Sori taki joe e broko ede nanga sma di sori belangstelling
1 Moro leki ala tra sma, Jehovah ben lobi foe sori taki a e broko ede nanga sma. A no ben gi sani na skin fasi wawan pasa marki, ma a ben gi oenoe den jeje sani di wi abi fanowdoe èn foe san wi e njanboen. A e broko ede sote nanga wi, taki a e ondrosoekoe srefi san de ini wi ati. — Ps. 139:23.
2 Di Jesus ben de na grontapoe, a ben waka finifini baka a model foe en Tata, foe sori taki a ben broko ede nanga tra sma. Memre a man di ben taigi Jesus: „Masra efoe joe wani nomo, joe kan meki mi kon krin”? Jesus ben piki: „Mi wani” (Mat. 8:1-3). San Jesus ben doe di a ben si fa wan weduwe ben sari? A ben stòp foe jepi en (Luk. 7:11-15). Joe kan de moro na ai foe sori taki joe e broko ede nanga sma di sori belangstelling?
3 Foe di wi e waka baka wi Tata, Jehovah, nanga en Manpikin, Krestes Jesus, wi toe moesoe sori taki wi e broko ede nanga sma di sori belangstelling. Wi e doe disi foe di wi e hori wan boen oso-foe-oso raport. Disi wani taki toe, foe skrifi a nen nanga a joisti adres foe a sma di sori belangstelling èn so srefi foe a tori foe san joe ben taki na a fosi fisiti. Dan, bifo joe e tjari a gobaka, sreka joesrefi boen. Efoe wi ben libi tijdschrift na a fosi fisiti foe wi, dan kande a gobaka foe wi kan abi leki gron wan spesroetoe prakseri foe san den e taki ini wan foe den artikel. Loekoe fa joe kan doe disi.
4 Efoe joe ben libi A Waktitoren foe 1 oktober 1992 na baka èn ben poti prakseri tapoe na artikel „Libisma abi troetroe wan Mesias fanowdoe?”, dan joe kan sreka joesrefi foe taki foe Openbaring 21:4 nanga Johanes 17:3, te joe e go baka.
Foe eksempel, baka te joe leisi Openbaring 21:4, joe kan aksi:
◼ „Fa wi kan de wan pisi foe so wan grontapoe? [Gi okasi foe piki.] Arki san a Mesias ben taki, dati ben de fanowdoe foe kan kisi libi ini wan grontapoe leki disi.” Leisi Johanes 17:3 baka dati, ala di joe e taki krinkrin dati sma kan kisi têgo libi ini wan vrede njoen grontapoe efoe den e teki sabi foe Gado nanga Krestes. Efoe a sma e sori pikinso belangstelling, proeberi foe bigin wan studie ini a traktaat Libi ini wan vrede njoen grontapoe.
5 Joe kan kisi boen piki efoe joe e taki foe wan penti, di joe ben teki na fesi, ini na Ontwaakt! foe 8 oktober 1992 di e taki foe „Joe kan wini negatief firi.” Te joe e tjari wan gobaka, joe kan gron joe takimakandra tapoe Filipisma 4:6, 7.
Joe kan aksi:
◼ „San joe e denki na a loesoe foe wini negatief firi ini a ten disi?” Agri efoe a sma piki boen èn taki dan: „A de moi foe si taki bijbel e taki foe den gronprakseri di, te joe e doe den, den e jepi sma foe kisi vrede foe froestan nanga ati. [Poti prakseri tapoe penti ini Filipisma 4:6, 7 di e fiti.] Bijbel e sori go na wan ten pe ala sma sa libi akroederi bijbel gronprakseri èn te situwâsi no sa de di o meki taki sma sa kisi negatief firi.” Taki baka dati, foe tra blesi ini a ten di de na wi fesi foe di joe e loekoe na traktaat Libi ini wan vrede njoen grontapoe nanga en, èn tjari en go tapoe wan studie.
6 Ma san efoe a ososma abi wan foe den poeblikâsi foe wi kaba? Foe san ede joe no e gebroiki en foe bigin wan bijbelstudie? Efoe den abi a Paradijs-boekoe, opo a bladzijde di e sori san de na ini èn aksi na ososma foe teki wan tori na mindri den trawan foe san a wani taki. Kande joe kan bigin wan bijbelstudie baka dati foe di joe e loekoe wan noso toe paragraaf nanga a ososma.
7 Efoe joe e sori taki joe e broko ede nanga sma di sori belangstelling foe di joe e sreka boen èn e tjari gobaka di abi boen bakapisi, dan dati e sori taki wi na sma di e waka baka Gado nanga Krestes, di wani foe someni sma leki a man feni kibri. — 2 Petr. 3:9.