Noiti wi ben abi en so boen na jejefasi!
1 A moro bigi pisi foe sma e angri foe a dei di den kan taki: „Noiti wi ben abi en so boen!” Na ini a prakseri foe den, a dei dati sa kon te den abi toemoesi foeroe materia sani di e meki den ’no broko den ede nanga noti, njan, dringi èn prisiri’ (Luk. 12:19). Na a tra sei, nownowde wi man taki dati na jejefasi, wi no e mankeri noti san boen (Ps. 34:10). Fa dati kan?
2 Odo 10:22 e taki: „A blesi foe Jehovah — dati na san e meki kon goedoe.” Wi di e ondrofeni a sortoe blesi disi foe Gado, kan taki troetroe dati Gado „e gi wi ala sani foeroe, foe njan boen foe den” (1 Tim. 6:17). Disi e meki taki wi na den moro goedoe sma na grontapoe!
3 Teri den blesi foe wi: Foeroe foe wi no abi foeroe materia sani. Tokoe, wi na sma di blesi foe di wi no de nanga toemoesi foeroe broko-ede foe sani di wi abi fanowdoe ala dei. Jehovah sabi sortoe sani wi abi fanowdoe, èn a e pramisi foe sorgoe gi dati (Mat. 6:31-33). A djaranti foe en e gi wi wan boen konsensi di sma no man bai srefisrefi.
4 Tokoe, den blesi foe wi na jejefasi moro bigi srefi. A libi foe wi e anga foe jeje njanjan di komoto foe Jehovah (Mat. 4:4). Den wan di e loekoe go na grontapoe fonten foe kisi njanjan na jejefasi, e pina foe angri ala di wi e njan èn e dringi na jejefasi te wi abi satisfaksi (Jes. 65:13). A ’getrow srafoe’ e gi wi wan maksin foe sabi di no man kaba, di e tjari wi go na têgo libi. — Mat. 24:45; Joh. 17:3.
5 A warti bradafasi foe wi na heri grontapoe e gi wi a waran matifasi foe lobi brada nanga sisa di e libi na ibri sei foe grontapoe (Joh. 13:35). A gemeente na wan kibripresi foe vrede, pe wi kan feni trowstoe nanga kowroe-ati. Den owroeman e loekoe den sili foe wi, foe di den e jepi wi foe kakafoetoe gi foeroe sortoe problema (Hebr. 13:17). A krosibei matifasi nanga wi brada abi leki bakapisi, a gi di wi e gi makandra deki-ati di e gi krakti foe horidoro. — Rom. 1:11, 12.
6 Srefi a wroko foe wi na wan blesi. Foeroe wroko na grontapoe froeferi èn den no e gi satisfaksi. A prati di wi e prati a boen njoensoe, e tjari prisiri kon gi trawan èn e gi wi kolokoe (Tori. 20:35). Wi man si troetroe a boen di de wan bakapisi foe den tranga wroko foe wi. — Preik. 2:24.
7 Ma a moro prenspari sani na, taki wi abi wan toemoesi moi howpoe gi a ten di e kon (Rom. 12:12). Wi e loekoe go na fesi na wan volmaakti njoen grontapoe foe regtfardikifasi, pe wi sa libi nanga den lobiwan foe wi na ini kolokoe nanga vrede foe têgo! A howpoe disi na wan goedoe di warti moro leki iniwan sani di a grontapoe disi kan pristeri wi. — 1 Tim. 6:19.
8 Fa wi kan sori wi warderi? Wi no man pai Jehovah noiti baka foe san a doe gi wi. Wi kan sori wi warderi nomo foe di wi (1) ibri dei e gi En tangi foe a no-froedini boen-ati foe En (Ef. 5:20), (2) e sori wi lobi nanga a gi di wi e gi jesi (1 Joh. 5:3), (3) e santa en nen nanga a boen njoensoe di wi e preiki (Ps. 83:18), èn (4) e horibaka gi a kresten gemeente, foe di wi e wroko makandra nanga wi heri ati. — 1 Tim. 3:15.
9 Wi abi ala reide foe de den moro kolokoe sma na grontapoe (Ps. 144:15b). Meki a fasi fa wi e si sani, a fasi fa wi e tjari wi srefi, èn a diniwroko foe wi, sori a prisiri di wi abi na ini a jeje paradijs foe wi. Noiti wi ben abi en so boen!