Bijbel—A tjariman foe Gado gi ala sma
1 Sma bereken taki fo miljard bijbel druk na ini moro leki 2100 tongo nanga dialekt, èn dati e meki taki a Wortoe foe Gado de foe kisi gi moro leki 90 procent foe den sma di e libi na grontapoe. Ma tokoe wan angriten de na grontapoe, „foe a jeri di sma e jere a wortoe foe Jehovah” (Amos 8:11). Foeroe sma di abi wan eksemplaar foe bijbel no e leisi en, noso no e froestan san skrifi na ini. Fa wi kan boeweigi den foe gebroiki bijbel leki wan praktis tjariman na ini den libi?
2 Na ini december wi sa pristeri a boekoe De bijbel—Gods woord of dat van mensen? (Bijbel—A Wortoe foe Gado noso di foe libisma?) Na den presi pe sma abi belangstelling, wi kan pristeri so srefi a bijbelvertaling di wi ben feni wini foe en na ini den 34 jari di pasa—a Nieuwe-Wereldvertaling. Wi kan doe disi te wi e gi eksempre foe a krin fasi fa a e taki sani nanga disiten wortoe (Loekoe „Geïnspireerd”-boekoe, bladzijde 328, paragraaf 6.) Wi sa sori a bigi warderi di wi abi gi a presenti disi di wi kisi foe Jehovah, te wi e jepi tra sma na wan faja fasi foe teki a bijbel leki a tjariman foe Gado gi ala sma.
3 Joe ben kan bigin wan pristeri te joe e gebroiki a traktaat „Waarom u in de bijbel kunt geloven”. (Foe san ede joe kan bribi na ini bijbel) Joe ben sa kan taki:
◼ „Srefi ala di bijbel de foe kisi gi moro leki 90 procent foe den sma di e libi na grontapoe, tokoe wan toe sma nomo e leisi en doronomo. San joe denki na a reide?” Leisi den fosi toe paragraaf foe a traktaat, makandra nanga 2 Timoteus 3:16. Pristeri a Gods woord-boekoe. Te a sma teki a boekoe, taki dan san na a bijdrage. Efoe a sma weigri foe teki a boekoe, aksi na ososma dan foe leisi a tra pisi foe a traktaat. Poti krakti na tapoe a lasti edeprakseri, „De toekomst voorzeggen” (Taki na fesi fa a tamara de).
4 Te joe e go baka na sma pe joe ben libi a traktaat „Waarom u in de bijbel kunt geloven” (Foe san ede joe kan bribi na ini bijbel), joe ben sa kan proeberi disi:
◼ Baka te joe taki ete wan tron fa joe nen, joe kan leisi den toe lasti paragraaf foe a traktaat. Aksi na ososma efoe oiti a ben prakseri efoe a kan taki sma kan libi foe têgo na grontapoe. Baka te a piki, joe kan taki: „Jehovah Kotoigi de seiker taki ala den profeititori di de na ini bijbel sa kon troe, so srefi den wan di e taki foe wan toemoesi moi tamara gi ala sma di doro den markitiki foe Gado.” Sori a prenki na tapoe bladzijde 13 na ini a San Gado e aksi-brochure, èn go baka na lès 5 èn aksi en foe taki foe den piki tapoe den aksi di skrifi, èn na so fasi joe e bigin wan studie.
5 Na ini kontren pe den sma lobi relisi, joe ben sa kan proeberi a fosi fasi disi foe bigin taki:
◼ „Wi e gi sma deki-ati foe abi moro lespeki gi bijbel. Foeroe osofamiri abi wan bijbel, ma wanwan leisi nomo den e soekoe rai na ini bijbel te den abi serjoesoe problema. Joe si dati? [Gi okasi foe piki.] Kande den e bribi taki bijbel no de gi a ten disi moro. A boekoe disi, De bijbel—Gods woord of dat van mensen?, e gi overtoigi boeweisi taki bijbel de soifri na a sei foe sabidensi èn taki a e gi praktis loesoe gi den problema foe a ten disi di e kwinsi sma.” Poti krakti na tapoe wan toe penti foe kapitel 8 noso kapitel 12 foe a boekoe, èn pristeri a boekoe baka dati.
6 Te joe e go baka pe joe ben libi a „God’s woord”-boekoe na baka, joe ben kan taki:
◼ „Di mi ben fisiti joe a lasti leisi, wi ben taki fa bijbel e jepi foe loesoe den moeilek problema foe a ten disi. Den sma di teki bijbel leki a Wortoe foe Gado, ben kisi jepi toe foe libi moro kolokoe èn foe abi wan libi di e gi moro tevredefasi. Mi ben sa wani sori joe wán foe den praktis bijbel gronprakseri di den e froeklari na ini a boekoe di mi ben libi gi joe.” Taki foe wán foe den bijbel gronprakseri di de foe feni na ini kapitel 12, paragraaf 3-6, èn tapoe foe di joe e leisi paragraaf 7. Efoe a sma abi belangstelling, dan pristeri en wan studie na ini a Sabi-boekoe noso na ini a San Gado e aksi-brochure.
7 Owroe sma ben kan kisi belangstelling gi a pristeri di e kon now:
◼ „Wan ten ben de taki sma ben leisi bijbel na ini foeroe osofamiri èn taki osofamiri ben libi akroederi den gronprakseri foe bijbel. A ben de so toe na ini joe osofamiri? [Gi okasi foe piki.] Na ini a ten disi a gersi taki sani e poeroe a prakseri foe foeroe sma foe no gebroiki ten foe leisi bijbel, noso den e firi taki den moreel markitiki foe bijbel na owroeten sani. Kapitel 13 foe a boekoe disi, De bijbel—Gods woord of dat van mensen?, e gi dri troetroe ondrofenitori foe sma di ben kenki den libi kon boen baka di den ben studeri bijbel. Efoe joe ben sa wani leisi fa a krakti foe Gado Wortoe ben jepi den, dan mi sa prisiri foe libi a boekoe disi gi joe.”
8 Joe ben kan taki na a gobaka:
◼ „Di wi ben taki a lasti leisi, wi ben agri taki na ini a libimakandra foe a ten disi, sma no e poti prakseri na tapoe den moreel gronprakseri foe bijbel. Wi moesoe broko wi ede nanga a poti di sma no e poti prakseri tapoe bijbel? [Gi okasi foe piki.] Jesus Krestes ben taki dati a abi foeroe waarde te wi e teki a sabi foe bijbel na ini wi.” Leisi Johanes 17:3. Taki baka dati foe paragraaf 5 na ini kapitel 1 foe a Sabi-boekoe. Taki foe a gratis bijbelstudie programa foe wi, èn aksi foe demo a studie.
9 Begi taki Jehovah mag blesi ala den moeiti di joe e doe foe poti prakseri na tapoe bijbel—a tjariman foe Gado gi ala sma.