Aksi boksoe

◼ A boen taki wan sma srefi e druk den boekoe foe a Genootschap baka foe prati den gi tra sma?

Ini den jari di pasa a Genootschap ben meki wan lo boekoe di e taki foe pikinmoro ala tori foe bijbel sabi. Sma di no so langa pasa ben leri sabi waarheid kan abi a firi taki den misi foeroe foe den winimarki foe a materiaal di ben kon na doro ini a ten di pasa èn di no de foe feni moro nanga jepi foe a Genootschap. Sonwan ben gi boen foeroe ten foe kisi wan toe foe den owroe poeblikâsi disi, èn trawan ben teki en na den tapoe foe druk den boekoe foe a Genootschap baka èn den meki den de foe feni na ala sortoe fasi. Disi ben wani taki toe boekoe di ben druk njoen baka no so langa pasa nanga so srefi den wan di ben druk baka nanga computer. Ini son kefal den ben doe disi foe abi wini na monisei.

A getrow „srafoe” sabi wi jeje fanowdoe heri boen èn a e sorgoe gi sani „na a joisti ten” (Mat. 24:45). Te a ben de fanowdoe foe tjari son materiaal, di ben tjari kon na doro ini a ten di pasa, kon njoen baka na doro, dan a Genootschap ben sreka sani foe disi. Foe eksempel, den jaargang foe A Waktitoren foe 1960 te nanga 1985 ben druk baka èn ala sma ben kan kisi den. Te sma teki den eigi bosroiti foe druk den boekoe baka èn tjari a sortoe materiaal disi kon na doro, dan problema di no de fanowdoe kan kon.

Den e meki serjoesoe moeilekheid kon te a materiaal disi e druk baka èn e prati foe meki moni. Aksi Boksoe foe juni 1977 foe Wi Kownoekondre Dienst ben taki: „A moro boen sani foe no gebroiki theokrasia demakandra na ini Kownoekondrezaal, na den gemeente boekoestudie èn na bigi konmakandra foe Jehovah pipel, foe opo tori foe, noso bariwroko gi, a seri foe sani noso a doe foe wroko gi sma foe meki moni. Disi sa jepi wi foe poti ala prakseri di de fanowdoe tapoe jeje afersi èn hori bisnis wroko na a joisti presi.” Foe dati ede, a de prenspari foe wi no kisi a jeje foe meki moni te a e go foe doe bisnis nanga a Wortoe foe Gado noso sani di abi foe doe nanga dati.