, firi waran nanga safoe firi”, èn „firi sari gi wan sma di e sori ensrefi ini san wan sma e doe.” A no e kari na prakseri nomo foe meki wan kroetoe kon moro lekti nanga omstandigheden di e meki en kon moro safoe, ma moro foeroe foe positief, actief doe na a sé foe wan sma di abi jepi fanowdoe. A wortoe e gebroiki gi na Samariasma di ben ’sori sari-ati gi wan séker sma’. Joe kan meki a sori foe sari-ati gi den sma na ini joe kontren di abi jepi fanowdoe kon moro bigi. Joe kan wroko leki jepi-pionier ini november? A ben sa de wan bigi grani foe kan sori a égifasi disi foe Jehovah so meni leki a kan.
6 Wan lo sani de ini a gemeente di ben sa kan doe foe jepi joe foe ondrofeni na prisiri foe na jepi pionierdienst. Den owroeman foe den gemeente pe a jari di psa ini a moen november foeroe jepi pionier ben de, ben meki wi kan sabi fa dati ben kon. Ini ala den brifi foe den joe ben kan si wan sani taki den ben bigin sowan 2 moen a fesi foe meki plan. Tapoe ibri dienstkomakandra den ben taki foe en, èn ooktoe na tapoe den gemeente-boekoestudie den ben tan hori disi a libi. Den ben meki boen gebroiki foe den dek’ati di ben gi na ini Wi kownoekondredienst. Nofotron den ben aksi tapoe wan owroemankomakandra soema foe densrefi ben sa go na ini na jepi-pionierdienst, baka dati den ben taki disi makandra nanga den dinari ini na diniwroko. Moro fara den ben taki foe tra difrenti afersi.
7 Boen velddienstkomakandra sori foe de prenspari foe troe. A de gi ala prékiman, ma séker gi den jepi-pionier, wan bigi jepi te den velddienstkomakandra e waka boen ondro boen tiri. Na velddienstopziener moesoe sorgoe taki tapoe ibri aktie di de wan sma de di e tiri na groepoe èn di abi nofo gebied. Na tiriman moesoe sorgoe dati na velddienstkomakandra e hori sjatoe èn a e gi dek’ati. A de prenspari dati na groepoe de biten ini a gebied èn foe dat’ede meki na takmakandra no moesoe tan hori langa èn ooktoe na gebied no moesoe de farawe. Na tiriman kan jepi meki na aktie komoto boen foe di a e hori wan takmakandra di abi libi pe a pristeri foe a moen dati e kon de toe. Foe di son punt e poti krin na fesi den prékiman sa kisi jepi foe poti den na ini na velddienst foe gebroiki. Baka na takmakandra den prékiman moe prati boen sodati den kan wroko doeltreffend. Efoe a groepoe bigi, no seni alamala go na a srefi presi foe bigin ini a gebied ma prati na groepoe èn meki den bigin wroko tapoe toe noso moro punt. Sreka foe tjari den sma di no man waka so boen sodati den kan kibri den krakti gi na prékiwroko ini a gebied èn den no weri kaba te den doro drape. Na doe foe den rai disi sa jepi foe wan bigi pisi, taki na velddienstkomakandra komoto boen èn a sa wroko boen tapoe na a meki foe froktoe. — Lukas 10:29-37.
LEKI GEWONE PIONIER
8 Wan gewone pionier de gemiddeld 3 joeroe wan dé ini na velddienst. Joe jongoe ete, no trow èn de sondro ferprekti? Joe trow èn joe no abi ofoe joe abi wéniki pikin, sodati joe abi ten abra? Ofoe joe abi, nanga ala di joe abi wan hé jari, wan redelek gesontoe? Ofoe na wan tra fasi joe kan meki joe diniwroko kon moro foeroe? Dan kande na gewone pionierdienst nanga ala en blesi de a moro boen okasi gi joe foe sori a sari-ati foe Jehovah ini joe libi
9 Ini na dienstjari 1983 na ini na heri grontapoe 206.098 pionier ben de ini a dienst. Fa dati de wan heri moi nomroe! Ibritron moro prékiman e kon foe si dati na tak foe dienst disi de wan di den kan doe. Ini den 1504 gemeente foe Japankondre gemiddeld moro leki 10 gewone pionier de ini ibri gemeente. Foe dat’ede meki a no de wan ferwondroe sani dati 21% gro ben melde ini na nomroe foe prékiman. Ini Polen, pe foe den wettelek bepaling bijna a no kan foe doe part time wroko, wan heri moi gro ini a nomroe foe prékiman de. Foeroe jongoe sma e wroko wantoe jari tranga, kibri den moni moi èn dan den e go pionier. Wan heri bigi ipi ben kan tan moro langa leki den ben prakseri biginbigin, foe di Jehovah e jepi den na wan lobifasi. Den sani di den fisitiman foe den internationale congres foe a jari di psa ben tjari kon nanga den, ben gebroiki ooktoe foe na marki disi. Den foeroe doesoendoesoen kotoigi ini a kondre dati de wan bigi koti foe froktoe foe a moeiti foe den.
10 Efoe joe e prakseri foe go pionier, e ondrosoekoe joe situwasi eerlek, ondro begi, èn a e sori taki a kan, dan joe moe de positief. Poeroe na laatste pikinso twéfri di de kande ete, foe di joe o taki nanga den sma di de wan pisiten kaba na ini na blesi wroko, noso nanga wan foe den reizende opziener ofoe nanga en wefi. Den owroeman ini na gemeente nanga ala prisiri den sa sorgoe taki joe kisi joe formulier foe doe na aksi, a no trobi efoe a de gi jepi- noso gewone pionierdienst. Prakseri pikinso, taki a de wan kefarlek boen fasi foe sori a ini joe libi na sari-atifasi foe Jehovah. — Lukas 6:36.
11 Difrenti gemeente ben abi na okasi foe ondrofeni taki a jari disi boiti ini april, ooktoe na ini mei wan moi ipi jepi-pionier ben de, sodati na firi foe spesroetoe activiteit ben tan toe moen langa. Efoe november foe wan noso tra réde no sa de so wan moen di fiti gi joe, joe ben prakseri dan foe na mogelekheid foe pionier na ini oktober leki jepi-pionier? Tra sma wani de kande ala den toe moen ini a jepipionier efoe den abi nofo patna foe kan wroko makandra. Prakseri pikinso foe den blesi gi joesrefi, na gebied nanga na gemeente te na heri boen geest foe faja wroko nanga dati kan tan wan moen moro langa!
12 Prakseri serjoesoe foe na afersi disi ondro begi. No tron Jona di ben wani hari ensrefi poeroe foe en frantwortoe ma gebroiki na ten di de ete boen. „Loekoe”, neleki Petrus, „na pasensi foe wi Masra leki jepi”. — 2 Petrus 3:15.