Bigin bijbelstudie ini december
1 Jesus ben gi den disipel foe en a komando foe de leriman foe a boen njoensoe (Mat. 28:19, 20). A prenspari fasi foe wi foe gi leri na trawan na foe hori bijbelstudie. Joe e teki prati na a wroko disi? Efoe no, fa joe kan bigin wan studie so taki joe kan prisiri foe abi wan moro bigi prati ini a gi foe leri na trawan?
2 Kande wi ben gi na ososma wan traktaat èn ben pramisi foe kon baka foe taki makandra foe san skrifi na ini.
Te wi go baka na wan ososma pe wi ben libi a traktaat „A grontapoe disi sa tan?”, wi ben sa kan taki:
◼ „Di mi ben de djaso wan toe dei pasa, wi ben taki makandra foe a tranga foe wi ten èn dati Jesus ben taki soifri foe a situwâsi di de ini wi ten. Mi ben sa wani foe gebroiki wan toe miniti èn loekoe sjatoe wan toe bodoi ini a traktaat di mi ben libi gi joe. Loekoe san skrifi ondro na ondro-edewortoe ’A marki’.” Drai go na bladzijde 3 foe a traktaat, èn taki makandra foe den fosi toe noso dri paragraaf ondro na ondro-edewortoe dati èn leisi den tekst efoe ten de. Poti krakti na tapoe fa a profèititori foe Jesus e kon troe ini a ten disi. Meki mofo foe kon baka èn foe taki makandra foe den tra paragraaf ondro na ondro-edewortoe disi. Gi na ososma deki-ati foe leisi a materiaal bifo joe kon baka.
3 Noso joe ben kan taki wan sani leki disi:
◼ „A lasti leisi di wi ben taki, mi ben libi a traktaat di abi a nen A grontapoe disi sa tan? gi joe. Dan wi ben taki foe a ròl foe Jesus Krestes ini grontapoe afersi. Wi ben leisi en wortoe di skrifi ini bijbel na Johanes 17:3. [Leisi.] Foe di a de prenspari taki wi e teki leri foe Gado nanga Jesus efoe wi wani têgo libi, a warti ala moeiti foe doe san wi man foe teki so wan sabi. Di Jesus ben de na grontapoe, a ben prenki den foeroe toemoesi moi eigifasi foe Gado. A no de reidelek foe bribi taki o moro wi e kon sabi foe Jesus nanga en diniwroko, o moro wi e kon sabi en Tata? [Gi okasi foe piki.] Loekoe san a boekoe disi, A moro bigi libisma foe ala ten, e taki.” Leisi a fosiwan nanga a di foe toe paragraaf tapoe a di foe tin bladzijde foe kapitel 116. Poti krakti na tapoe, taki a boekoe disi abi na ini ala den bodoi ini den fo evangelitori di e taki foe Jesus èn e poti den tori disi na a fasi fa den ben pasa baka makandra. Poti prakseri na tapoe den spesroetoe titel foe den kapitel, den prenki, nanga a karta na a bigin foe a boekoe. Efoe a sma abi opregti belangstelling, dan pristeri a boekoe.
4 Baka te wi taki wan ososma, di ben teki a „Moro bigi libisma”-boekoe, odi, wi ben sa kan taki:
◼ „Leki fa mi ben taki na mi fosi fisiti, a Moro bigi libisma-boekoe ben meki foe gi bijbelstudie. Mi sa wani foe sori sjatoe fa a kan gebroiki na a moro boen fasi.” Opo a boekoe na kapitel 1, „Boskopoe komoto foe hemel”. Poti a prakseri foe na ososma tapoe den aksi di skrifi. Leisi a fosi aksi, baka dati go loekoe den fosi paragraaf. Tjari a prenki tapoe a di foe toe bladzijde kon ini a tori. Taki foe den aksi di tan abra, èn poti krakti tapoe den piki efoe nofo ten de. Bifo joe gowe, meki mofo foe kon baka èn foe go doro nanga a takimakandra.
5 Efoe wi tan abi wan positief fasi foe denki, e sreka boen na fesi, èn e meki gebroiki foe ibri okasi, dan wi sa de klariklari foe bigin wan bijbelstudie ini december.