Pristeri wisrefi na wan friwani fasi gi ibri boen wroko
1 Wan poeblikâsi foe sma foe grontapoe ben sori tapoe Jehovah Kotoigi, èn a poeblikâsi e taki: „A ben sa moeilek foe feni memre foe iniwan tra groepoe di e wroko so tranga gi a relisi foe den leki fa den Kotoigi e wroko gi a relisi foe den.” Foe san ede Jehovah Kotoigi e wroko so tranga èn nanga so wan friwani jeje?
2 Wan reide na taki den foeroe nanga a sabi di den sabi taki sani moesoe pasa biten, bika den sani de prenspari. Jesus ben erkèn taki a ten di a ben abi foe kaba a wroko na grontapoe, ben skotoe (Joh. 9:4). Ala di Gado en Manpikin di kisi glori e go doro foe tiri na mindri foe den feanti foe en nojaso, tokoe a pipel foe Jehovah kon sabi taki a ten di den abi, skotoe toe foe doe a wroko foe den. Foe dati ede, den e tan pristeri densrefi na wan friwani fasi foe doe santa diniwroko (Ps. 110:1-3). Foe di moro wrokoman de fanowdoe foe tjari den sani di koti kon na inisei, meki den no kan tapoe foe doe moeti (Mat. 9:37, 38). Foe dati ede, den e doe moeiti foe waka baka Jesus di ben poti wan volmaakti eksempre foe friwanifasi nanga faja na ini a wroko foe en.—Joh. 5:17.
3 Wan tra reide foe san ede Jehovah Kotoigi e wroko nanga den heri ati gi Jehovah, na foe di na organisâsi foe den na heri grontapoe e difrenti foe ala tra groepoe. A de wan marki foe den relisi organisâsi foe grontapoe taki den e aksi pikinso ten nanga moeiti nomo foe den bakaman foe den. San den e bribi, no abi foeroe krakti noso a no abi krakti srefisrefi na tapoe na aladei libi foe den, a fasi fa den e handri nanga trawan, noso den sani di den e feti na baka na ini a libi. Foe di den no abi a krakti foe a troe bribi di kan poesoe den, meki den wani nomonomo taki den skapoeman foe den ’moesoe taki switi tori nanga den’, foe gi den a djaranti taki a moeiti di den e doe, nofo kaba (Jes. 30:10). Den tiriman foe krestenhèit foe den, plisi den, foe di den e ’tigri den jesi’, èn na so den e poti wan jeje foe mi-no-kefasi nanga lesifasi na ini den bakaman foe den.—2 Tim. 4:3.
4 Fa sani de heri tra fasi na mindri a pipel foe Jehovah! Nanga ala den sani di abi foe doe nanga na anbegi foe wi, joe abi foe doe moeiti, meki tranga moeiti, èn joe abi foe wroko. Ala dei èn na ini ala sani di wi e doe, wi e doe san wi e bribi toe. Ala di waarheid e meki wi prisiri foeroe, tokoe a abi na ini en toe „foe feti foeroe” so taki wi kan doe san waarheid e aksi foe wi. (Teki gersi 1 Tesalonikasma 2:2.) Soso foe sorgoe gi den frantiwortoe foe na aladei libi, nofo kaba gi foeroe sma foe abi foeroe foe doe. Ma tokoe, wi no e meki den broko-ede disi tapoe wi foe poti Kownoekondre afersi na a fosi presi.—Mat. 6:33.
5 San wi kisi foe doe na ini a diniwroko foe Jehovah e tjari so foeroe winimarki èn a de so tranga fanowdoe, taki a e poesoe wi foe ’bai’ ten foe tra sani di sma e feti na baka èn foe gebroiki a ten disi moro boen gi jeje afersi (Ef. 5:16). Foe di wi sabi taki a gi di wi e gi wisrefi na a dini foe Gado nanga a friwani jeje foe wi, na sani di e plisi Jehovah, dati meki wi abi moro deki-ati foe tan wroko tranga. Foe di wi e kisi foeroe blesi nownowde èn a froewakti di wi e froewakti foe libi na ini a ten di e kon, dati meki wi abi a fasti bosroiti foe tan „wroko tranga èn doe tranga moeiti” gi den afersi foe a Kownoekondre.—1 Tim. 4:10.
6 A gi di wan sma e gi ensrefi na a dini foe Gado èn a jeje foe òfer joesrefi: Nojaso foeroe sma e poti materia sani di den abi fanowdoe èn di e hari den prakseri, na a fosi presi moro leki ala tra sani. Den firi taki den abi reti nomonomo foe poti ala den prakseri na tapoe san den sa njan, dringi, noso weri (Mat. 6:31). Foe di den no de tevrede nanga san den abi fanowdoe nomo, meki san e poesoe den na foe njan boen foe wan boen libi srefisrefi nownowde èn foe ’abi foeroe boen sani gi foeroe jari ete, so taki den no abi foe broko den ede nanga noti, kan njan, dringi, èn meki prisiri’ (Luk. 12:19). Wan foe den marki foe den sma di e go na kerki, na taki ibri tron te a relisi foe den sma disi e aksi den foe meki moro moeiti, dan den e feni taki a kerki foe den e kon na a reti di den abi. Na idea foe libi na baka son wan foe den materia sani di sma e feti na baka foe kisi, noso srefi foe tapoe pikinso nanga a feti di den e feti na baka den materia sani disi, noso foe tapoe nanga den prisiri sani di den e doe, na wan tegoe sani gi den sma disi. Foe di a e denki ensrefi nomo, meki a kweki di a kan kweki wan jeje foe òfer ensrefi, na wan sani di no kan, di no e wroko na ini na aladei libi foe en.
7 Wi e si a tori disi tra fasi. A Wortoe foe Gado ben meki a fasi fa wi e denki kon moro hei, so taki wi e prakseri san Gado e prakseri na presi foe prakseri den sani foe libisma (Jes. 55:8, 9). Wi abi marki na ini a libi, di moro hei leki a marki foe feti na baka sani na skinfasi. Foe meki Jehovah en soevereiniteit kon hei èn foe santa a nen foe en, na den moro prenspari tori na ini a heri universum. A prenspari di den tori disi prenspari, bigi so te, taki te joe teki en gersi nanga tra sani, dan ala den nâsi „de leki notinoti na en fesi” (Jes. 40:17). Ibri sani di wi e doe foe libi wi libi sondro foe hori a wani foe Gado na prakseri, na wan sani di wi moesoe si leki wan don sani.—1 Kor. 3:19.
8 So boen, ala di wi abi wan toe materia sani fanowdoe èn ala di tra materia sani boen foe gebroiki foe doe den Kownoekondre aktiviteit foe wi, tokoe wi e si taki den sani disi a no troetroe „den moro prenspari sani” (Fil. 1:10). Wi e hori wisrefi na a jeje foe 1 Timoteus 6:8 foe di wi e skotoe a feti di wi e feti na baka materia sani èn na wan koni fasi e meki moeiti foe tan poti wi ati krinkrin na tapoe ’den sani di sma no man si nanga den ai, den sani di e tan foe têgo’.—2 Kor. 4:18.
9 O moro wi e prakseri fa Gado e prakseri, o moro mendri wi e broko wi ede nanga materia sani. Te wi e prakseri dipi foe san Jehovah doe kaba gi wi èn den toemoesi moi blesi di a pramisi gi a tamara, dan wi wani tjari ibri ofrandi di a e aksi foe wi (Mark. 10:29, 30). A de di wi de èn e libi, na foe di En meki en so. Efoe a no ben sori wi sari-ati nanga lobi, dan wi no ben sa man njan boen foe a libi now èn na ini a ten di e kon toe. Wi e firi taki wi de froeplekti foe òfer wisrefi, foe di ibri sani di wi e doe na ini en diniwroko ’na san wi moesoe foe doe’ (Luk. 17:10). Ini wan sani di wi moesoe gi baka na Jehovah, wi breiti foe gi, foe di wi sabi taki wi sa „koti bogobogo”.—2 Kor. 9:6, 7.
10 Friwani wrokoman de fanowdoe nojaso: Sensi a biginbigin, a kresten gemeente ben doro wan pisi ten pe foeroe sani ben de foe doe. Wan dorodoro kotoigi ben moesoe gi bifo Jerusalem ben o kisi pori na ini 70 G.T. Na ini a pisi ten dati, den disipel foe Jesus ben „poti ala den prakseri na tapoe a wortoe” (Tori. 18:5). Foe di sani ben gro so esi, meki a ben de fanowdoe foe gi leri na moro preikiman nanga bekwaam skapoeman èn foe aksi den foe jepi. Sma di ben man wroko boen nanga heihei sma foe grontapoe ben de fanowdoe. Èn so srefi bekwaam man ben de fanowdoe di ben sa man loekoe taki materia sani kon makandra nanga taki den materia sani e prati boen, (Tori. 6:1-6; Ef. 4:11). Ala di wan toe ben dini na wan prensparifasi, tokoe moro foeroe foe den ben tan na ini a background. Ma alamala foe den ’ben span densrefi boen tranga’, èn ben wroko makandra nanga den heri ati foe klari a wroko.—Luk. 13:24.
11 Ala di a no ben de fanowdoe foe abi boen foeroe aktiviteit na heri grontapoe na ini den foeroe jarihondro di ben kon baka dati, tokoe den ben bigin na wan faja fasi baka nanga Kownoekondre aktiviteit, di Jesus ben teki en Kownoekondre makti na ini 1914. Biginbigin, dan wan toe sma nomo ben froestan taki a ben sa de fanowdoe foe abi so foeroe wrokoman gi den Kownoekondre afersi di ben sa aksi, taki miljoenmiljoen friwani sma ben sa moesoe jepi na kondre na heri grontapoe.
12 Nownowde na organisâsi abi foeroe foe doe nanga foeroe difrenti projekt di e aksi ala sani foe wi san wi abi. Kownoekondre aktiviteit e go na fesi moro esi. A de di sani de prenspari èn moesoe pasa biten nojaso, e boeweigi wi foe meki moeiti èn foe gebroiki ibri goedoe di wi abi foe doe a wroko di moesoe doe. Foe di a kaba foe na ogri seti foe sani disi e kon so krosibei, dati meki wi e froewakti moro hebi aktiviteit srefi na ini den dei di e kon. Ibri foetoeboi foe Jehovah, di gi ensrefi abra na En, e kisi a kari foe òfer ensrefi na wan friwanifasi na ini a wroko di de tranga fanowdoe foe tjari sma kon makandra.
13 San wi moesoe doe? Foe troe wi kan taki dati „foeroe de foe doe na ini a wroko foe Masra” (1 Kor. 15:58). Na foeroe presi, sani de lepi foe koti, ma nofo wrokoman no de. Wi e kisi a kari foe doe san wi kan doe, no wawan foe gi kotoigi dorodoro na ini wi eigi gebied, ma so srefi foe gi piki tapoe a tjalensi foe kan dini na wan tra presi pe dati de moro tranga fanowdoe.
14 A de foe prèise, te wi e si fa Kotoigi na ala presi foe grontapoe e òfer densrefi na wan friwanifasi gi tra aktiviteit. Den sani disi kan de difrenti sortoe sani, soleki foe jepi na wan friwani fasi na a bow foe presi gi na anbegi, foe dini na den kongres, èn foe jepi nanga nowtoe programa na ini ten foe rampoe, ma den kan de sani toe soleki foe krin a Kownoekondre zaal foe joe tapoe fasti ten. Akroederi a lasti sani di kari, a de wan boen sani foe loekoe alaten taki a Kownoekondre zaal e tan krin na baka èn taki ala sani de tapoe en presi baka ibri konmakandra. Te joe e kaba wroko den wroko di sma e si leki lagi wroko, dan joe e sori taki joe e froestan den wortoe foe Jesus na Lukas 16:10 srefisrefi: „A sma di de getrow na ini a moro mendri sani, de so srefi toe getrow na ini foeroe sani, èn a sma di de onregtfardiki na ini a moro mendri sani, de so srefi onregtfardiki na ini foeroe sani.”
■ Horibaka gi den aktiviteit foe a gemeente: Ala di ibri gemeente e wroko leki wan pisi foe a heri organisâsi èn e kisi tiri foe „a getrow èn koni srafoe”, tokoe a gemeente abi sma pe ibriwan foe den na wan aparti Kownoekondre preikiman (Mat. 24:45). Den sani di a gemeente kan doe, e anga foeroe foe san ibri Kotoigi wani doe èn san ibri Kotoigi man doe. A gemeente e poti ala den prakseri na tapoe a preiki foe a boen njoensoe na ini a gebied foe en, foe meki njoen disipel, èn baka dati foe gi den krakti na jejefasi. Ibriwan foe wi kan abi wan prati na a wroko disi. Wisrefi toe kan poti marki foe doro na ini a persoonlijk studie foe wi, a prati di wi abi na den konmakandra di wani taki wan sani, nanga a jepi foe trawan di abi dati fanowdoe na ini a gemeente. Den aktiviteit disi e opo foeroe moi okasi gi wi foe sori taki wi wani troetroe.
■ Den wan di de leki opziener, moesoe teki fesi: Jehovah gi den owroeman di A poti na wroko na ini den gemeente foe tiri a gemeente (Tori. 20:28). Den man disi na man di ben soekoe foe doro den marki gi a grani disi (1 Tim. 3:1). Pikinmoro ibri brada na ini a gemeente man gro foe kon moro bekwaam foe teki moro bigi frantiwortoe. Foeroe foe den brada e gro na jejefasi èn den moesoe tan gro na ondro a tiri nanga jepi di den owroeman foe a gemeente e gi na wan lobi fasi. Den man disi moesoe de sma di e studeri bijbel nanga wi poeblikâsi fajafaja. Den kan sori taki den wani, foe di den e saka densrefi na ondro den owroeman di den poti a wroko nanga jepi foe a santa jeje, èn foe di den waka baka a bribi foe den owroeman, èn foe di den e kweki den bekwaamfasi di de fanowdoe gi wan owroeman.—Hebr. 13:7, 17.
■ Bigin nanga a foeroe-ten diniwroko: Na a fosi presi a gemeente e wroko foe preiki a boen njoensoe (Mat. 24:14). Fa a de wan blesi te fajafaja sma e meki moro moeiti foe di den e gi den nen foe bigin wroko leki pionier! Foeroetron disi abi na ini, a kenki di den moesoe kenki wan toe sani na ini a libi foe den. A kan taki den moesoe tjari moro kenki kon foe man go doro nanga a spesroetoe wroko disi foe a diniwroko. Ma den wan di e tan horidoro na a grani disi, na presi foe tapoe nanga dati baka wan toe jari foe di den lasi ati gi wan pisi ten, kan de seiker taki den sa ondrofeni den foeroe blesi foe Jehovah. Owroeman di abi lobi, nanga tra lepi sma, kan jepi taki den pionier disi abi boen bakapisi na ini a wroko foe den, foe di den owroeman nanga den tra lepi sma disi e gi den pionier deki-ati nanga san den e taki èn nanga den sani di den e doe. Fa jongoesma e sori wan moi fasi foe denki, te den e go na ini a pionierwroko wantewante baka te den klari nanga skoro! A srefi sani de troe gi den bigisma di e go pionier so esi leki den no abi so foeroe grontapoe froeplekti moro. Fa a e gi wan kresten di gi ensrefi abra, satisfaksi te a e wroko makandra na so wan fasi nanga a meki di Jehovah e meki sani go moro esi na ini a wroko foe tjari sma kon makandra!—Jes. 60:22.
■ Abi wan prati na ini a bow nanga na ondrow foe konmakandra presi: Troetroe hondrohondro njoen Kownoekondre zaal bow èn so srefi foeroe Kongreshal bow. A de wan froewondroe sani, taki pikinmoro ala wroko, na wi brada nanga sisa doe èn den ben gi den ten nanga den bekwaamfasi foe den na wan friwanifasi (1 Kron. 28:21). Doesoendoesoen sma di e wroko na wan friwanifasi, e hori den konmakandra presi disi boen, foe di den e doe ibri sani di moesoe doe foe ondrow den presi disi (2 Kron. 34:8). Sensi a wroko disi na wan fasi foe doe santa diniwroko, dati meki den wan di e jepi, e òfer densrefi na wan friwani fasi, èn den no e aksi foe sma pai den gi den wroko di den e doe, neleki den no e aksi pai te den e preiki oso foe oso, e hori poebliki taki na ini a gemeente, noso e jepi nanga wroko gi den kringkonmakandra noso gi den kongres. Na wan friwanifasi den friwani wrokoman disi e òfer densrefi foe meki plan èn foe bow presi gi na anbegi so taki sma kan prèise Jehovah. Fajafaja den e jepi nanga den sortoe sani disi soleki foe jepi sreka papira di de fanowdoe, foe skrifi san e pasa nanga den tori foe moni afersi, foe meki kontakti nanga sma so taki sani kan bai, èn foe teri omeni materia sani sa de fanowdoe. Den loyaal foetoeboi disi foe Jehovah, no e aksi pai gi a wroko di den e doe, noso den no e soekoe foe kon goedoe na skinfasi na a wan noso tra fasi nanga den wroko di den e doe, foe di den sabi taki ala den bekwaamfasi foe den nanga den goedoe di den abi, na sani di gi abra na Jehovah. (Loekoe a maart 1992 Wi Kownoekondre Dienst, bladzijde 4, paragraaf 10.) Na aktiviteit disi e aksi taki fajafaja wrokoman moesoe de di e doe a wroko foe den nanga „den heri ati neleki gi Jehovah”.—Kol. 3:23.
15 Dan, san na a sani di e meki a friwanifasi foe a pipel foe Jehovah de so wan aparti sani? A de a jeje foe gi. A gi di den lobi foe gi, abi moro na ini leki soso foe gi moni noso materia sani—den „e òfer densrefi na wan friwani fasi” (Ps. 110:3). Disi na san a gi di wi gi wisrefi abra na Jehovah, wani taki troetroe. Wi e kisi pai na wan spesroetoe fasi. Wi e ondrofeni „moro kolokoe” èn wi „e koti bogobogo”, bika tra sma e warderi san wi e doe, èn den tra sma disi foe den sei e gi wi sani baka (Tori. 20:35; 2 Kor. 9:6; Luk. 6:38). A moro bigi Sma Di E Doe wi Boen, na wi hemel Tata, Jehovah, di „lobi wan sma di e gi nanga prisiri” (2 Kor. 9:7). A sa pai wi hondrohondro tron baka, nanga blèsi di sa tan foe têgo (Mal. 3:10; Rom. 6:23). So boen, te joe e kisi a grani foe doe sani na ini a diniwroko foe Jehovah, joe sa òfer joesrefi na wan friwani fasi èn piki leki fa Jesaja ben piki: „Dja mi de! Seni mi go”?—Jes. 6:8.