Hori joe froestan na tapoe sani di de foe tapoesei
1 Wan artikel na ini The New York Times foe 31 december 1994 e gi komentaar na tapoe a geslakti di de lontoe wi èn a fasi fa a e si a tamara: „Den e frede a tamara. Den e frede en na ini sani di abi foe doe nanga wroko, siki, ekonomia, nanga den situwâsi na grontapoe.” Ibri presi pe wi e loekoe, wi e si taki sma no de seiker foe a libi. A diniwroko foe wi leki Jehovah Kotoigi e meki wi e toeka ibri dei nanga sma di e firi a fasi disi. Ala di wi e miti den srefi problema di den abi, a bribi foe wi nanga a froetrow foe wi na ini den seiker pramisi foe Gado Wortoe e meki taki wi man foe si a libi nanga a tamara foe a libisma famiri na wan heri tra fasi.—Jes. 65:13, 14, 17.
2 A positief fasi fa wi e si sani nanga a seiker howpoe foe wi, e meki taki foeroe reti-atisma e arki a boskopoe di wi e tjari gi den. Foeroe sma di de depressief èn di e firi kwinsi, e feni en wan trowstoe foe taki nanga wi. Foe di den lobi san den e jere, meki wan toe e agri foe studeri bijbel nanga wi. Ma sontron, a fosi sani di sma wani, na foe taki foe den persoonlijk problema foe den. Ala di wi kan gebroiki pikinso ten foe arki den persoonlijk sorgoe foe tra sma, wi no moesoe lasi a marki foe wi, di de foe leri sma den positief waarheid foe Gado Wortoe.
3 Wi wani firi nanga den wan di de na ondro hebi lai. Jesus ben poti na eksempre di a ben taki san skrifi na Mateus 11:28: „Kon na mi, oen alamala di e wroko tranga èn di abi hebi lai.” Wi wani gi sma deki-ati na a srefi fasi. Ma loekoe san Jesus ben taki na a kaba foe vers 28: „Mi sa gi oenoe kowroe ati.” Dati moesoe de a marki foe wi. Wi e doe dati te wi e prati den pramisi foe Gado Wortoe di e gi kowroe ati. Te wi de wan boen arkiman, dan dati e sori a persoonlijk belangstelling foe wi èn a broko di wi e broko wi ede nanga sma, èn a de prenspari foe kan doe a wroko foe wi foe preiki a boen njoensoe foe a Kownoekondre. Èn na so wi e jepi tra sma foe froestan taki a Kownoekondre na a wan-enkri troe dresi gi ala den problema foe a libisma famiri.—Mat. 24:14.
4 A wroko foe wi no de leki di foe den sabiman foe gosontoe afersi. Na presi foe dati, a de leki fa na apostel Paulus ben froeklari, soleki fa a skrifi na 1 Timoteus 4:6, wan diniwroko di e poti prakseri na tapoe „toemoesi boen leri”, den leri di de foe feni na ini Gado Wortoe. Den wan di abi persoonlijk problema noso emotioneel problema moesoe kisi deki-ati kande foe bow tapoe Jehovah. Leri den foe hori „den froestan na tapoe sani di de foe tapoesei”—sani di abi foe doe nanga a Kownoekondre howpoe (Kol. 3:2). Te sma e hori den prakseri na tapoe a Wortoe foe Gado, dan den kan kisi deki-ati leki bakapisi foe a tranga krakti di a abi na ini den libi.—Hebr. 4:12.
5 So boen, a marki foe wi na foe jepi sma foe poti ala den prakseri na tapoe sani di ’regtfardiki, krin, switi, èn di de foe prèise’ (Fil. 4:8). Efoe den e poti den prakseri na tapoe a Kownoekondre howpoe, dan den sa kisi blesi na a srefi fasi leki wi. Den toe sa ondrofeni a prisiri di e kon foe di den sa sabi taki, te foe kaba, Jehovah sa loesoe ala den problema foe den nanga jepi foe en Kownoekondre.—Ps. 145:16.