A Wortoe foe Gado e gi wi tiri
1 „Wi e libi na ini wan grontapoe di abi toemoesi foeroe problema èn toemoesi weiniki loesoe gi den. Foeroe miljoenmiljoen sma no abi nofo foe njan. Moro nanga moro sma e tron srafoe foe drug. Moro nanga moro osofamiri e broko. Seks nanga famiriman èn ogri di e doe nanga tranga na ini osofamiri, de doronomo na tapoe njoensoe. A loktoe di wi e blo èn a watra di wi e dringi, e doti safrisafri. Na a srefi ten, moro nanga moro foe wi e kisi foe doe nanga ogridoe.”
2 Na so a boekoe De bijbel — Gods woord of dat van mensen? (Bijbel — A wortoe foe Gado noso di foe libisma?) e bigin. A biginwortoe foe a boekoe abi moro foe doe nanga a ten disi, leki di a ben kon na doro seibi jari pasa kaba. Sma moesoe sabi taki a Wortoe foe Gado e gi tiri èn e gi loesoe na tapoe ala den problema di e trobi den. Wi sa meki tranga moeiti foe jepi sma na ini december foe di wi sa pristeri den a Nieuwe-Wereldvertaling (Njoen-Grontapoevertaling) nanga a boekoe Joe kan libi foe têgo na ini wan paradijs na grontapoe. A no de foe taki, dati a libi di wi e libi poeblikâsi wawan gi wan sma na baka, no de wan djaranti taki a sa teki a tiri foe Gado. Wi moesoe meki gobaka nanga a marki foe bigin wan bijbelstudie. Wi kan de seiker foe kisi jepi efoe wi e doe so wan moeiti (Mat. 28:19, 20). Djaso wi abi wan toe pristeri leki idea:
3 Efoe joe miti nanga wan moro owroe sma, joe ben sa kan gebroiki a fasi disi foe bigin:
◼ „Mi mag aksi joe: Di joe ben de moro jongoe, fa den sma na ini a birti ben handri nanga makandra? [Gi okasi foe piki.] A situwâsi de heri tra fasi now, a no so? Foe san ede joe prakseri taki sani kenki? [Gi okasi foe piki.] Foe taki leti, wi e si a kontroe foe wan profeititori na ini bijbel. [Leisi 2 Timoteus 3:1-5.] Boiti taki bijbel e taki finifini fa a grontapoe de na ini a ten disi, a bijbel e pramisi wan moro boen grontapoe heri esi. Na foe dati ede wi e gi ibri wan sma a deki-ati foe leisi bijbel. Joe si o krin a de foe froestan den wortoe di gebroiki na ini a bijbel disi, a Nieuwe-Wereldvertaling (Njoen-Grontapoevertaling), foe pe mi ben e leisi?” Tjari kon na krin taki a skrifi na ini a disiten Bakratongo, foe meki wi man froestan a bijbel moro boen. Sori a boekoe Joe kan libi foe têgo na ini wan paradijs na grontapoe, èn sori go na kapitel 18 di e froeklari wan tra profeititori di wi si taki a kon troe. Pristeri a bijbel nanga a boekoe. Efoe a sma teki den, taki dan san den e kostoe.
4 Te joe e go baka na wan moro owroe sma pe joe ben libi a bijbel nanga a boekoe, joe ben kan taki:
◼ „Di wi ben taki a lasti leisi, wi ben agri taki na foeroe fasi a libimakandra kenki kon takroe te wi teki en gersi a fasi fa a libi ben de wan toe jari nomo pasa. Ma mi ben kon baka foe sori joe taki bijbel e gi wi froewakti gi wan moro boen grontapoe na ini a ten di e kon. [Leisi Openbaring 21:3, 4.] Foe di wi sabi taki disi na a Wortoe foe Gado, dan dati moesoe gi wi deki-ati foe ondrosoekoe san bijbel abi foe taki ete.” Opo a Libi foe têgo-boekoe na bladzijde 31, èn leisi paragraaf 15. Pristeri wan oso-bijbelstudie sondro foe aksi pai.
5 Efoe joe abi wan takimandra nanga wan moro jongoe sma, joe ben kan taki:
◼ „Mi ben sa wani aksi joe wan sani: Leki wan jongoe sma, joe denki taki joe abi reide foe de positief gi a ten di e kon? Fa joe denki taki a tamara foe joe sa de? [Gi okasi foe piki.] Kolokoe taki troetroe reide de foe de positief gi a ten di e kon. [Leisi Psalm 37:10, 11.] Foe di sma no sabi san bijbel e taki foe a ten di e kon, meki wi tjari a boekoe disi kon na doro, Joe kan libi foe têgo na ini wan paradijs na grontapoe, di kan jepi sma foe kisi froetrow na ini bijbel èn taki den kan froestan fa a ten di e kon sa de. Loekoe den reide di a e gi wi taki bijbel kon troetroe foe Gado. [Leisi paragraaf 27, 28 na tapoe bladzijde 56.] Te wi abi na overtoigi kaba taki san bijbel e taki de troe, dan wi abi wan seiker howpoe gi a ten di e kon. Efoe joe wani leisi a boekoe disi, mi sa wani foe libi wan eksemplaar gi joe.”
6 Te joe go baka foe loekoe wan jongoe sma di ben teki a Libi foe têgo-boekoe, joe ben sa kan bigin foe taki:
◼ „Mi ben warderi en foe jere fa joe e broko joe ede gi a ten di e kon. Joe kan memre taki mi ben sori joe wan bijbeltekst di e pramisi wi wan kolokoe èn wan seiker tamara. Djaso wan tra tekst de. [Leisi Openbaring 21:3, 4.] A boekoe di mi ben libi gi joe, e gi wi boeweisi di e overtoigi sma, taki bijbel na a Wortoe foe Gado, no di foe libisma. A troetori dati wani taki wan toe dipi sani moro. Loekoe san na den. [Leisi paragraaf 20 na tapoe bladzijde 32, 33.] Efoe joe ben sa wani, mi sa breiti foe studeri a bijbel nanga joe sondro foe pai.” Efoe a teki a studie, aksi a sma efoe a abi wan eksemplaar foe a bijbel. Efoe a no abi wan, pristeri a Nieuwe-Wereldvertaling gi en. Taigi en san na a bijdrage.
7 Wan sma di no sabi pe a moesoe go foe kisi tiri foe kakafoetoe gi den problema foe a libi, ben sa kan handri na tapoe a fasi disi:
◼ „Wi e libi na ini wan ten pe pikinmoro ibri sma e miti serjoesoe problema. Foeroe sma e go na ala sortoe raiman foe kisi tiri. Son sma e go na loekoeman foe kisi jepi. Pe joe denki taki joe kan feni boen rai di sa gi wi wini troetroe? [Gi okasi foe piki.] Bijbel e kari wan prenspari sani di de troe, di wi alamala moesoe froestan.” Leisi Jeremia 10:23. Opo Joe kan libi foe têgo na ini wan paradijs na grontapoe na tapoe bladzijde 102, èn leisi paragraaf 9. „A boekoe disi sa jepi joe foe froestan fa, na ondro Gado Kownoekondre, ala den problema foe wi sa poeroe gowe. Joe ben sa wani leisi en?” Efoe a sma teki a boekoe, taigi en san na a bijdrage.
8 Efoe na a fosi fisiti joe ben taki foe a abi di libisma abi tiri fanowdoe, joe ben kan go doro nanga a takimakandra na tapoe a gobaka, foe di joe e taki:
◼ „Di wi ben miti a fosi leisi, wi ben agri taki wi abi a tiri foe Gado fanowdoe efoe wi wani kakafoetoe nanga boen bakapisi gi den problema foe a libi. Foe a tori dati, mi denki taki joe sa warderi den lasti sani di taki na ini a boekoe di mi ben libi gi joe. [Leisi paragraaf 15 na tapoe bladzijde 255 na ini a Libi foe têgo-boekoe.] Mi wani pristeri joe wan oso-bijbelstudie sondro foe joe pai gi dati, èn mi wani foe demo en gi joe nownowde.”
9 Jehovah sa blesi den moeiti foe wi te wi e jepi owroesma nanga jongoesma foe warderi a waarde foe a Wortoe foe Gado èn a tiri di a e gi ini wi libi. — Ps. 119:105.