Poti na anbegi fu Yehovah moro hey leki tra sani — Leki pionier
1 Ini Yesaya 2:2 tanapu: „A musu psa na ini na lasti fu na dey taki na bergi fu Yehovah sa poti steyfi na tapu den ede fu den bergi, èn den sa poti en seyker a tapu fu den pikin bergi.” Yehovah opo en anbegi na difrenti fasi èn den bun bakapisi de krin fu si. Furu sma „e kon” go na Yehovah organisâsi èn den wan di moksi den srefi kba nanga en, e gi ete moro sma wan kari fu di den e taki: „Kon, èn meki wi go na a bergi fu Yehovah.” — Yes. 2:3.
2 No wan enkri degedege de taki Yehovah anbegi teki wan hey presi. Ooktu ini wi kondre wi e si taki sma e tan kon ini na waarheid. Ma fa a de nanga wi aparti muyti fu gi moro sma wan kari fu teki na tru anbegi tapu den? Wi kan meki wi muyti kon moro bigi ini akruderi nanga den wortu fu tapusey?
3 Na furutendienst leki yepi- ofu gewone pionier e gi wi wan tumusi bun okasi fu abi wan prati na a kontru fu na profeytitori disi. San na den winimarki fu na diniwroko disi? Èn fu san-ede wi kan taki taki moro furu pionier de fanowdu ini Sranan?
MORO FURU PIONIER DE FANOWDU INI SRANAN
4 „Na gebied e wroko now kba so furu tron. Fu san-ede moro pionier de fanowdu ete?” Na prakseri disi wi e yere wawan tron, ma san den buweysi e sori? Den opziener di e waka lontu fu luku gemeente e fruteri taki furu gebied moro mendri e wroko so furu leki fosi. Ma na presi fu dati den e wroko moro fini. Fa dati so? Gemeente di ben meki kobroyki fu na ray ini a tori fu a wroko ini pikin grupu nanga wan bun konsensi, kon si taki nanga a fasi disi fu preyki moro furu tron wan takimakandra kan bigin nanga a ososma. Wan dinari ini na diniwroko di e wroko ini a gebied ben taki: „Fositen a ben kon na krin taki noyti wi ben abi nofo gebied. No wi no e wroko na gebied tu leysi srefi ini siksi mun, èn ala sma e taki taki den abi moro furu bun bakapisi ini a diniwroko.”
5 Yu ooktu si taki sma de now moro furu klariklari fu taki nanga wi? Fu san-ede dati de so? Wan reyde de taki wi e span wi srefi fu kobroyki moro taktik fu bigin nanga sma èn disi gi now kba bun froktu. Wan di fu tu reyde de taki sma e broko den ede moro furu leki fosi ben de a kofal fu di ala sortu sani e opo kon na grontapu. Aladi wi gebied no ala ten de kumakriki, wi no wani frigiti taki na ala pe sma abi den srefi fanowdu. Den wani libi na ini vrede nanga seykerfasi nanga den osofamiri. Soso Yehovah Kownukondre kan sorgu gi na fanowdu dati. Aladi na grontapu situwasi e kon moro muyliki, moro opregti sma ete sa arki na a kari fu wi fu kon na ’a presi fu anbegi’ fu Yehovah èn fu leri san den musu du fu a fiti fu den kisi libi ini na nyun grontapu,
6 Ini a dienstyari di psa dan na nomru fu osobeybristuka ben kren. Ete wan heri ipi sma de di wani stuka nanga wi. Yonguwan sa du bun tapu na nyun Yongusma e aksi-buku. Sma di e tweyfri taki na beybri skrifi nanga yepi fu santa yeye, sa kan kisi moy yepi fu na nyun Gado wortu-buku. Wi e libi ini wan span ten! Furu de fu du! Wi musu go moro fara fu kari sma fu kon na a tru anbegi! Seyker moro furu Pionier de fanowdu na ini Sranan!
SORTU WINI NA PIONIERWROKO ABI GI YU?
7 „Mi no denki taki mi de so bekwaam ini na diniwroko, ma mi kon si tru taki mi kan abi bun bakapisi te mi go moro furu tron ini na diniwroko.” Den wortu disi fu wan pikinso moro owru sisa abi furu waarheid. (Moro fara a de seyker moro bekwaam leki en srefi e taki.) O moro bigi wi prati de na a velddienst, o moro furu wi sa kan prati tijdschrift nanga buku, meki gobaka èn opo beybristuka. A no de fu taki taki ooktu leki preykiman wi kan poti moro ten na wan sey gi na velddienst èn dati na wan sani di warti prijse. Ma a de tru taki wan sma di e dini leki yepi- ofu gewone pionier, fu di den ben poti en na wroko seyker sa du moro ini na diniwroko leki a ben du leki preykiman. So leki den ben taki ini a kriboy lezing fu na distriktkongres, moro furu kan doro efu sma e go moro ini a diniwroko. Na takiman ben taki: „Furu kondre ini Afrika, Latinos-Amerkankondre nanga Asiya, so srefi tu wan nomru fu eylanti ini na Bigi Oceaan, abi wan gemiddelde fu moro leki 14 yuru wan mun di gemeente preykiman ben skrifi. Ini Rwanda gemeente preykiman ben tanapu 20,7 yuru ini na dienst a dienstyari di psa, aladi frufolgu ben de. Te wan sma e say psa marki, den e koti psa marki.” Efu wi go moro ini a diniwroko, wi sa doro moro tu èn na pionierwroko na wan moy okasi fu doro na marki disi. — 2 Kor. 9:6.
8 „Taki wi de bekwaam nofo, e kon fu Gado di meki wi trutru nofo bekwaam.” Den wortu disi ini 2 Korente sma 3:5, 6 e yepi wi fu kisi wan balans luku tapu na tori fu bekwaamfasi. Nanga yepi fu na tumusi bun leri tapu na dienstkonmakandra, na teyokrasiya diniwroko skoro, nanga yepi fu Wi Kownukondredienst, èn so moro fara, Yehovah e leri wi tapu wan fini fasi. Ma san de na problema? Furu tron wi no e kisi nofo okasi fu oefen san wi e leri. Na pionierwroko e pristeri wan tumusi moy okasi fu dati. Wan owruman di ben kan bigin wan beybristuka na wan yongu uma, ben skrifi: „Na presi fu mi wefi, mi ben teki mi umapikin nanga mi, di e pionier. . . . Leki pionier en beybrisabi di de klariklari fu kobroyki de wan moy yepi nanga horibaka.” A brada ben sabi taki en umapikin fu di a ben e pionier a ben kon bekwaam srefi srefi. Na yongu uma ben go na fesi èn ben dopu.
9 Baka na tumusi moy leri tapu na freyda bakadina fu na distriktkongres furu yongu brada nanga sisa e prakseri moro ete fu na tamara fu den. Fu san-ede un no sa meki na furutendienst tron yu winimarki? Na yepipionierdienst, nanga baka na gewone pionierdienstwroko na wan moy bigin. Ini wi kondre wi abi spesrutu pionier fanowdu ete èn disi den e piki fu na lijst fu den gewone pionier di poti na wroko. Na fisiti fu na Gilead-skoro èn na baka dati na diniwroko leki zendeling de wan tumusi bun marki di furu yongu brada nanga sisa poti gi den srefi. Èn fa a de nanga na Bethelwroko? Na a fosi presi den e luku ala ten na den pionier, fu di na Bethelwroko de wan fasi fu go moro fara nanga na furutendienst. So bun furu okasi de fu meki na furutendienst tron yu libimarki.
10 Moro nanga moro yongu brada e gi den srefi ini Yehovah organisâsi èn e teki frantiwortu na den tapu. Gi furu „Aksi fu leysiman” ini Na Wachttoren fu 1 yuli 1989 ben de tumusi interessant èn furu brada di no doro 20 yari ete, abi na fasti bosroyti fu go na fesi sotaki den fiti fu den poti den leki dinari ini na diniwroko. San na wan bun yepi fu doro disi? Ini Na Wachttoren fu 15 september 1985 den ben sori na tapu bladzijde 16 taki na pionierwroko de wan bun fasi fu doro na marki di wan yongu brada musu abi fu fiti fu den poti en na so wan wroko. Iya, na pionierwroko de wan moy fondamenti gi moro fara grani ini Yehovah organisâsi. Yongu brada, Yehovah organisâsi abi mansma fanowdu di kan tyari frantiwortu. Gi yu srefi èn meki na pionierwroko meki yu tron bekwaam.
11 Na pionierwroko a no de fu taki no de wan grani gi yongwan wwan. Furu pionier psa 70! Boyti fu den yeye blesi den e nyanbun ooktu fu gosontu buweygi fu skin èn kontakti nanga sma ini na gebied. Ooktu sisa di trow èn di abi pikin ben man fu teki na furutendienst na den tapu nanga yepi fu wan bun seti fu sani na fesi. Wantu sma e fruteri taki den feni na kweki fu den pikin moro makriki fu sensi na ten di den e tanapu ini na pionierwroko. Furu trowpatna di no abi fruplekti, e ondrofeni taki den abi furu moro prisiri ini den libi fu di den e tanapu, ini na pionierwroko. Na furuten pionierwroko de fu tru gi wan trowlibi. Iya, sma ini ala sortu libi situwasi teki na pionierwroko na den tapu èn ben feni wini fu dati.
YEPIPIONIERWROKO INI OKTOBER NANGA NOVEMBER
12 A no de fu taki taki a no ala sma kan go na ini na gewone pionierwroko ma furu preykiman wawan leysi ofu geregeld kan teki prati na a yepipionierwroko. Den mun oktober nanga november e gi moy okasi gi na yepipionierwroko. Yu sa de ooktu nanga den a yari disi? Furu tron na nomru fu yepipionier e anga na a faya di sma e kweki fu di den e taki nanga makandra fu na dienstgrani disi.
13 Now a de na ten fu poti sani na prakseri gi ala sani gi den spesrutu mun disi èn seti sani. Den owruman sa meki den aparti velddienstkonmakandra frukufruku bekenti. Den brada di e sorgu fu na gebied, den tijdschrift, èn so moro fara, sa wani de seykerseyker taki ala sani seti bun, so taki noti sa tapu no wan sma fu meki den mun oktober nanga november abi bun bakapisi. Ala sma kan prakseri gi den srefi fu san den man èn poti gi den srefi wan fasti marki gi den spesrutu mun disi. Dini leki wan gewone pionier, leki yepipionier ofu leki preykiman di e du moro furu leki san a gwenti.
14 Yehovah opo en anbegi nanga yepi fu na preykiwroko. Ibriwan fu wi abi na okasi fu wi sori krin taki na tru anbegi poti ooktu moro hey leki sani ini wi eygi libi. Fa wi de Yehovah grantangi taki a seti na seti disi fu na pionierwroko na ini en organisâsi! Ini Sranan wi abi moro fanowdu. Efu wi kan teki na furutendienst tapu, wi abi soso wini fu dati. Meki wi awansi fa a no fa meki na mun oktober nanga november heymarki ini na tru anbegi, fu di wi e gi tra sma na kari nanga den wortu: „Kon, èn meki wi go na a bergi fu Yehovah.”