Poti a fondamenti na a fosi fisiti foe joe
1 Tjari gobaka nanga boen bakapisi e kon moro makriki te wi e poti a joisti fondamenti na a fosi fisiti foe wi. Na Taki-go-taki-kon boekoe kan jepi wi foe doe dati.
2 Na presenteri di e kon now abi leki fondamenti na di foe toe inleiding na bladzijde 10 foe a Taki-go-taki-kon boekoe, ondro na ede „Bijbel/Gado.”
Baka wan switi odi, joe kan taki:
◼ „Wi e feni taki moro nanga moro sma ini a ten disi e firi wan fasi di no de seiker ini a tori foe pe den kan feni praktis piki foe basi den aladei problema. Joe feni taki disi de so? [Gi okasi foe a gi piki.] Sma ben gwenti foe loekoe go na bijbel foe kisi jepi. Ma now foeroe sma e taki dati den abi tweifri. Fa joe e denki foe bijbel?” Efoe a ososma e sori taki a e tweifri ini a tori foe a fasi fa bijbel doe kon, dan teki dan a traktaat Foe san ede joe kan froetrow ini bijbel èn leisi a di foe toe nanga a di foe dri paragraaf na bladzijde 2. Efoe na ososma e agri taki bijbel na a Wortoe foe Gado, dan soekoe èn leisi den tekst di den teki skrifi ini a di foe toe paragraaf na tapoe bladzijde 2 foe a traktaat, èn taki sjatoe foe disi makandra nanga en.
3 Efoe foeroe sma de ini joe gebied di e taki dati den no abi bribi, dan proeberi foe fiti den feifi inleiding na bladzijde 10 foe a Taki-go-taki-kon boekoe foe wiki a belangstelling foe den.
Joe ben kan taki:
◼ „Te wi loekoe ala den trobi na grontapoe ini a ten disi, dan foeroe serjoesoe sma e feni en moeilek foe bribi ini Gado. Noso efoe den e bribi ini en, dan den no e bribi taki a man foe loesoe den problema di e miti wi. Fa joe e denki foe dati? [Gi okasi foe a gi piki.] Loekoe san a traktaat abi foe taki foe libisma, sabidensi nanga bijbel.” Dan bigin foe leisi a di foe feifi paragraaf na bladzijde 3 foe a traktaat Foe san ede joe kan froetrow a bijbel.
4 Tjari aksi foe a traktaat kon a fesi foe seti sani gi a tra fisiti foe joe: Meki plan foe a fosi fisiti foe joe di o de soso a bigin foe wan lo fisiti nanga boen bakapisi. No abi a firi taki joe moesoe foe go na ini foeroe finifini pisi tori; èn joe no moesoe de so sjatoe nanga a tori foe joe taki a ososma e firi taki joe no abi troetroe belangstelling gi en. Baka te joe leisi toe noso dri paragraaf foe a traktaat, dan tjari aksi kon a fesi di joe kan takimakandra foe dati na wan fisiti ini a ten di e kon.
5 Leki wan eksempel, joe kan poti a prakseri tapoe a di foe dri paragraaf na bladzijde 4 èn aksi: „Joe e denki taki bijbel e gi nofo boeweisi foe wi kan froetrow san a e taki foe a ten di e kon?” Disi sa gi wan penti di wi kan sori go na en te wi go baka na a sma èn dan joe ben sa kan taki foe kapitel 9 nanga 10 foe Bijbel — Gado Wortoe noso di foe libisma?
6 Efoe na ososma sori abi opregti belangstelling èn a sori taki a e warderi den bodoi di wi e gi en, dan joe kan wani kande foe presenteri en a Gado Wortoe-boekoe na a fosi fisiti. Noso efoe a situwâsi e sori taki reide de foe dati, dan oen kan pristeri a Njoen Grontapoevertaling. Pe, na wan fasi di fiti, joe kan froeklari a wroko foe wi sjatoe taki a e kisi horibaka foe friwani bijdrage èn taki foe dati ede joe ben sa de grantangi foe kisi wan pikin bijdrage.
7 Efoe wi e si ibriwan ososma leki wan sma di kande kan tron wan disipel, dan wi sa doe moeiti foe gebroiki den kaba wortoe foe wi foe poti a fondamenti gi wan gobaka.